Detalhes

Escrito por Mateus Goncalves

Publicado em 08 março 2021

Atualizado em 08 março 2021

Visualizações: 679

#TimorLeste #UNTL #SEJ #ArquidioceseMetropolitanaDili 26 Fevereiru 2021
Universidade Nacional Timor Lorosa'e (UNTL) nia Magnífiku Reitór Profesór dr. João Soares Martins MPH, Ph.D, hamutuk ho Arcebispo Díli, Dom Virgílio do Carmo da Silva, S.D.B, partisipa atividade kuda ai-kasi oan atus ida (100) iha Jardin Motael-Díli, ne’ebé organiza husi Sentru Estudu Jeneru (SEJ)-UNTL (26-02).

Magnífiku Reitór hateten katak inisiativa ne’e husi Sentru Estudu Jéneru (SEJ)-UNTL ho objetivu atu enkoraja komunidade atu kuda ai-oan hodi hamatak ambiente sidade Díli.

“Inisiativa furak husi SEJ-UNTL nian, maské sira-nia sentru ko’alia kona-ba igualdade jenéru maibé sira iha vontade realiza mós atividade kuda ai-oan, tanba ne’e ha’u hakarak enkoraja nafatin sira, atu kontinua hodi promove ba oin”, tenik Magnífiku Reitór.

Iha fatin hanesan, Arcebispo Metropolitano de Díli hateten katak atividade mai husi inisiativa sira ho objetivu atu hamatak rai liuhusi kuda ai-oan.

“SEJ-UNTL nia inisiativa ne’e furak tebes tanba ne’e ohin ha’u mai hamutuk ho sira kuda ai-kasi oan, la haluha enkorajen nafatin ba komunidade, liu-liu ba joven sira presiza promove kuda ai-oan, no hakas an atu fó liman ba malu hodi hamatak liután ita-nia rain liuhusi ai-kasi ne’ebé ita kuda.” tenik Arcebispo Díli.

Enkuantu Komisaun Organizadóra, Profesór Gil da Conceição, hateten katak kuda ai-kasi oan bele fó oksijeniu di’ak ba sidade Díli, liu-liu halo matak liután.

“Objetivu ida mak bele fó oksijéniu di’ak ba ema, halo sidade Díli sai matak, hein tinan 5 mai sei bele furak no atrai ema seluk ne’ebé hakarak mai visita Timor”, tenik Profesór Conceição.

Profesór Gil mós klarifika katak atividade kuda ai-oan ne’e hetan apoiu husi Ministériu Agrikultura no Peska liuhusi Diresaun Floresta nian no totál husi ai-oan ne’ebé kuda hamutuk atus ida.

Atividade kuda ai-oan partisipa husi Magnífiku Reitór Profesór dr. João Soares Martins MPH,Ph.D, Arcebispo Metropolitano Díli, Don Virgílio do Carmo da Silva SDB, Diretór SEJ-UNTL, Profesór Gil da Conceição ho nia ekipa, estudante UNTL, Komandante Polísia Eskuadra Munisípiu Díli ho nia ekipa, ho universitáriu sira iha Díli laran, inklui estudante ensinu sekundária sira.

Média UNTL 📝 : Denison A. Barros (estajiáriu)
Foto 📸 : Denison A. Barros (estajiáriu), Agostinho da Cruz e Silva

Comment

Detalhes

Escrito por Mateus Goncalves

Publicado em 08 março 2021

Atualizado em 08 março 2021

Visualizações: 3790

#TimorLeste #UNTL #FD 26 Fevereiru 2021
Universidade Nacional Timor Lorosa'e (UNTL) nia Magnífiku Reitór Profesór dr. João Soares Martins MPH, Ph.D, akompaña husi Visereitór no Proreitór sira, hasoru malu ho estrutura Fakuldade Direitu nian, hodi rona direta progresu no dezafiu sira mak fakuldade enfreta.

Iha Sala Vídeo Konferénsia UNTL nian, Díli (25/02), Dekanu Fakuldade Direitu nian, Profesór Isidoro Viana da Costa, hato’o ba estrutura foun universidade nasionál nian kona-ba progresu no dezafiu sira mak fakuldade enfrenta atu atualiza no haree hamutuk pasu sira ba oin.

Toka mós kona-ba planu sira fakuldade nian, liuliu planu atu implementa "ano zero", reativa kursu mestradu no planu atu loke kursu estensaun.

Partisipa iha reuniaun refere, Visereitór ba Asuntu Akadémika no Garantia Kualidade nian, Profesór Doutór Samuel Venâncio de Sousa Freitas, Visereitór ba Asuntu Estudantís, Profesora Eng. Lígia Tómas Correia, M.Sc, Proreitór ba Asuntu Provedoria no Akonsellamentu Profesór Mestre Tomé Xavier Jerónimo, Dekanu Fakuldade Direitu, Profesór Isidoro Viana da Costa, ho nia Vise-dekanu sira.

