- Detalhes
- Escrito por Mateus Goncalves
- Visualizações: 4029
#TimorLeste #UNTL #FMCS 1 Setembru 2020
Universidade Nacional Timor Lorosa’e (UNTL) nia Fakuldade Medisina Siénsia Saúde (FMCS) realiza judisium hodi atribui títulu lisensitura nian ba estudante na’in tolunulu resin lima (35) ne’ebé preparadu ba graduasaun, no iha tempu hanesan hala’o mós juramentu profisionál.
Dekanu FMCS nian, Profesór José Deonisio Ximenes, hateten katak estudante ne’ebé simu ona judisium no juramentu profisionál, Fakuldade sei entrega sira-nia naran ho lista ofisiál ida Ministériu Saúde hodi koloka hanesan rekursu profisionál iha área ne’ebé presiza.
“Ami koordena ona hodi entrega sira ba Ministériu Saúde, nune’e, ba futuru, atu akumula sira hanesan profisionál, tau iha fatin servisu tuir prioridade sira hodi fó atendimentu ba komunidade iha Timor-Leste”, tenik Dekanu FMCS iha Salaun Luz Clarita, Díli.
Dekanu ne’e mós husu ba sira na’in 35 ne’ebé preparadu ba graduasaun iha períodu ne’e katak, idaidak nafatin iha vontade atu kontinua aprende hodi demonstra sira idaidak nia profisionalizmu hodi serbí povu.
Iha fatin hanesan, reprezentante Ministériu Saúde nian, Diretór-Jerál Servisu Koorporativu, Sr. Victor Soares Martins, hato’o parabéns ba estrutura Fakuldade nian nomós ba finalista sira ne’ebé ofisialmente simu ona sira-nia títulu akadémiku husi universidade liuhusi juramentu profisionál.
“Ministériu Saúde nia servisu hamutuk ho UNTL importante tanba universidade nasionál prodús rekursu kualifikadu no ba oin sei hatuur iha planu hodi rekruta no koloka iha sentru saúde sira iha territóriu tomak”, hatutan Diretór-Jerál Servisu Koorporativu.
Entretantu, iha judisium refere estudante ne’ebé simu ona títulu lisensitura husi FMCS, Letícia Jomardo da Costa Soares, hateten, siénsia ne’ebé nia aprende ona iha Univerisdade Nasionál, kompromete aplika iha sosiedade.
“Ita hotu hatene katak problema mal nutrisaun ne’ebé aas tebes iha Timor-Leste, nune’e siénsia ne’ebé ha’u iha, sei kontribui ba redusaun mal-nutrisaun no ajuda komunidade moris ho saudável,” tenik Letícia.
Estudante na’in 35 ne’e kompostu husi Departamentu Farmásia na’in 22 no Departamentu Nutrisaun i Dietétika hamutuk na’in 13.
Partisipa iha judisium ne’e, Proreitór Kooperasaun, Profesór Doutór Eduardo Aniceto Serrão, Diretór Nasional Atendimentu Estudante, Sr. Rui Loco Pires, reprezentante Ministériu Saúde nian, reprezentante Brigada Médika Cubana nian, reprezentante husi Ospitál Nasionál Guido Valadares (HNGV), estrutura Fakuldade, dosente, estudante no konvidadu sira.
Média UNTL 📝: Santidade Marinela Ribeiro (estajiária), Jacob Pinto Guterres (estajiáriu)
Foto 📷: Jacob Pinto Guterres (estajiáriu)
- Detalhes
- Escrito por Mateus Goncalves
- Visualizações: 1724
#TimorLeste #UNTL #FMCS 1 Setembru 2020
Universidade Nacional Timor Lorosa’e (UNTL), nia Fakuldade Medisina i Siénsia Saúde (FMCS) 👩⚕️ 👨⚕️ realiza debate ho tema “Liuhusi Peskiza no Debate Siéntifiku Mak Bele Dezenvolve Di’ak Liután Siénsia iha Timor-Leste” 🇹🇱, hodi komemora tinan 21 Konsulta Populár (30 agostu 1999-2020), ne’ebé partisipa husi estudante sira fakuldade nian, iha Salaun Ian Martin, INFORDEPE, Balide, Díli, (28/08).
Vise-Dekana Asuntu Estudantíl FMSS nian, Profesora Meriana Barreto Amaral, iha nia diskursu apresia ho Asosiasaun Akadémiku Estudantil (AAE) ne’ebé organiza debate refere tanba bele promove estudante sira-nia talentu no aumenta kapasidade, hodi prepara sira ba idaidak nia futuru.
“Lori Fakuldade nia naran, apresia ho AAE-FMCS nian ne’ebé organiza debate sientífiku ida ne’e, tanba importante hanesan atividade estrakurikular ne’ebé bele promove estudante sira-nia talentu no haklean sira-nia koñesimentu ba iha peskiza, hakerek no debate sientífiku sira”, tenik Profesora Meriana.
Vise-Dekana ne’e mós salienta katak, estuda área saúde nian la’os aprende deit siénsia, maibé mós aprende ho meiu peskiza, debate, atu bele kontribui ba universidade sai exelénsia iha Timor-Leste.
