- Detalhes
- Escrito por Mateus Goncalves
- Visualizações: 13401
- Detalhes
- Escrito por Mateus Goncalves
- Visualizações: 4610
#TimorLeste #UNTL #EmbaixadaBrazil 22 Setembru 2020
Magnífiku Reitór Universidade Nacional Timor Lorosa’e (UNTL), Profesór Doutór Francisco Miguel Martins, simu vizita husi Ministru Konselleiru Embaixada Brazil iha Timor-Leste Doutór Octavio Lopes, iha Reitoria UNTL nian, Díli, (21/09), hodi diskute kooperasaun parte rua nian iha futuru.
Reitór UNTL nian iha nia entrevista hateten katak objetivu husi vizita refere atu diskute programa sira ba reforsa dezenvolvimentu instituisaun nian.
“Liuhusi vizita ne’e atu reforsa liutan servisu dezenvolvimentu institusionál, relasiona ho kapasitasaun ba professor no estudante sira, nomós kona-ba «Leitorado Brasileiro» iha ita-nia universidade”, tenik Reitór.
Reitór UNTL mós hatutan katak Embaixada Brazil 🇧🇷 dadaun ne’e servisu hamutuk ho UNTL liuhusi programa «Leitorado Brasileiro» iha Fakuldade Edukasaun, Arte i Umanidade (FEAH), nomós liuhusi programa bolsu estudu nível Mestradu no Doutoramentu nian.
Iha fatin hanesan, Ministru Konselleiru Embaixada Brazil iha Timor-Leste hateten katak nia prezensa iha UNTL ho objetivu atu akompaña programa «Leitorado Brasileiro» ne’ebé Embaixada Brazil dezenvolve hela iha universidade nasionál.
“Programa «Leitorado Brasileiro» ne’ebé Brazil dezenvolve iha FEAH atu hadiak liután lian portugés ba profesór no alunu sira husi fakuldade nian liuhusi aula prezensiál ne’ebé koordena husi Profesora Renata Anunciação, nomós programa «Leitorado Brasileiro» refere sei kapasita profesór sira ne’ebé atu kontinua estudu nível Mestrado no Doutoramentu iha Brasil”, tenik Doutór Octavio.
Partisipa iha enkontru refere Proreitór ba Asuntu Akadémiku, Profesór Miguel Maia dos Santos, no Dekana FEAH nian, Profesora Doutora Ana Cristina Silveira de Jesus Martins.
Média UNTL 📝: Agostinho da Cruz e Silva
Foto 📷: Agostinho da Cruz e Silva
- Detalhes
- Escrito por Mateus Goncalves
- Visualizações: 5554
#TimorLeste #UNTL #FECT 22 Setembru 2020
Universidade Nacional Timor Lorosa’e (UNTL), liuhusi Fakuldade Enjeñaria, Siénsia no Teknolójia (FECT) nia finalista na’in atus tolu sia (309) partispa ona iha estájiu (profisionál no servisu sosiál) iha tinan akadémika 2020, hodi kompleta sira-nia prátika no aprende husi komunidade.
Vise-dekanu ba Asuntu Akadémika FECT nian, Profesór Doutór Junior Raimundo da Cruz, iha Kampus Hera UNTL nian, Díli, detalla katak Fakuldade nia estudante ne’ebé partisipa iha estájiu profisionál hamutuk na’in 113, ne’ebé kompostu husi Departamentu Enjeñaria Sivil (41) no Departamentu Enjeñaria Informátika (72).
“Estájiu profisionál ne’e destaka deit iha instituisaun sira iha Díli laran, atu lori finalista idaidak aplika sira-nia koñesimentu tuir área espesífiku ne’ebé sira aprende iha universidade”, hatutan Vise-dekanu.
Aleinde estájiu profisionál, Profesór Junior informa tan katak, iha estudante balun maka partisipa ona iha Estájiu Servisu Sosiál (ESS) hamutuk na’in 196, ne’ebé kompostu husi Departamentu Enjeñaria Mekánika na’in 72, Departamentu Enjeñaria Eletrónika i Eletrika 71, no Departamentu Jeolojia i Petróleu na’in 53.
“Iha ESS ne’e, kada departamentu dezloka finalista sira iha munisípiu la hanesan, Departamentu Enjeñaria Mekánika iha Munisípiu Lauten, Departamentu Enjeñaria Eletrónika no Eletrika iha Munisípiu Manatutu ho Aileu, no Departamentu Jeolojia i Petróleu lokaliza iha Munisípiu Aileu”, dehan Vise-dekanu.
Profesór Junior mós enkoraja estajiáriu sira atu uza oportunidade liuhusi estájiu hodi hametin prinsípiu tolu universidade nian hanesan Ensinu, Peskiza no Dedikasaun Komunidade.
