- Detalhes
- Escrito por Adelaide da Cunha
- Visualizações: 624
#TimorLeste #UNTL #RTTLEP 26 Maiu 2021
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins MPH, Ph.D, ho Prezidente Konsellu Administrasaun Rádio Televizaun Timor-Leste, (RTTL,ep), Sr. José António Belo, Asina Nota Kooperasaun (MoU) hodi kontinua servisu hamutuk ba futuru.
“MoU ne’e marka momentu oportunu ida atu fasilita servisu hamutuk entre instituisaun rua, atu habelar atividade akadémika, peskiza, no servisu komunitária universidade nian ba públiku liuliu komunidade ne’ebé presiza informasaun”, tenik Profesór João iha Salaun Ian Martin INFORDEPE Balide, Díli (25-05).
Reitór hatutan hafoin asina tiha nota kooperasaun, ba oin sei buka atu diskute asuntu tékniku sira ne’ebé aposta ona iha nota refere.
Prezidente Konsellu Administrasaun Rádio Televizaun Timor-Leste, (RTTL,EP), mós destaka importánsia servisu hamutuk ho UNTL tanba universidade públika atu kontinua di’ak liután kooperasaun ne’ebé antes ne’e iha ona.
“Memorandum ne’e, faze inísiu ida atu kontinua filafali kooperasaun ne’ebé iha ona, tanba ami mehi atu profisionaliza RTTL,EP liuliu kestaun rekursu umanu, maibé ami sei iha tan faze diskusaun tékniku atu haree posibilidade sira”, hatutan.
Sr. José Belo mós salienta tan katak iha kooperasaun refere, sei implementa programa ida hanaran “RTTL,EP goes to Campus”, atu oferese espasu ba Sívitas Akadémika universidade nian.
“Liuhusi programa RTTL,EP goes to Campus ne’e, sei envolve Sívitas Akadémika UNTL nian atu partisipa iha debate, no trasmisaun direta, ne’e tanba ami mós orgullu ho kualidade ne’ebé universidade nasionál iha”, tenik.
Eventu ne’e realiza iha ámbitu Graduasaun Online Dahuluk UNTL nian, no Partisipa husi Prezidente Komisaun G Parlamentu Nasionál, S.E. Deputado António Verdial, Ministru Ensinu Superiór, Siénsia no Kultura (MESSK), S.E. Longuinhos dos Santos, Reprezentante Prezidente Konsellu Jerál UNTL, atuál Diretora Jerál Ensinu Superiór, Dra Maria Filomena Lay Guterres.
Aleinde ne’e, partisipa mós husi Diretór Ezekutivu ANAAA, Profesór Dr. Edmundo Viegas, Prezidente Konsellu Administrasaun RTTL,EP, Sr. José António Belo, Prezidente Konsellu Administrasaun ANE,IP, Profesór Dr. Ruben Jerónimo Freitas, Estrutura UNTL nian, Graduandu no konvidadu sira.
Média UNTL : Miguel Gonçalves
Foto : Agostinho da Cruz e Silva
- Detalhes
- Escrito por Adelaide da Cunha
- Visualizações: 588
#TimorLeste #UNTL #VRAAGK #DNIT #RTTLEP #Telkomsel 25 Maiu 2021
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins MPH, Ph.D, mak prezide Serimónia Solene Graduasaun XXIV liu husi online ba graduandu na’in atus rua limanulu resin ida (251) , ne’ebé transmite husi Salaun Ian Martin INFORDEPE Balide, Díli (25-05) .
“Graduasaun ne’e, marka istória ba universidade nomós Timor-Leste tanba ho forma online no live streaming, iha ámbitu pandemia COVID-19, maibé universidade la abandona nia responsabilidade hodi buka eskolla ba realizasaun eventu ida ne’e, graduasaun ba resén-graduadu na’in 251”, tenik Profesór João.
Reitór mós hato’o ba graduandu sira katak hafoin esforsu oioin liuhusi estudu iha universidade nasionál no luta hamutuk ho idaidak nia família, no graduasaun eventu espesiál, alegria ho susesu ne’ebé atinje ona.
“Ohin loron ne’ebé totalmente imi-nian, no susesu ba família, tanba graduasaun ne’e, momentu ne’ebé universidade entrega hikas imi ba família, sosiedade hodi partisipa iha dezenvolvimentu nasionál nian tuir área idaidak ne’ebé imi estuda”, hatutan.
Magnífiku Reitór mós agradese ba dosente, funsionáriu no família ne’ebé dedika ona ba resen-graduadu sira-nia estudu, no agradese mós ba RTTL,EP, Telkomcel, inklui ekipa Komisaun Koordenara ba Graduasaun inklui VRAAGK, VRAE, DJSAA, DJSAR, DNIT, Media, Protokolu, CCDAC nomós Lojístika.
