- Detalhes
- Visualizações: 732
#TimorLeste #UNTL #FAGRI #COVID19 #COVID19 26 Maiu 2022
Universidade Nacional Timor-Lorosa’e (UNTL) nia Fakuldade Agrikultura (FAGRI) hala’o Judisium ba XXVI ho tema ‘’Ho Siénsia ne’ebé Klean Bele Garantia Dezenvolvimentu Agrikultura ba Autosufisiénsia Seguransa Alimentár no Bem-Estar Nasionál’’ ba estudante nain lima nulu resin hitu (57), Iha Salaun Delta Nova nian, Díli (26/05).
Magnífiku Reitór, Profesór dr. João Soares Martins, MPH, PhD, iha diskursu hato’o parabéns ba finalista sira no inan-aman sira-nia esforsu, sakrifísiu hodi ajuda oan sira ba eskola iha universidade, kongratura mós profesór sira-nia dedikasaun.
“Hau-nia mensajen ba estudante sira depois judisium, hein graduasaun hotu fila ba sosiedade, hodi forma grupu nune’e bele dezenvolve setór agrikultura ne’ebé di’ak iha sosiedade, espera ita boot sira servisu la’ós atu selu fali inan-anan nia osan maibé prodús referénsia ne’ebé di’ak iha nasaun”, dehan Reitór.
Iha fatin hanesan, Vise-Ministru Agrikultura no Peskas, S. E. Abilio Xavier Araújo, hateten, finalista sira marka istória foun ida atu bele halo subtituisaun ba lider sira ne’ebé ukun hela iha futuru.
‘’Ha’u agradese ba UNTL ne’ebé konvida hodi marka prezensa iha serimónia ne’e, ita haree finalista sira-nia inan-aman ne’ebé hasoru desafiu barak maibé hakat ho dezafiu oin-oin tanba lafasil estuda iha UNTL no susar mós atu gradua, maibé ohin sira konsege’’, hatutan Vise-Ministru.
Iha fatin hanesan, Dekanu FAGRI nian, Profesór Vicente de Paulo Correia, Ph.D agradese ba família sira tanba fó fiar ba Fakuldade hakat tan pasu ida hodi prodús estudante 57, espera sira bele kontribui fisikamente ba dezenvolvimentu iha setór agrikultura. 
“Hau hanoin ita bele ultrapasa objetivu sira ne’e, balu ita provoka mudansa ohin ita-nia finalista sira hetan ona títulu akadémiku, ida ne’e susesu bo’ot ida ba família, tanba konta ho inan-aman sira-nia esforsu hodi buka osan iha objetivu ida de’it atu avansa ita boot sira-nia estudu’’, orgullu Dekanu.
Dekanu ne’e mós husu ba finalista na’in 57 ne’e atu kontinua aprende no hatudu nafatin matenek no komportamentu di’ak iha prosesu ne’ebé sei hasoru iha tempu tuir mai.
Abelita da Silva Amaral Pinto, finalista husi departementu Agro-Sosiu-Ekonomia agradese ba estrutura universidade nian, dosente, funsionariu, no família ne'ebé dedika no motiva sira to’o loron ohin.
“Ami hakarak hato’o parabéns no obrigadu barak ba UNTL nia estrutura tomak no ba dosente sira, pai, mãe, familia hotu nia esforsu hodi ohin loron ami termina ami-nia estudu ne’e ho susesu’’, agradese. 
Média UNTL 📝: Geraldino Pereira Magno (estajiáriu)
Foto 📷: Laurindo da Cruz Gomes
- Detalhes
- Visualizações: 2529
#TimorLeste #UNTL #IDN #COVID19#COVID19 25 Maiu 2022
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH, Ph.D, enkontru ho Diretór Institutu Defeza Nasionál (IDN), Profesór Doutór Donaciano Costa Gomes, hodi diskute estabelese programa mestradu iha área Seguransa no Defeza Nasionál.
“Agradese ba Diretór IDN, disponível vizita universidade, relasiona ho karta ne’ebé ami simu tiha ona, ne’ebé mensiona brevemente atu kooperasaun ho UNTL, espesifíku liu kona-ba iha posibilidade atu bele haree kursu mestradu nian, iha área defeza no seguransa”, hateten Magnífiku Reitór, iha sala Video Konferénsia UNTL nian, Díli (25/5).
