Universidade Nacional Timor Lorosa’e (UNTL) nia Magnífiku Reitór Profesór dr. João Soares Martins MPH, Ph.D ho Ministru Ensinu Superior Siénsia no Kultura (MESCC), S.E. José Honório da Costa Pereira Jerónimo tau fatuk dahuluk ba konstrusaun edifísiu foun laboratóriu integradu no edifísiu ba Faculdade de Ciências Exatas (FCE) nian, iha Hera, Díli (10/12).
Reitór UNTL hatete, universidade tau importánsia ba FCE, tanba importante tebes ba Dezenvolvimentu teknólojia Timor-Leste iha futuru ne’ebé kompetitivu.
“Ohin ita halo lansamentu ka tau fatuk dahuluk ba edifísiu Faculadade de Ciências Exatas no laboratóriu integradu, ha’u tau importánsia ba FCE, tanba nia ezisténsia importante tebes ba nasaun nia futuru no ita mós bele iha inovasaun ne’ebé kompetitivu, liga ho siénsia teknolojia ba área siénsia bázika, enjeñaria no seluk tan”, hatete Reitór.
Reitór mos agradese ba Governu bele aprova proposta hodi konstrui edifísiu refere no husu ba kompaña atu servisu tuir kalendáriu ne’ebé marka ona.
Iha fatin hanesan Ministru Ensinu Superior Siénsia no Kultura, S.E. José Honório hatete, projetu ne’e investimentu ida husi IX Governu Konstitusional, nune’e ba oin la’os UNTL de’it mak Utiliza maibé ba Instituisaun seluk ne’ebé bainihira iha nesesidade bele uza.
“Ha’u hanoin ida-ne’e parte ida Governu hakarak investe, nune’e ba oin la’os UNTL de’it, maibé karik ministériu balun ne’ebé bele mós asesu, ne’e kompromísiu IX Governu nian hakarak apoiu. Ha’u mós hakarak agradese ba kompañia bele disponivel hodi responsabiliza ba obra ida-ne’e, hanesan ohin reitór dehan projetu barak la’o maibé kleur tanba ne’e konstrusaun ida-ne’e tenki la’o tuir ninia tempu”, hatete Ministru.
Diretora Kompaña Cabitama Unip. Lda. Sra. Amelia de Jesus Pereira hatete, kompañia hetan ona fiar husi UNTL, tanba ne’e nia fiar katak tékniku sei servisu tuir durasaun no dezeñu ne’ebé mak iha.
“Ba kompañia nia iha responsabilidade tomak, ne’ebé hetan ona fiar husi UNTL atu responsavel ba projetu ida-ne’e, ha’u-nia tékniku servisu tuir prosesu ne’ebé UNTL fó bazeia kalendáriu no dezeñu ne’ebé iha”, hatete Diretór Kompaña Cabitama.
Edifísiu ne’e ho nia luan metru 25 X Metru 23, andar tolu no durasaun ba konstrusaun durante tinan ida.
Partisipa iha lansamentu ne’e Sekretariu Estadu Terras Propriedade S.E. Jaime Xavier, Vise-Reitór, Pro-Reitór, Dekanu, dosente no asosiasaun husi FCE no konvidadu sira.
Média UNTL 
: Agostinho da Cruz
: Agostinho da CruzFoto
: Ekipa DEMCOM
: Ekipa DEMCOM