#TimorLeste #UNTL #FAGRI #COVID19 #COVID19TL 3 Maiu 2021
Universidade Nacional Timor Lorosa’e (UNTL), nia Dekanu Fakuldade Agrikultura (FAGRI), Profesór Doutór Carlito de Araújo Mali Code, iha Kampus Sentrál UNTL nian, Díli (29/4), hateten katak, Fakuldade nia estudante sira kontinua peskiza ba monografia iha kampu, tanba realiza tiha ona antes aplika Serka-Sanitáriu.
“Atividade peskiza la’o hela, estudante sira husi Departamentu rua mak halo hela peskiza ba monografia iha Maliana, grupu ida husi Departamentu Agronomia, no Saúde Amimal, sira dezloka ona iha terrenu antes ita implementa Serka-Sanitária liuliu iha Díli”, dehan Dekanu.
Profesór ne’e mós hatutan tan katak loloos ne’e, estudante sira-nia tempu peskiza iha terrenu termina ona iha Abril ne’e, tanba situasaun atuál la permite sira atu fila mai Díli, maibé sira iha hela lokál no laiha problema.
“Estudante sira lokaliza iha fatin rua, Departamentu Agronomia na’in (7) iha Suku Ritabou, Grupu ida Saúde nian, sira na’in (15) no konsentra iha Suku Raifun, foin dadauk iha difikuldade balun, maibé liuhusi apoiu MSSI Munisípiu nian fó ona apoiu umanitáriu ruma ba sira”, tenik Profesór Carlito.
Dekanu hatutan tan katak, estudante sira iha lokál laiha problema relasiona ho implaktu COVID-19, tanba sira sempre hala’o atividade iha toos, maibé kontatu ho orientadór no estrutura Fakuldade no Departamentu nian la’o efetivu hela liuhusi Zoom, WattsApp, fasilita komunika ho efetivu nafatin.
“Ami laiha problema no organizadu, mezmu orientadór idaidak loloos tenke ba vizita sira, maibé meiu ne’ebé uza fasilita hela, no ami hein katak, Serka-Sanitária ne’e bele hotu ho sedu di’ak tan atu sira bele finaliza projetu finál”, hatuir Dekanu.
Aleinde estudante sira-nia peskiza ba monografia iha Maliana, Dekanu informa mós katak estudante sira husi departamentu Agro-Pekuária mós halo hela peskiza iha FAGRI nia Laboratóriu-Hera, no orientasaun husi orientadór sira la’o hela tuir protokolu serka-sanitária nian.
Média UNTL : Miguel Gonçalves
Foto : Miguel Gonçalves, Arkivu FAGRI 2021