Diretór IDN nian hatete, nia instituisaun ho UNTL estabelese MoU, dezde Ex-Reitór Profesór Doutór Aurélio Guterres nia mandatu, agradese ba Magnífiku Reitór atuál ho estrutura tomak ba disponibilidade hodi hato’o hanoin balu kona-ba kursu ne’ebé atu dezenvolve.
“Hanoin ba sustentabilidade nasaun nian, ita hotu preokupa no bele kompleta malu, IDN prezisa kualifikasaun akadémika ne’ebé nesesáriu ba siklu formasaun nian, espesializasaun ne’ebé ami propoin kontinuasaun ba Pós-Graduasaun Seguransa no Defeza ohin hakarak partilla ba ita bo'ot sira, iha dimensaun ida ne’e, bele kompleta mós ami-nia projetu”, esklarese Diretór.
Reuniaun refere partisipa husi Visereitór no Proreitór sira, inklui ekipa tékniku husi Institutu Defeza Nasionál no konvidadu sira.
Média UNTL 📝: Altur Ramos
Foto 📷: Altur Ramos
- Detalhes
- Visualizações: 687
#TimorLeste #Portugal #EmbaixadaPortugalTimorLeste #MEJD #COVID19 #COVID19TL 21 Maiu 2022
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH. Ph.D, ho estrutura no Sívitas Akadémika simu vizita Prezidente Repúblika Portugál, Profesór Doutór Marcelo Rebelo de Sousa iha Kampus Sentrál, UNTL, (21/05).
Magnífiku Reitór hateten Universidade Nasionál ho onra bo’ot bele hetan vizita husi Prezidente Repúblika Portugál hodi haree besik kondisaun durante tinan ruanulu resin rua (22) ezisténsia universidade nian.
“Ohin hanesan honra bo’ot, tanba simu vizita husi ita-nia amigu Prezidente Repúblika Portugal nian, Profesór Marcelo Rebelo de Sousa, mai UNTL no bainhira ha’u rona komfirmasaun husi Prezidente ne’e ha’u iha ona serteza, tanba Profesór Marcelo mós hanesan Profesór ida iha Universidade antes ba Prezidente”, tenik Reitór.
Reitór mós agradese ba partisipasaun estudante sira nian, hodi konversa ho Prezidente relasiona ho sira-nia estudu liuliu estudante husi Fakuldade Direitu no Departamentu Ensinu Língua Portugeza, Fakuldade Edukasaun, Arte no Umanidade.
Prezidente Repúblika Portugál liuhusi diskursu hateten Timor-Leste hanesan nasaun joven, iha universidade rasik, ne’e fó esperansa ba povu iha futuru no iha universidade mak marka vida joven sira-nian.
“Hanesan nasaun joven iha universidade rasik, ne’e fatór esperansa ba nia povu iha futuru, aleinde estudante, ha’u mós hau nia saudasaun ba kolega profesores sira tanba laiha universidade ida mak laiha estudante no laiha universidade ida mak laiha profesór, no joven barak mak ita marka vida moris iha universidade”, tenik Prezidente.
Prezidente Portugal ne’e mos hatutan iha Portugál nia koñese estudante Timoroan barak mak preparadu liu no hatudu sira-nia kualidade, maibé tenki hanoin kolaborasaun ho universidade sira iha Portugal.
Akompaña vizita ne’e Ministru Negósiu Estranjeiru Portugál nian, S.E. João Gomes Cravinho, ho nia ekipa, Ministru Edukasaun, Juventude no Desportu (MEJD), S.E. Dr. Armindo Maia, Visereitór, Proreitór, Diretór-Jerál Dekanu no estudante inklui konvivadu sira. 
Média UNTL 📝: Agostinho da Cruz e Silva
Foto 📷: Laurindo da Cruz Gomes
- Detalhes
- Visualizações: 654
#TimorLeste #UNTL #g7+ #COVID19 #COVID19TL 23 Maiu 2022
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH. Ph.D, hamutuk ho S.E. Prezidente Repúblika, Dr. José Manuel Ramos-Horta, no Sekretáriu Jerál g7+, Dr. Helder da Costa, halo abertura ba Konferénsia Internasionál ho tema “Timor Leste : Two Decades of Peacebuilding and Statebuilding: Challenges and Opportunities” iha Auditóriu Fakuldade Enjeñaria, Siénsia no Teknolojia (FECT), Hera, Díli (23/05).
