- Detalhes
- Escrito por Adelaide da Cunha
- Visualizações: 1617
#TimorLeste #UNTL #20deMaio 20 Maiu 2021
Lori naran Universidade Nacional Timor Lorosa'e nian no Sívitas Akadémika tomak hato'o parabéns ba Nasaun Doben Timor-Leste no Povu Tomak ne'ebé komemora Loron Restaurasaun Independénsia Timor-Leste nian ba dala 19 (20 Maiu 2002-2021).
Iha tinan ida ne'e, Timor-Leste nia komemorasaun ba loron istóriku ne'e ho forma diferente tanba impaktu COVID-19, maibé Univesidade Nasionál dezeja katak timoroan hotu sei fó duni "um minuto de silêncio", ba Eroi no Martir sira ne'ebé luta to'o lakon sira-nia vida ba independénsia ida ne'e.
Reflete ba sakrifísiu tomak, hanesan Reitór UNTL nian, nafatin konvida Sívitas Akadémika tomak Universidade nian, dosente, funsionáriu, estudante, no timoroan hotu katak mai ita hotu kontinua luta ho forma foun, dinámiku tuir idaidak nia kapasidade ba dezenvolvimentu nasionál ne'e inkluzivu no sustentável.
Parabéns ba ita hotu!
Viva eroi hotu ba libertasaun nasionál.
Viva Timor-Leste.
Viva povu tomak.
Viva Sívitas Akadémiku UNTL nian.
Média UNTL
- Detalhes
- Escrito por Adelaide da Cunha
- Visualizações: 733
#TimorLeste #UNTL #RTTLEP 19 Maiu 2021
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins MPH, Ph.D, akompaña husi Visereitór sira, felisita Prezidente Rádio Televisaun Timor-Leste (RTTL.EP), Sr. José António Belo, aleinde ne’e ko’alia mós kona-ba apoiu RTTL.EP nian ba UNTL nia Graduasaun Online.
Hafoin enkontru iha sala Reuniaun RTTL.EP (19/05), Reitór hateten katak, vizita ne’ebé hala’o atu felisita Prezidente RTTL.EP foun, nune’e mós diskute kona-ba sira nia apoiu atu halo live streaming ba Graduasaun Online UNTL nian, no kooperasaun seluk iha futuru.
“Iha oportunidade ida ne’e, ami mós felisita Prezidente RTTL.EP foun, ba knaar foun ne’ebé Estadu tau fiar ba nia, ami ko’alia liu kona-ba graduasaun online ne’ebé sei realiza iha (25/05) agora, entaun ami hili RTTL.EP, atu halo tranzmisaun direta ba eventu ne’e”, tenik Reitór.
Profesór ne’e mós akresenta liután katak, sira mós ko’alia kona-ba kooperasaun instituisaun rua ne’e iha futuru hakarak halo renovasaun kooperasaun ne’ebé antes ne’e iha tiha ona.
Iha fatin hanesan, Prezidente RTTL.EP, José António Belo sente onradu ho vizita husi Reitór UNTL ho nia estrutura, no agradese mós ba konfiansa ba RTTL hodi halo tranzmisaun direta ba Graduasaun Online.
“Ami onra boot bele hetan vizita ida ne’e, horiseik ekipa tékniku sira tuur hamutuk ona, agradese ba konfiansa ida ne’e, esperiensia foun ba instituisaun rua ne’e, tanba ba dahuluk ita realiza Graduasaun Online, ami hanoin katak, ba futuru RTTL.EP iha espasu boot ba universidade, liuliu UNTL uza hodi fahe matenek ba ita-nia komunidade”, tenik Prezidente RTTL.EP.
Partisipa iha sorumutu ne’e, Visereitór Asuntu Akadémiku no Garantia Kualidade, Profesór Doutór Samuel Venâncio de Sousa Freitas, Visereitór ba Asuntu Estudantis, Enga. Lígia Tomás Correia, M.Sc Xefe Departamentu Média no Komunikasaun UNTL nian, Sra. Adelaide Maria Filipa da Cunha, no ekipa RTTL.EP.