“Iha ESS ne’e, hola parte ba pilar ida dedikasaun komunidade nian no iha estájiu, estudante sira kontribui direita ba komunidade, no atividade sira implementa tuir saida mak relevante ba komunidade”, hatutan Profesór Junior.
Vise-dekanu mós salienta katak UNTL nia FECT dezde inísiu forma no gradua nia produtu sira tenki iha matenek, iha kapasidade, iha atitude ne’ebé di’ak, tanba ne’e estájiu mak biban ba sira atu aplika.
Média UNTL 📝: Agostinho da Cruz e Silva
Foto 📷: João Bosco (estajiáriu)
- Detalhes
- Escrito por Mateus Goncalves
- Visualizações: 14090
#TimorLeste #UNTL #FECT #PNTL 18 Setembru 2020
Universidade Nacional Timor Lorosa'e (UNTL) nia Fakuldade Enjeñaria, Siénsia no Teknolojia (FECT) hetan vizita husi Komandu Polísia Nasional Timor-Leste (PNTL) Munisípiu Díli nian, hodi partilla informasaun kona-ba servisu Polisiamentu Komunitária, Polísia Sientífiku Investigasaun Kriminál, no Servisu Polísia Tránzitu nian ba Sívitas Akadémika FECT nian, iha Auditoriu FECT, Hera (17/09).
Reprezentante Magnífiku Reitór nian, Proreitór ba Asuntu Planu no Dezenvolvimentu Institusionál, Profesór Leonel Madeira hateten, iha FECT aprende kona-ba enjeñaria no siénsia nian, maibé sensibilizasaun ba sira atu hatene mós regulamentu sira ne'ebé iha atu idaidak bele kontribui hanesan sidadaun.
“Ita iha Fakuldade Enjeñaria, Siénsia no Teknolojia, ita aprende kona-ba Enjeñaria no Siénsia, maibé ne'e deit lato’o, tanba ita moris iha sosiedade ida tenki moris iha orden nia laran no iha lei nia okos, tan ne'e ohin oportunidade diak ida hodi aprende husi ita-nia oradór sira ne'ebé mai husi PNTL”, tenik Profesór Leonel.
Proreitór mós husu ba sívitas akadémika tomak, atu arpoveita oportunidade refere liuliu informasaun sira ho didiak, karik iha asuntu ruma mak seidauk komprende bele hato’o pergunta atu hatene liután.
Iha fatin hanesan, Komandante Polísia Komunitária Munisípiu Díli nian, Inspetór Polísia Sr. Daniel da Costa Freitas, iha nia aprezentasaun hateten objetivu husi sensibilizaaun ne'e atu fahe informasaun kona-ba servisu PNTL nia ba komunidade inteletuál sira fakuldade nian.
“Ami-nia prezensa mai iha UNTL liuliu iha Hera, atu habelar servisu polisiamentu komunitáriu ba iha inteletuál sira, nomós parte ida atu ita servisu hamutuk ho komunidade akadémiku hodi garante pás no estabilidade iha rai laran”, dehan Alumni Politéknika Hera ne'e.
Oradór ba iha Programa Polísia ba Kampus ne'e, ba dahuluk Komandante Polisia Komunitária Munisípiu Díli, Inspetór Daniel da Costa Freitas, aprezenta kona-ba servisu Polisiamentu Komunitáriu nian, Komandante Investigasaun Kriminal Munisípiu Díli Inspetór, Mariano Soares, aprezenta Servisu Polísia Sientífiku no Invesitigasaun Kriminál nian, ikus liu Komandante Tránzitu Munisípiu Díli nian, Inspetór Domingos Sarmentu Gama, aprezenta servisu Polísia tranzitu nian.
Partisipa iha eventu ne'e Diretór-Jeral Servisu Apoiu Reitoria ,Sr. Jacinto H. S. Belo, Dekanu FECT, Profesór Doutór Ruben Jeronímo Freitas, ho nia estrutura, Dosente sira, estudante no konvidadu sira.
Média UNTL https://z-p3-static.xx.fbcdn.net/images/emoji.php/v9/t6b/2/16/1f4dd.png?_nc_eui2=AeF7zAv3wgRe0CkAQcCtF1n3FsRWQCfCghAWxFZAJ8KCEM3e4SOlbuieX_2NqnZ9Vic");">📝: Agostinho da Cruz e Silva
Foto https://z-p3-static.xx.fbcdn.net/images/emoji.php/v9/tfc/2/16/1f4f7.png?_nc_eui2=AeGPs5em_-EZd78vb0MquV0cTEbAPnqBieBMRsA-eoGJ4AAsqCg190M5zZ1K3aUbvuI");">📷: Agostinho da Cruz e Silva
- Detalhes
- Escrito por Mateus Goncalves
- Visualizações: 2678