‘’Eventu ne'e realiza tanba servisu hamutuk UNTL ho g7+, no ita espera orsida oradór sira sei hato’o sira nia perspetiva, dezafiu sira ne'ebé ita atravesa ona kona-ba konflitu no pós-konflitu, agora ita tama ona iha paz ba sosiedade, estadu no nasaun", hateten Magnífiku Reitór liuhusi entrevista.
Magnífiku Reitór mós espera katak konflitu foun sei la akontese hanesan krize 2006, esperiénsia sira ne’e bele fahe ho nasaun sira seluk liuliu nasaun membru g7+ nian, hodi aprende iha esperénsia sira atu hadia diak liu ba futuru.
Iha fatin hanesan, S.E. Prezidente Repúblika, Dr. José Manuel Ramos-Horta, hatete, susesu boot ba independénsia tinan 20, dalan di'ak mak rekonsiliasaun maibé la haluha eroi sira no labele husik buat aat sira mak domina iha tempu atuál.
‘’Ha'u hakarak haree de'it oinsa ita nia ekonomia ba oin, redús ki'ak, seguransa, no edukasaun sira la'o diak, ne'e mak ha'u-nia preokupasaun no ha'u sei ko'alia ho politíku no parseiru sira hotu hodi hadia joven sira-nia moris di'ak liután’’, tenik Prezidente RDTL. 
Iha fatin hanesan, Sekretáriu Jerál g7+ nian, Dr. Helder da Costa, hatete tempu to'o ona atu bolu oradór nasionál no internasionál sira halo reflesaun, halo balansu ba trajetória dezenvolvimentu nian, durante tinan 20 saída mak aprende ona atu aplika iha futuru.
‘’Objetivu husi konferénsia ne'e atu ita fahe esperiénsia ba malu, nune’e bele haree ba Timor-Leste nia lisaun saída mak bele partilla ho nasaun seluk, tanba ne’e mak ohin ita haree parseiru internasionál barak mai, Embaixadór sira, entidade sira hodi deskute asuntu rua: Trajetória Sosiu-Ekonómiku no Pozisionamentu Timor-Leste iha mundu internasionál", dehan Dr. Helder. 
Média UNTL 📝: Laurindo da Cruz Gomes
Foto 📷: Altur Ramos
- Detalhes
- Visualizações: 724
#TimorLeste #UNTL #FFCH #HatuliaErmera #COVID19 #COVID19TL 19 Maiu 2022
Universidade Nacional Timor Lorosa’e (UNTL), nia Magnífiku Reitór Profesór dr. João Soares Martins, MPH,Ph.D, halo abertura ba semináriu ho tema "Prosesu Libertasaun Pátria no Povu liuhusi Edukasaun ba Dezenvolvimentu Tinan Ruanulu (20) Restaurasaun Independénsia iha Timor-Leste”, iha salaun Parokia São Francisco Xavier Hatulia, Ermera (18/05).
Iha abertura ne’e, Magnífiku Reitór hateten eventu refere interesante tebes atu reflete independénsia Timor-Leste nian, ba dala ruanulu, husu ba alin estudante sira tenki eskola no estuda tanba edukasaun importante no hola parte integrál husi ema nia moris.
“Agradese ba Komisaun Organizadora, ne’ebé ho inisiativa hodi realiza semináriu ne’e, hodi komemora loron Restaurasaun Independénsia, nune’e, jerasaun foun no estudante sira bele hatene liután kona-ba istória Timor nian”, agradese Reitór.
Iha fatin hanesan representante Amu Pároku, Pe. Vigáriu Domingos Godinho hatete, agradese ba Reitór ho ekipa liuhusi pensamentu akadémiku nian, bele fahe ona ba estudante sira tanba estudante mak futuru nasaun nian.
“Ita hein katak liuhusi pensamentu akadémiku nian ne’ebé ita kuda ohin loron, sei kuu iha tinan sanulu oin mai nomós sai nu’udar bukae ida ba estudante sira iha futuru”, hatutan Pe.Vigáriu.
Partisipa iha semináriu ne’e, Diretór-Jerál Servisu Apoiu Reitoria, Sr. Jacinto H. S. Belo, Dekanu Fakuldade Filozofia no Siénsia Umana (FFCH), Profesór Martinho Boromeu, Komandante Eskuadra Postu Administrativu Hatulia, Sr. Fausto Talo, Inspetór Eskolar Postu Hatulia, Sr. Virgilio de Araújo, Autoridade Lokal, Profesór sira, Madre, Frater no estudante sira.
Média UNTL 📝: Denilson Amandio Barros
Foto 📷: Denilson Amandio Barros