Média UNTL : Agostinho da Cruz e Silva
Foto : Agostinho da Cruz e Silva
- Detalhes
- Escrito por Adelaide da Cunha
- Visualizações: 710
#TimorLeste #UNTL #MESSK #ANAAA 18 Maiu 2021
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins MPH, Ph.D, hanesan mós Koordenadór Grupu Siénsia Saúde nian, partisipa iha enkontru dahuluk ba Revizaun Kurríkulu Padraun Mínimu, ne’ebé prezide husi Diretora-Jerál Ensinu Supriór (MESSK), Dra. Maria Filomena Lay Guterres, iha Salaun Enkontru MESSK nian, Díli (18-5).
“Ohin ha’u mai hanesan Koordenadór Grupu iha Siénsia Saúde nian, atu kontinua servisu ne’ebé antes ne’e halo tiha ona, kona-ba atu halo Revizaun Kurríkulu Padraun Mínimu, ne’ebé sei implementa ba universidade no institutu sira iha Timor-Leste”, hateten Reitór UNTL.
Iha fatin hanesan, Diretora-Jerál Ensinu Superiór nian hateten katak, sorumutuk refere hanesan pontu partida ida atu kontinua servisu ne’ebé koordenadór Grupu iha área idaidak halo ona iha tinan 2014 liubá.
“Ita-nia enkontru ne’e, hanesan parte inisiál ida atu haree filafali servisu ne’ebé halo tiha ona no presiza halo ona revizaun hodi ajusta tuir situasaun atuál nian, tanba atu hadia kualidade ensinu la sees husi kurríkulu ne’ebé sai giaun ba Universidade no Institutu sira iha Timor-Leste”, hateten Diretora Jerál.
Diretora-Jerál ne’e mós agradese ba koordenadór grupu sira, ne’ebé marka ona prezensa hodi fó hanoin ba malu no haree hamutuk pasu importante sira ne’ebé sei hala’o tuir mai, relasiona ho prosesu ba Revizaun Kurríkulu Padraun Mínimu nian.
Partisipa iha reuniaun ne’e, Reitór UNTL, hanesan mós Koordenadór Grupu Siénsia Saúde, Profesór Doutór José Cornélio Guterres (Koordenadór Grupu Siénsia Sosiál), Profesór Doutór Benjamim de Araújo e Corte-Real (Koordenadór Grupu Formasaun Profesór), Profesór Doutór Fernando Hanjam (Koordenadór Grupu Siénsia Ekonomia).
Aleinde ne’e, partisipa mós husi Profesór Doutór Edmundo Viegas (Koordenadór Grupu Siénsia Agrária), Profesór Doutór Estanislau Saldanha (Koordenadór Grupu Enjeñaria), Profesór Doutór Afonso de Almeida (Koordenadór Grupu Siénsia Ezata), inklui Diretór Nasionál Kurríkulu Sr. Luis Aparício Guterres, asesór, ekipa tékniku no konvidadu sira.
Média UNTL : Miguel Gonçalves
Foto : Miguel Gonçalves
- Detalhes
- Escrito por Adelaide da Cunha
- Visualizações: 514
#TimorLeste #UNTL #COVID19 #COVID19TL 19 Maiu 2021
Membru Sívitas Akadémika UNTL (dosente, funsionáriu ka estudante) ne'ebé hakarak simu vasina COVID-19, bele ba iha Kampus Sentrál UNTL, iha loron-Sábadu 22-05-2021.
Imunizasaun COVID-19 sei hala’o iha Korredór Kampus Sentrál nian, hahú husi tuku 10:00 dadeer to’o remata.
Membru Sívitas Akadémika UNTL ne'ebé hakarak simu vasina COVID-19 iha loron-Sábadu 22-05-2021, no seidauk rejistu, sei bele kompleta no submete formuláriu online liuhosi link tuir mai ne’e, no mos bele rejistu diretamente iha Kampus molok atu simu vasina:
https://forms.gle/Cwvd6q9NVT2wddQw7
Ami apela ba membru hotu husi Sívitas Akadémika UNTL atu kontinua tuir ho rigór medida ne’ebé fo-sai husi autoridade kompetente ba luta kontra pandemia COVID-19, liuliu distansiamentu fíziku no kuidadu espesiál ijiene no saúde.
