- Detalhes
- Escrito por Adelaide da Cunha
- Visualizações: 540
#TimorLeste #UNTL #COVID19 #COVID19TL 18 Juñu 2021
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins MPH, Ph.D, ho nia estrutura foun hamutuk ho Dekanu Fakuldade sira aprezenta servisu ba loron 100 ida nian, iha Auditóriu Fakuldade Enjeñaria, Siénsia no Teknolójia (FECT), Hera-Díli (17/06).
“Ha’u hatene katak, buat barak ita la konsege halo iha fulan lima nia laran, tanba hafoin tomada-pose dia (29/02) liubá, to’o iha 08 Marsu 2021 ita enfrenta Konfinamentu Obrigatóriu (KO) no Serka Sanitária (SS) entaun la másimu, maske nune’e ita mós konsege halo atividade balun hanesan inskrisaun ba estudante foun, abertura online anu akadémiku 2021, Graduasaun Online no seluk tan” tenik Reitór.
Magnífiku Reitór mós hatutan, ida ne’ebé importante tebes mak realiza Graduasaun Online liuhusi desizaun ne’ebé deside halo eventu ne’e maské iha difikudade oioin maibé atividade konsege la’o ho di’ak.
Iha aprezentasaun relatóriu refere Visereitór, Proreitór, Diretór Sentru Estudus, Dekanu Fakuldade aprezenta atividade sira ne’ebé implementa ona ho nia dezafiu sira hodi aposta iha planu ba futuru.
Média UNTL : Agostinho da Cruz e Silva
Foto : Mateus Gonçalves
- Detalhes
- Escrito por Adelaide da Cunha
- Visualizações: 3418
#TimorLeste #UNTL #VRAE 18 Juñu 2021
Universidade Nacional Timor Lorosa’e (UNTL) nia Visereitora ba Asuntu Estudantís, Profesora Eng.ª Lígia Tomás Correia, M.Sc, hasoru malu ho Asosiasaun Estudante nian husi Fakuldade sira ne’ebé eziste iha universidade hodi aprezenta programa estrakurrikulár ne’ebé planeadu atu implementa iha 2021 ne’e.
“Situasaun ida hanesan ne’e iha Serka-Sanitária, ita labele halo buat barak maibé nafatin esforsu hodi realiza iha parte ne’ebé bele, iha tinan ida ne’e, tanba antes ne’e ha’u mós hasoru malu ona ho Vise-Dekanu Asuntu Estudantís hodi partilla atividade 2021 nian ba sira hodi hetan apresiasaun,” tenik Visereitora iha sala Videokonferénsia Kampus Sentrál UNTL nian, Díli (16/06).
Profesora Lígia mós aborda atividade sira liga ba área Sientífika, Arte no Kultura, Istória no Sósiu-Polítika liuhusi kompetisaun ho forma Online no Prezensiál ho modalidade hanesan, Traballu Sientífiku, Jornál Parede, Produsaun Vídeo Badak, Fotografia, Gastronomia, Diskursu Públiku, Pintura, Trio-Vokál, Poema no Mestre-Serimónia.
Reprezentante Asosiasaun Estudante nian ba Konsellu Jerál UNTL nian, Moises Magno hateten katak situasaun atuál difikuldade ba atividade prezensiál sira maibé ho esforsu bele halo netik buat ruma hodi promove estudante sira.
“Mezmu ita iha situasaun ne’ebé defísil, VRAE ho nia ekipa nafatin fó posibilidade atu ita bele realiza atividade sira ne’e, hodi promove alin estudante sira ne’ebé ho poténsia, tanba ne’e apresia ba programa sira ne’e”, tenik atuál Prezidente Asosiasaun Estudante Fakuldade Filozofia no Siénsia Umana.
Partisipa iha enkontru ne’e Elvino Correia hanesan pontu fokal ba Asosiasaun sira iha Fakuldade, Prezidente Asosiasaun Fakuldade sira ho reprezentante sira.
Média UNTL : Agostinho da Cruz e Silva
Foto : Agostinho da Cruz e Silva
- Detalhes
- Escrito por Adelaide da Cunha
- Visualizações: 3063
#TimorLeste #UNTL #COVID19 #COVID19TL 16 Juñu 2021
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins MPH, Ph.D, estabelese ekipa traballu tolu ba Elaborasaun Planu Estratéjiku UNTL 2021 to’o 2030, Elaborasaun Proposta Alterasaun Dahuluk ba Estatutu UNTL, no Preparasaun Prosesu Tranzisaun Graduál Eskola Superiór Medisina FMCS-UNTL.
Magnífiku Reitór liuhusi intervensaun iha Auditóriu Liceu UNTL nian, Díli (16/06) hato’o agradesimentu ba estrutura refere, tanba simu responsabilidade atu kontribui ba mellora liután UNTL nia misaun iha Timor-Leste.
“Agradese ba profesór sira, tantu estrutura ne’ebé simu responsabilidade atu kontribui hodi mellora UNTL nia misaun, antes ne’e maka Planu Estratéjiku 2011-2020 no ita kria fali planu foun ba 2021 to’o 2030, ne’e importante tebes ba dezenvolvimentu institusionál universidade nian”, tenik Reitór.
Reitór mós hatutan, alterasaun Estatutu nian presiza halo alterasaun tanba estatutu ne’ebé dadaun ne’e durasaun tinan sanulu ona.
“Estatutu UNTL nian tempu to’o ona atu halo revizaun tanba tinan sanulu ona, no iha kestaun jurídika balun presiza hatur ho didi’ak iha komponente hotu-hotu hodi bele funsiona legalmente”, hatutan Profesór João.