Média UNTL 📝: Agostinho da Cruz e Silva
Foto 📷: Agostinho da Cruz e Silva

Comment

Detalhes

Escrito por Mateus Goncalves

Publicado em 08 março 2021

Atualizado em 08 março 2021

Visualizações: 521

#TimorLeste #UNTL #FEAH #PPGE 26 Fevereiru 2021
Universidade Nacional Timor Lorosa'e (UNTL), nia Magnífiku Reitór Profesór dr. João Soares Martins MPH, Ph.D akompaña husi Visereitór no Proreitór sira, partisipa iha aprezentasaun husi ekipa Programa Pós-Graduação em Educação (FPGE), kona-ba proposta kursu foun mestradu iha área edukasaun nian, iha sala Vídeo Konferénsia (25/02), Díli.
Kursu Mestradu iha área Edukasaun ne'e integra iha Fakuldade Edukasaun Arte no Umanidade (FEAH), no apoiu husi Agência Brasileira de Cooperação no Universidade Federal de Santa Catarina, Brazil.

Hafoin aprezentasaun, Reitór apresia esforsu ekipa PPGE nian, hodi elabora ona kuríkulu, no husu atu koordena ho Visereitór ba Asuntu Pós-Graduasaun no Peskiza atu organiza konferénsia ida hodi fó oportunidade ba fakuldade sira relasiona ho asuntu refere.

"Ekipa halo ona kurikullu no apresentasaun maibé ita iha Visereitór ba Asuntu Pós Graduasaun no Peskiza sei organiza konferénsia ida ba hotu-hotu, hodi fó oportunidade ba FEAH, inklui fakuldade sira ne’ebé atu loke sira-nia kursu pós-graduasaun no mestradu”, tenik Reitór.

Iha fatin hanesan, Diretor Sentru Estudu Kultura no Arte, Profesór Doutór Vicente Paulino, hateten katak aprezentasaun ne’ebé realiza hanesan proposta ida ba kriasaun mestradu iha área edukasaun ho área haat ba Reitór ho nia Ekipa-Reitorál.
"Ohin ha’u ho ekipa ami halo aprezentasaun kona-ba proposta kriasaun kursu mestradu iha área Edukasaun ho liña Peskiza haat hanesan (1) Língua, literatura no edukasaun, (2) Kuríkullu i formasaun profesór, (3) Edukasaun sientífika, matemátika i teknolójika, (4) Edukasaun, ambiente, sosiedade i movimentu sosiál, hodi hetan sujestaun balun husi estrutura sira” tenik Profesór Vicente Paulino.

Diretór Sentru Estudu Kultura no Arte ne’e mós hatutan sira sei fila ba hadia parte balun ne’ebé refere iha rekomendasaun ne’ebé hato’o husi Reitór ho nia estrutura liuliu atu priense rekezitu sira husi Ajénsia Nasionál ba Avaliasaun no Akreditasaun Akadémika (ANAAA).

Partisipa iha reuniaun ne'e Visereitór ba Asuntu Akadémiku no Garantia Kualidade, Profesór Doutór Samuel Venâncio de Sousa Freitas, Proreitór ba Asuntu Kooperasaun, Profesora Doutora Lídia Gomes, SKM, M.D., Dekana Fakuldade Edukasaun, Arte no Umanidade (FEAH) Profesora Doutora Ana Cristina de J. S. Martins, Diretór Sentru Estudu Kultura no Arte, Profesór Doutór Vicente Paulino, ho nia ekipa.

Média UNTL 📝: Agostinho da Cruz e Silva
Foto 📸: Agostinho da Cruz e Silva

Comment

Detalhes

Escrito por Mateus Goncalves

Publicado em 04 março 2021

Atualizado em 04 março 2021

Visualizações: 743

#TimorLeste #UNTL #UmaAmerika #AmericanCorner 25 Fevereiru
Universidade Nacional Timor Lorosa’e (UNTL) nia Uma Amerika - Amerika Corner (UA) loke ona kompetisaun ba universitáriu sira UNTL nian no universidade seluk, inklui foin sa’e sira husi ensínu sekundáriu sira iha Díli laran, hodi hasa’e kapasidade hakerek Dalen Inglés nian (English Writing).

Kompetisaun ne’ebé organiza ho objetivu atu eleva estudante sira-nian kapasidade iha hakerek dalen inglés no objetivu seluk hanesan parte ida hodi lori partisipante sira koñese mós Kultura Amérika nian.

“Kompetisaun ida ne’e partisipa husi joven na’in sanulu resin ualu (18), no ami halo ona selesaun ba sira-nia dokumentu, husi selesaun indika katak partisipante na’in sia (9) mak prienxe rekizitu hodi kompete ba faze tuir mai”, hateten Xefe Komisaun Organizadora, Fernandito Aldo Soares iha lokál UA nian, Kampus FEG (22-2).

Fernandito mós hatutan tan katak, kompetisaun ne’ebé organiza la limita estudante sira maibé haree husi sira-nia idade komesa husi tinan 18 to’o 25.

Loron aplikasaun dokumentu hahú iha 19 fevereiru 2021 submete ona dokumentu, publika naran mak iha 22 fevereiru, hodi partisipa iha faze tuir mai.

Aplikante sira ne’e mai husi eskola ensinu sekundáriu no universitáriu sira husi UNTL no universidade sira seluk iha Díli laran.

Enkuantu ba manan na’in partisipante ne’ebé okupa pozisaun I, II, no III UA sei fó sertifikadu apresiasaun husi Uma Amerika, inklui prémiu.

Média UNTL 📝: Laurindo da Cruz (estagiariu)
Foto 📷: Laurindo da Cruz (estagiariu)

Comment