#TimorLeste #UNTL #FECT #CongregaçãoCanossiana 18 Abril 2021
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins MPH, Ph.D, akompaña husi Vise Reitór no Proreitór sira, inaugura uma temporária ne’ebé konstrui husi estudante Dormitóriu-Fakuldade Enjeñaria, Siénsia no Teknologia (FECT) Hera, ho materiál apoiu husi Kongregasaun Canosiano, hodi fó ba vítima ne’ebé afeita husi inundasaun iha loron 4 Abril liubá.
Iha serimónia ne’ebé hala’o iha Hera-Díli (17-05), Reitór iha nia diskursu orgullu ho universitáriu sira-nia apoiu, tanba momentu hanesan, sira mós hasoru difikuldade maibé tanba domin prontu konstrui uma refere.
“Orgullu tebes ba estudante sira, tanba dadaun ne’e ita bo’ot sira mós iha situasaun defísil nia laran, maibé servisu ne’ebé ita bo’ot sira halo ne’e, reflete duni ita bo’ot sira-nia domin ba ita -nia maun alin no bin sira, iha situasaun ne’ebé dadaun ne’e sira hasoru”, tenik Reitór.
Iha fatin hanesan, Xefi Adeia Ailoklaran, Suku Hera Sr. Rafael S. Ribeiro, agradese ba Padre no Madre Kongregasaun Canosiano sira no Padre Kapelaun-UNTL ne’ebé tulun ona komunidade ne’ebé hetan inundasaun iha fulan kotuk liuba to’o ohin loron.
“Agradese ba Padre no Madre sira, durante ne’e halibur ona komunidade iha fatin ne’e, dezde 4 Abril liubá, apoiu hirak ne’ebé alin estudante halo, laiha buat ida atu selu, maibé sei reza nafatin ba Aman-Maromak hodi tau matan ba sira-nia unidade no prosesu estudu hotu”, hatutan Xefe Aldeia.
Responsável Estudante Dormitóriu FECT-Hera nian, Ajino Batista hateten, iha momentu hanesan sira mos iha difikuldade tanba enfrenta hela Konfinamentu Obrigatóriu, maibé la taka matan hodi apoiu maluk ne’ebé presiza.
“Ami mós sente susar iha Dormitoriu ne’ebá, maibé ami mós sente katak ita nia inan feton sira, ita-nia maluk, no alin sira presiza liu, tanba ne’e, ami simu responsável husi Na’i Padre, ha’u fila ba enkontru ho kolega sira katak ita hetan oportunidade atu ajuda tuir kbiit hanesan estudante nian, ami-nia rezultadu mak ida ne’e”, tenik Ajino.
Uma temporáriu ne’e, material sira sosa ho apoiu finanseira husi Kongregasaun Canosiano husi Itália, no konstrui durante loron 30, husi estudante sira ne’ebé hela iha Dormitóriu FECT nian, no kolabora ho estrutura Fakuldade nian.
Partisipa iha serimónia ne’e, Visereitór, Proreitór, Diretór-Jerál ba Servisu Apoiu Reitoria, Amu Kapelaun UNTL, Pe. Nivio Lebre Correia, Fdcc, reprezentante estrutura FECT nian, Profesór sira, Autoridade Lokal, Padre Canosiano sira, estudante no Komunidade.
Média UNTL : Agostinho da Cruz e Silva
Foto : Agostinho da Cruz e Silva