#TimorLeste #UNTL #FAGRI #CITL 30 Abril 2021
Universidade Nacional Timor Lorosa'e (UNTL) nia Magnífiku Reitór, Profesór dr. João Soares Martins, MPH, Ph.D, asina kontratu ho Diretór Jestaun Transfronteira Basia-idrográfika (Watershed Management), entre Indonézia no Timor-Leste/Conservation International Timor-Leste (CI-TL), Sr. Manuel Mendes, ho nia ekipa, iha UNTL Sentrál, Díli (30/04).
Iha asinatura kontratu ne’e, Reitór hateten UNTL aseita atu envolve iha peskiza sira, liuliu iha Basia-idrografika Talau-Loes no Basia-idrografika Mota Masin no involve peskizadór nain 14, husi Fakuldade Agrikultura maka sei partisipa iha estudu ne’ebé sei hala’o.
“Universidade agradese, tanba Conservation International (CI-TL) bele foti inisiativa hakarak envolve UNTL no instituisaun akadémiku sira, atu konserva ita-nia ambiente no apoia reabilita fila fali degradasaun floresta sira, no redús ameasa ba biodiversidade sira”, hateten Reitór. 
Entretantu, Diretór CI-TL nian hateten katak, projetu ne’ebé propoin kona-ba, Jestaun Transfronteira Basis-idrográfika entre Indonézia no Timor-Leste/Conservation International Timor-Leste (CI-TL), Indonézia-Talau no Timor-Leste (Loes) no mota masin.
“Projetu ne’e kobre komponente haat, (1) Transboundary Diagnostic Analysis no Joint Florestry Working Group, (2) Defini Strategic Action Plan (SAP) ba projetu nian, (3) Implementasaun SAP hodi hadiak (rekursu bee, seguransa alimentar, boas pratikas agrikultural), no (4) monitorizasaun no avaliasaun”, hateten Mendes.
Baseline-Study ba Watershed Talau-Loes no Mota masin ne’e hetan finansiamentu husi Conservation International no servisu hamutuk ho Ministériu Agrikultura no Peskas (MAP).
Enkuantu iha Konsórsiu Dry Land Agriculture, kompostu husi UNTL, UNDANA Kupang, Charles Darwin University (CDU-Australia), Universitas Mataram (UNRAM), Universitas Halu Oleo, Sulawesi.
Objetivu kolaborativu ne’e, atu fornese konsultasaun no dadus empiriku ba hadia ekosistema bee moos iha Talau Loes no Mota Masin, protesaun ba área Watershed, no hadi’ak produsaun ai-han, seguransa alimentar ba populasaun.
Objetivu seluk atu sai Sentru baze dadus nian, iha Basis-idrográfika (BH) Transfronteira. Susesu husi projetu, bele sai ezemplu ba nasaun seluk ne’ebé iha problema agrikola rai maran, no menus bee.
Partisipa iha asina Kooperasaun ne’e, Proreitora Asuntu Kooperasaun, Profesora Doutora Lídia Gomes, SKM, M.Kes, Proreitór Asuntu Planeamentu, Monitorizasaun no Avaliasaun, Profesór José Nelson Salsinha, Ph.D, Dekanu Fakuldade Agrikultura, Profesór Carlito de Araújo M. Code ho nia estrutura, Profesór Senior FAGRI no ex-Proreitór Asuntu Kooperasaun, Profesór Eduardo Aniceto Serrão, Ph.D, inklui konvidadu sira.
Média UNTL : Mateus Gonçalves
Foto : Mateus Gonçalves