Informasaun ofisiál Reitoria UNTL durante tempu pandemia COVID-19 sei kontinua fó sai de’it iha website www.untl.edu.tl no pájina Facebook UNTL nian Universidade Nacional Timor Lorosa'e.
Halo favór fahe no kumpre.
Mai Ita Hamutuk Luta Kontra COVID-19!
Ita-nia Saúde Iha Ita-nia Liman Rasik!
Reitoria UNTL
- Detalhes
- Escrito por Adelaide da Cunha
- Visualizações: 4410
#TimorLeste #UNTL #FECT #CongregaçãoCanossiana 18 Abril 2021
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins MPH, Ph.D, akompaña husi Vise Reitór no Proreitór sira, inaugura uma temporária ne’ebé konstrui husi estudante Dormitóriu-Fakuldade Enjeñaria, Siénsia no Teknologia (FECT) Hera, ho materiál apoiu husi Kongregasaun Canosiano, hodi fó ba vítima ne’ebé afeita husi inundasaun iha loron 4 Abril liubá.
Iha serimónia ne’ebé hala’o iha Hera-Díli (17-05), Reitór iha nia diskursu orgullu ho universitáriu sira-nia apoiu, tanba momentu hanesan, sira mós hasoru difikuldade maibé tanba domin prontu konstrui uma refere.
“Orgullu tebes ba estudante sira, tanba dadaun ne’e ita bo’ot sira mós iha situasaun defísil nia laran, maibé servisu ne’ebé ita bo’ot sira halo ne’e, reflete duni ita bo’ot sira-nia domin ba ita -nia maun alin no bin sira, iha situasaun ne’ebé dadaun ne’e sira hasoru”, tenik Reitór.
Iha fatin hanesan, Xefi Adeia Ailoklaran, Suku Hera Sr. Rafael S. Ribeiro, agradese ba Padre no Madre Kongregasaun Canosiano sira no Padre Kapelaun-UNTL ne’ebé tulun ona komunidade ne’ebé hetan inundasaun iha fulan kotuk liuba to’o ohin loron.
“Agradese ba Padre no Madre sira, durante ne’e halibur ona komunidade iha fatin ne’e, dezde 4 Abril liubá, apoiu hirak ne’ebé alin estudante halo, laiha buat ida atu selu, maibé sei reza nafatin ba Aman-Maromak hodi tau matan ba sira-nia unidade no prosesu estudu hotu”, hatutan Xefe Aldeia.
Responsável Estudante Dormitóriu FECT-Hera nian, Ajino Batista hateten, iha momentu hanesan sira mos iha difikuldade tanba enfrenta hela Konfinamentu Obrigatóriu, maibé la taka matan hodi apoiu maluk ne’ebé presiza.
“Ami mós sente susar iha Dormitoriu ne’ebá, maibé ami mós sente katak ita nia inan feton sira, ita-nia maluk, no alin sira presiza liu, tanba ne’e, ami simu responsável husi Na’i Padre, ha’u fila ba enkontru ho kolega sira katak ita hetan oportunidade atu ajuda tuir kbiit hanesan estudante nian, ami-nia rezultadu mak ida ne’e”, tenik Ajino.
Uma temporáriu ne’e, material sira sosa ho apoiu finanseira husi Kongregasaun Canosiano husi Itália, no konstrui durante loron 30, husi estudante sira ne’ebé hela iha Dormitóriu FECT nian, no kolabora ho estrutura Fakuldade nian.
Partisipa iha serimónia ne’e, Visereitór, Proreitór, Diretór-Jerál ba Servisu Apoiu Reitoria, Amu Kapelaun UNTL, Pe. Nivio Lebre Correia, Fdcc, reprezentante estrutura FECT nian, Profesór sira, Autoridade Lokal, Padre Canosiano sira, estudante no Komunidade.
Média UNTL : Agostinho da Cruz e Silva
Foto : Agostinho da Cruz e Silva