Reitór mós esplika ekipa ba preparasaun prosesu tranzisaun Gradual Eskola Superiór Medisina FMCS-UNTL mós presiza tanba atu la depende indefinidamente ba apoiu Cubano, no timoroan sira tenke asumi responsabilidade iha parte ne’ebé bele
Responsável ba Ekipa Elaborasaun Planu Estratéjiku 2021 to’o 2030, Proreitór ba Asuntu Planeamentu, Monitorizasaun no Avaliasaun, Profesór Nelson Salsinha, Ph.D, agradese knaar ne’ebé simu no nia husu ba parte hotu iha UNTL atu kontribui ba ekipa ne’e.
“Agradese ba Magnífiku Reitór ne’ebé depozita knaar ne’e, ekipa optimista atu hala’o servisu ida ne’e maibé depende totalmente ba kontribuisaun ita-nian, iha asaun ne’ebé sei implementa tuir mai”, tenik Profesór Nelson.
Elipa tolu ne’e, kompostu husi Ekipa Elaborasaun Planu Estratéjiku UNTL 2021-2030, lidera husi Profesór Nelson Salsinha Ph,D, atuál Proreitór ba Asuntu Planeamentu, Monitorizasaun no Avaliasaun.
Ekipa Elaborasaun Proposta Alterasaun Dahuluk Estatutu UNTL nian, lidera husi Profesór Tomé Xavier Jerónimo, atuál Proreitór ba Asuntu Provedoria no Akonsellamentu, no Ekipa Preparasaun Prosesu Tranzisaun Graduál Eskola Superiór Medisina FMCS-UNTL lidera husi Profesór Doutór Samuel Venâncio de Sousa Freitas, atuál Visereitór ba Asuntu Akadémiku no Garantia Kualidade.
Partisipa husi Visereitór, Proreitór sira, Diretór-Jerál no Diretór Nacionál, Xefe Departamentu, Dekanu sira Visedekanu sira, Profesór sira, Funsionáriu no Ekipa Tékniku sira.
Média UNTL : Agostinho da Cruz e Silva
Foto : Agostinho da Cruz e Silva
- Detalhes
- Escrito por Adelaide da Cunha
- Visualizações: 881
#TimorLeste #UNTL #GabCEDU #COVID19 #COVID19TL 18 Juñu 2021
Universidade Nacional Timor Lorosa’e (UNTL) nia Gabinete Sertifikasaun no Avaliasaun ba Dosente Universitáriu (GabCEDU), estabelese ona dezde novembru 2020 iha universidade ho nia knaar prinsipál tolu: Levantamentu dadus dosente, Akumulasaun kréditu, Avaliasaun dezempeñu dosente nian.
Atu aselera knaar prinsipál GabCEDU mak sei atinje objetivu sira, (1) dignifika servisu dosente hanesan ajente edukador iha ensinu superior; (2) atu halo avaliasaun bá profisionalizmu servisu dosente nian; (3) atu hasa’e kualidade iha prosesu ensinu superior nian hodi alkansa resultadu hó diak; (4) aselera prosesu hodi konkretiza objetivu jerál edukasaun nasionál nian; (5) atu konsensializa dosente sira hodi bele ezerse sira nian funsaun ho honestidade tuir etika akadémika nian.
Dezde estabelesimentu no iha fevereiru 2021 GabCEDU kompleta ona nia estrutura ne’ebé kompostu husi dosente nain (3) no funsionáriu públiku husi regime jerál nain lima (5), mak hanesan: (1) Profesór Rui da Cruz, PhD – Diretór-Jerál, (2) Profesora Zulmira Ximenes, M.Sc – Diretora Nasionál ba Dadus, Prosesu, Atribuisaun no Alokasaun Dosente, (3) Profesór Matias Tavares, PhD – Diretór Nasionál ba Avaliasaun no Sertifikassaun ba servisu dosente.
Aleinde ne’e, Sr. Felismino Sarmento Alves nu’udar Chefe do Departamento de Dados e Processo, Sr. Batista Elo - Chefe do Departamento de Atribuição de Créditos, Sr. Ermelindo Erro Bara - Chefe do Departamento de Alocação de Docentes, Sra. Saturnina Maia - Chefe do Departamento de Avaliação de Percepção e AutoAvaliação, no Sr. Jose Carlos A. de Araujo - Chefe do Departamento de Formação e Divulgação.
Dadaun ne’e, GabCEDU sei konsentra servisu ba asuntu importante tolu bazeia ba rekezitus ne´ebe hatur ona iha Dekretu Lei numeru 3/2014 maka hanesan: levantamentu dadus dosente; atribuisaun kreditu ba dosente idaidak; no avalisaun dezempeñu dosente nian.
Implementasaun ba atividade sira, ekipa GabCEDU elabora ona formatu ba avaliasaun dezempeñu dosente nian, tuir padraun ne ́ebé hatuur ona iha Dekretu-Lei, no dadaun halo hela sosializasaun, rekolla no partilla formuláriu avaliasaun dezempeñu dosente nian ba Fakuldade idaidak bazeia ba kalendáriu.
Média UNTL
Foto : Agostinho da Cruz e Silva & GabCEDU
- Detalhes
- Escrito por Adelaide da Cunha
- Visualizações: 641
#TimorLeste #UNTL #DNRH #COVID19 #COVID19TL 16 Juñu 2021
Bazeia ba avizu husi Diresaun Nasional Rekursu Umanu-Universidade Nacional Timor Lorosa’e (DNRH-UNTL), husu ba kandidatu sira ne’ebé admitidu iha faze seleksaun dokumentus, atu bele mai tuir ezame oral ka entrevista ne’ebé sei realiza iha loron, 23 to’o 25 fulan Juñu 2021.
Avizu kompletu bele hare iha dokumentu aneksu ka liga direta ba DNRH-UNTL.
Média UNTL