Iha fatin hanesan, Ministru Ensinu Superiór, Siénsia no Kultura (MESSK), S.E. Longuinhos dos Santos, agradese ba estrutura universidade nasionál nian ne’ebé konsege buka solusaun alternativa liuhusi graduasaun online.
“Ha’u mós hato’o felisitasaun ba susesu tomak ne’ebé ohin família no graduadu idaidak hetan hodi kontinua dezenpeña papel ho profisionál, la haluhan mós kongratula ba UNTL hanesan instituisaun públika ba formasaun umana nian, no konta mós servisu ekipa tomak nian”, felisita Ministru.
Enkuantu Nivia de Pina Sarmento Seran hato’o agradese ba estrutura universidade nian, ne’ebé prepara ona profesór sira ne’ebé dedika ona tempu hodi fahe koñesimentu ba sira idaidak durante estudu.
“Sakrifísiu no dedikasaun husi funsionáriu dosente no inan-aman, mai ami hanesan fonte ida hodi hatutan mehi ne’ebé hein durante ne’e, to’o susesu liuhusi graduasaun ida ne’e, no ami sei buka habelar no aprende liután atu kontribui ba Rai Doben Timor-Leste”, dehan Resen-graduada.
Eventu ne’e hato’o husi salaun Ian Martin INFORDEPE Balide, Díli, liuhusi servisu hamutuk entre UNTL-RTTL.E.P no Telkomcel hodi transmite graduasaun ba públiku, iha loron 25 Maiu 2021.
Graduandu na’in 251 ne’e kompostu husi fakuldade 5, Fakuldade Enjeñaria, Siénsia no Teknolojia (34), Fakuldade Edukasaun, Arte no Umanidade (71), Fakuldade Medisina no Siénsia Saúde (94), Fakuldade Ekonomia no Jestaun (17) no Fakuldade Siénsia Sosiál (35), entretantu graduandu husi Fakuldade Agrikultura ho Fakuldade Filozofia no Siénsia Umana sei partisipa iha graduasaun prezensiál sei wainhira Serka Sanitária remata.
Partisipa husi Prezidente Komisaun G Parlamentu Nasionál, S.E. Deputado António Verdial, Ministru Ensinu Superiór, Siénsia no Kultura (MESSK), S.E. Longuinhos dos Santos, Reprezentante Prezidente Konsellu Jerál UNTL, atuál Diretora Jerál Ensinu Superiór, Dra Maria Fernanda Lay Guterres, Diretór Ezekutivu ANAAA, Profesór Dr. Edmundo Viegas, Prezidente Konsellu Administrasaun RTTL,EP, Sr. José António Belo, Prezidente Konsellu Administrasaun ANE,IP, Profesór Dr. Ruben Jerónimo Freitas, Estrutura UNTL nian, Graduadu no konvidadu sira.
Média UNTL : Miguel Gonçalves
Foto : Agostinho da Cruz e Silva & Arkivu Graduandu 2021
- Detalhes
- Escrito por Adelaide da Cunha
- Visualizações: 1155
#TimorLeste #UNTL #KIPKI #SIJK 22 Maiu 2021
Universidade Nacional Timor Lorosa’e (UNTL) liuhusi Komisaun Implementasaun Planu Kontijénsia Interna (KIPKI)-UNTL, ne’ebé lidera husi dra. Teresa A. Madeira Soares, BDS, MPH, servisu hamutuk ho Sentru Integradu Jestaun Krize (SIJK), realiza tan vasinasaun AstraZeneca ba grupu daruak nian, ba Sívitas Akadémika UNTL nian na’in 272, iha Kampus Sentrál UNTL nian, Díli (22/05).
Koordenadora KIPKI-UNTL, dra. Teresa A. Madeira Soares, BDS, MPH, hateten, loke tan vasina ba grupu segundu, ba Sívitas Akadémika tomak ne’ebé hamahan an iha universidade nasionál.
“Ohin ita hala’o tan vasina ba ita-nia Sívitas Akadémika ba grupu segundu nian, no faze primeiru nian ita hetan 196 no ohin ita hetan tan 272 mai husi estudante, dosente no funsionáriu tomak”, tenik atuál Diretora Poliklínika Universitáriu ne'e.
Diretora ne’e mós hatutan, loloos ne’e estudante sira mai barak maibé tanba transporte laiha ba sira atu bele mai tuir vasina nomós barak fila ona ba ida-idak nia munisípiu.