Entretantu, Indofonso Lucio Belo nu’udar debatedór hateten katak, atividade debate refere importante ba sira hanesan akadémiku, hodi bele haklean no hasae sira nia koñesimentu, nomós prepara sira-nia mentalidade atu bele hamriik iha oin hodi hato’o opiniaun ruma.
“Liuhusi atividade sira ne’e, hanesan oportunidade ida, bele eleva ita-nia koñesimentu no prepara ita nia mentalidade atu bele hamrik iha palku akadémiku nian hodi hato’o ita nia hanoin ruma”, tenik Indofonso.
Painel júri ba debate ne’e mak, Asesora Rekursu Umanu Ministériu Saúde nian, Sra. Norberta Belo, Diretór Servisu Autónomo Medikamentus i Ekipamentus Saúde (SAMES) nian, Dr. Abílio Gusmão, no Sr. Vitór Soares, Dosente husi Fakuldade Siénsia Sosiál (FCS).
Atividade ne’e hetan partisipasaun másimu husi dosente no estudante sira FMCS nian. Enkuantu manan nain dahuluk husi Departamentu Siénsia Biomédika i Laboratoriais, daruak husi Departamentu Medisina Jerál, no datoluk nian husi Departamentu Enfermagem.
Média UNTL 📝 : Ines da Costa Rosignani (estajiária)
Foto 📷 : Humberto Alves (estajiáriu)
- Detalhes
- Escrito por Mateus Goncalves
- Visualizações: 1439
,
,
.- Detalhes
- Escrito por Mateus Goncalves
- Visualizações: 2070
#TimorLeste #UNTL #FCE 1 Setembru 2020
Universidade Nacional Timor Lorosa’e (UNTL), nia Fakuldade Siénsia Ezata (FCE) ne’ebé funda iha 2015, no iha 2020 marka istória Fakuldade nian liuhusi atribuisaun títulu akadémiku ho nível lisensiatura 🎓 ba estudante na’in haat liuhusi serimónia judisium ne’ebé hala’o iha Salaun Ian Martin, INFORDEPE, Balide Díli (28/8).
Estudante na’in haat ne’e maka dahuluk konsege alkansa rekizitu hotu graduasaun nian, hanesan 👨🔬 Wilibrodus Usfinit, 👩🔬 Joana Ximenes Belo, 👩🔬 Claudina Angela Pereira no 👩🔬 Avenancia Tavares Belo de Carvalho. Sira na’in haat ho abilitasaun iha Siénsia Matemátika, Kímika, Físika inklui domíniu iha dalen portugés.
Proreitór ba Asuntu Akadémiku (PRAAK), Profesór Miguel Maia dos Santos, hateten katak, universidade sente onradu no felisita susesu estrutura tomak Fakuldade nian tanba konsege prodús graduadu na’in haat ba Timor-Leste.
“Universidade sente onra ida bele partsisipa hodi fó parabéns ba estrutura tomak Fakuldade nian, ne’ebé lidera husi Profesór Doutór Samuel Venancio Freitas no dezeja kualifikadu sira hodi prontu sai sujeitu ba dezenvolvimentu nasionál nomós sai sujeitu ba edukasaun iha área siénsia ezata”, tenik Profesór Maia.
Iha fatin hanesan Vise-Dekanu Asuntu Akadémiku FCE nian, Profesór Romualdo Lopes da Cruz, ho konfiansa katak, liuhusi teoria no prátika laboratóriu ne’ebé estudante sira aprende iha FCE, natoon ona ba sira atu aplika iha sosiedade nia leet.
“Ami espera liuhusi teória no prátika laboratóriu ne’ebé sira aprende iha ne’e ba nível lisensiatura nian, natoon ona atu bele kontribui ba desenvolvimentu iha área indústria nian”, hatutan Professór Romualdo.
Entretantu, finalista Wilibrodus Usfinit hateten katak durante tinan lima aprende iha universidade nia prontu atu aplika siénsia liuhusi prátika iha sosiedade.
“Ho buat hotu ne’ebé mak hau aprende durante tinan lima ho koñesementu básiku ba siénsia no prátika, ho esperansa no deseju katak ho ami nia prezensa bele fó valor hodi eleva koñesimentu sosiedade sira ba iha siénsia Matemátika, Kímika no Fízika”, dehan Wilibrodus.
Serimónia judisium ba dahuluk iha FCE ne’e partisipa husi Proreitór ba Asuntu Akadémiku, Profesór Miguel Maia dos Santos, Dekanu FCE ho nia estrutura Fakuldade nian, Diretór Ezekutivu ANAAA nian, Profesór Doutór Edmundo Viegas, dosente, reprezentante familia, estudante no konvidadu sira.
Média UNTL 📝 : Zita Menezes (estajiária)
Foto 📷 : Jeraldino Magno (estajiáriu)no Arkivu FCE
- Detalhes
- Escrito por Mateus Goncalves
- Visualizações: 1207
: Mateus Gonçalves
: Mateus Gonçalves