- Detalhes
- Escrito por Adelaide da Cunha
- Visualizações: 535
#TimorLeste #UNTL 4 Maiu 2021
Universidade Nacional Timor Lorosa’e (UNTL), nia Magnífiku Reitór Profesór dr. João Soares Martins MPH, Ph.D, akompaña husi Visereitór no Proreitór sira hala’o vizita servisu ba konstrusaun edifísiu foun tolu ne’ebé iha hela prosesu konstrusaun, lokaliza iha Kampus Sentrál, Fakuldade Ekonomia no Jestaun (FEG), no Kampus Kaikoli UNTL nian, Díli (04/04).
Relasiona ho progresu ba dadaun ne’e, progresu fíziku ne’ebé atinji ona mak hanesan Edifísiu Kampus Sentrál atinji ona 54,71%, Edifísiu FEG ho 56,41%, enkuantu Edifísiu Kampus Kaikoli ho 92,73%.
Iha vizita ne’e, Reitór ho nia ekipa observa diretu servisu fíziku husi traballadór sira iha terrenu kona-ba progresu sira ne’ebé atinji ona.
Projetu hirak ne’e hahú iha 2019 liubá, husi kompañia kontrutór rua: Aitula Unip, Lda mak responsabiliza ba konstrusaun iha Kampus Sentrál no ida iha Kampus Fakuldade Ekonomia no Jestaun (FEG) nian. No Kompañia Linear Unip, Lda, mak reponsabiliza ba edifísiu foun ne’ebé lokaliza iha Kampus Kaikoli.
Média UNTL : Agostinho da Cruz e Silva
Foto : Agostinho da Cruz e Silva
- Detalhes
- Escrito por Adelaide da Cunha
- Visualizações: 646
#TimorLeste #UNTL #FECT #MPRM #IPG 4 Maiu 2021
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins MPH, Ph.D, ho nia estrutura no Dekanu Interinu Fakuldade Enjeñaria, Siénsia no Teknolojia (FECT) hala’o enkontru ho Ministru Petróleu no Minerais (MPM), S.E. Doutór Victor da Conceição Soares, no Prezidente Institutu Petróleu no Jeolojia (IPG), Eng. Gabriel Aparício.
Reuniaun ne’ebé hala’o iha salaun enkontru Ministériu nian, Mandarin Díli (04/05), ne’e ho objetivu atu diskute kona-ba prosesu estabelesimentu Laboratóriu Nasionál Jeolojia (LNG) nian, ne’ebé sei lokaliza iha universidade nasionál nia Kampus FECT, Hera-Díli.
Iha enkontru ne’e, Reitór ho nia estrutura aprezenta difikuldade sira ba dirijente IPG no MPM hodi buka solusaun uluk ba kestaun tékniku balun ne’ebé presiza hadia antes instala laboratóriu.
Partisipa iha eventu ne’e, Proreitór ba Asuntu Dezenvolvimentu Institusional Profesór Lelis Gonzaga Fraga, Dekanu Interinu FECT, Profesór Junior R. da Cruz, Ph.D, ho nia Visedekanu sira, Diretór-Jeral MPRM, Sr. Manuel Lemos, ho nia estrutura, Prezidente IPG ho nia estrutura, inklui konvidadu sira.
Média UNTL : Agostinho da Cruz e Silva
Foto : Agostinho da Cruz e Silva
- Detalhes
- Escrito por Adelaide da Cunha
- Visualizações: 2044
#TimorLeste #UNTL #VRAE 4 Maiu 2021
Universidade Nacional Timor Lorosa’e (UNTL) nia Visereitóra ba Asuntu Estudantil (VRAE), Profesora Eng.ª Lígia Tomás Correia, M.Sc, realiza enkontru dahuluk ho Visedekanu Asuntu Estudantís husi Fakuldade sira, hodi partilla Programa Estrakurrikulár ba tinan 2021, iha sala Videokonferénsia UNTL nian, Díli (4/05).
“Proposta Programa Estrakurrikulár ba tinan 2021, aborda ho relevánsia ba área Sientífika, Arte no Kultura, Istória no Sósiu-Polítika liuhusi kompetisaun ho forma Online no Prezensiál ho modalidade hanesan, Traballu Sientífiku, Jornál Parede, Produsaun Video Badak, Fotografia, Gastronomia, Diskursu Públiku, Pintura, Trio Vokál, Poema no Mestre Serimónia (MC)”, hateten Profesora Lígia.
Visereitora mós salienta katak objetivu atividade atu esplora hanoin husi visedekanu sira kona-ba Programa Estrakurrikulár ba tinan 2021 no potensialidade iha parte koñesimentu sientífiku, krítiku no promove mós talentu estudante sira-nian.
“Enkontru ne’e hetan sujestaun jerál husi Vise Dekanu sira katak atividade sira atu implementa modalidade sira ne’ebé iha, presiza fortifika ho liña koordenasaun no servisu konjunta ne’ebé sólidu entre Gabinete Asuntu Estudantil nian ho Fakuldade sira, atu fornese akompañamentu própriu ba estudante hodi bele sai rekursu profisionál ho kualidade iha futuru”, tenik Visereitora.
Relasiona ho diskusaun ne’ebé hala’o, Visedekanu Asuntu Estudantil (FECT) nian, Profesór João Bosco F. Cabral fó hanoin katak, atividade ne’ebé iha, presiza valoriza sira ne’ebé hetan valór di’ak iha atividade refere.
“Karik atividade ne’e fó mós valorizasaun ba mellór estudante sira ne´ebé hetan kualifikasaun iha Atividade Estrakurrikulár sira ne’ebé sira partisipa”, tenik Prof. João.
Partisipa iha sorumutu ne’e, Visedekanu ba Asuntu Estudantís ne’ebé mai husi Fakuldade sira, inklui ekipa VRAE nian.
Média UNTL : Agostinho da Cruz e Silva
Foto : Agostinho da Cruz e Silva
- Detalhes
- Escrito por Adelaide da Cunha
- Visualizações: 551
#TimorLeste #UNTL #DNRH 3 Maiu 2021
Universidade Nacional Timor Lorosa’e (UNTL), liuhusi Diresaun Nasionál Rekursu Umanu (DNRH), loke vaga ba públiku ba pozisaun Tékniku Eletrisidade, Tékniku Manutensaun ba AC no Motorista.
Ba informasaun kompletu bele hare iha dokumentu aneksu.
Media UNTL