Vasina ba grupu segundu nian ne’e hetan partisipasaun husi estrutura universidade, dosente , funsionáriu no estudante sira.
Média UNTL : Agostinho da Cruz e Silva
Foto : Agostinho da Cruz e Silva
- Detalhes
- Escrito por Adelaide da Cunha
- Visualizações: 1347
#TimorLeste #UNTL 24 Maiu 2021
Serimónia Graduasaun Online Dahuluk iha Universidade Nacional Timor Lorosa’e (UNTL) sei realiza aban, loron-Tersa, 25-05-2021, hahú husi tuku 09:55 dadeer to’o remata.
Membru Sívitas Akadémika, família no kolega sira bele akompaña Serimónia Graduasaun Online ne’e liuhosi televizaun, kanál RTTL, no mós liuhosi live stream iha pájina Facebook UNTL (Universidade Nacional Timor Lorosa'e) no RTTL nian (https://web.facebook.com/RTTL-LIVE-370048750482193/?_rdc=1&_rdr).
Reitoria UNTL
- Detalhes
- Escrito por Adelaide da Cunha
- Visualizações: 685
#TimorLeste #UNTL #VRAAGK #DNIT 22 Maiu 2021
Universidade Nacional Timor Lorosa’e (UNTL) nia Visereitór ba Asuntu Akadémiku no Garantia Kualidade (VRAAGK) Profesór Doutór Samuel Venâncio de Sousa Freitas, iha Kampus Sentrál UNTL nian, Díli (21/05) hateten graduandu hamutuk 251 prontu ona atu partisipa iha graduasaun online, iha loron 25 fulan Maiu 2021.
“Ita desidi graduasaun online ba iha 25 Maiu 2021 komesa tuku 9:55 dadeer to’o remata, ita sei halo ensaiu kona-ba distansiamentu ba estrutura sira ne’ebé sei partisipa direta, no graduandu sira liuhusi aplikasaun ne’ebé uza ba serimónia solene ne’e”, tenik Profesór Samuel.
Profesór Samuel mós husu ba graduandu sira atu hatais toga kompletu ne’ebé sira foti ona iha parte Diresaun Nasional Atendementu Estudante (DNAE) hamutuk ho família partisipa liuhusi via Zoom.
Iha fatin hanesan, Diretór-Jerál ba Servisu Administrasaun Akadémika, Sr. Armindo Leto Fátima, hateten, ekipa tékniku nia preparasaun halo ona rejista ba graduandu hamutuk na’in 251 mak prontu atu partisipa graduasaun online.
“Durante pedidu ne’e tama atu halo graduasaun online to’o husi parte akadémika rejista ona graduandu hamutuk na’in 251 na’in 241 mak mai foti ona toga ba graduasaun nian” tenik DJ Akadémika.
Sr. Leto mós hatutan, husi sira ne’ebé iha ona lista maibé lakonsege foti toga ba graduasaun nian maibé sira-nia diploma nafatin prodús husi universidade.
Iha sorin seluk, Diretór Diresaun Nasionál ba Informátika no Teknolojia (DNIT-UNTL), Sr Joanico Mendonça, hateten, ba graduandu sira atu prepara mak aparellu sira ne’ebé presiza durante serimónia graduasaun online mak hanesan telemovel ka laptop, no aplikasaun Zoom no seluk tan.
“Graduasaun Online importante ba graduandu sira atu prepara mak telemovel ka Laptop, pakote ba internet, instalasaun aplikasaun Zoom, no idaidak sei hetan link husi univesidade parte IT nian, ba kada graduandu liuhusi númeru telefone, WhatsApp, no Email ne’ebé rejista ona”, tenik Sr. Joanico.
Eventu ne’e sei transmite husi salaun Ian Martin INFORDEPE Balide, Díli, liuhusi servisu hamutuk entre UNTL-RTTL.E.P no Telkomcel hodi transmite graduasaun ba públiku, iha loron 25 Maiu 2021.
Graduandu na’in 251 ne’e kompostu husi fakuldade 5, Fakuldade Enjeñaria, Siénsia no Teknolojia (34), Fakuldade Edukasaun, Arte no Umanidade (71), Fakuldade Medisina no Siénsia Saúde (94), Fakuldade Ekonomia no Jestaun (17) no Fakuldade Siénsia Sosiál (35), entretantu graduandu husi Fakuldade Agrikultura ho Fakuldade Filozofia no Siénsia Umana sei partisipa iha graduasaun prezensiál sei wainhira Serka Sanitária remata.
Média UNTL : Agostinho da Cruz e Silva
Foto : Agostinho da Cruz e Silva