#TimorLeste #UNTL #MESSK 27 Maiu 2021
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins MPH, Ph.D, ho Ministru Ensinu Superiór, Siénsia no Kultura (MESSK), S.E Longuinhos dos Santos, asina Nota Entendimentu (MoU) kona-ba izensaun propinas ba univesitáriu sira, iha salaun Hotel Novo Turizmu (27/05).
Relasiona eventu refere, Magnífiku Reitór lori naran universidade nasionál nian, agradese ba VIII Governu liuhusi Ministériu Ensinu Superiór, Siénsia no Kultura ne’ebé bele fasilita izensaun propinas ba universitáriu sira.
"Lori naran UNTL nian hanesan Reitór, agradese ba Governu liuhusi Ministériu Ensinu Superiór, Siénsia no Kultura, tanba bele fó ona apoiu subsídiu ba estudante universitáriu sira iha ámbitu implementasaun Serka-Sanitária ne’e", tenik Reitór.
Iha fatin hanesan, Ministru MESSK hateten atividade ohin ne'e hanesan enkontru Konsellu-Reitór hodi aprezenta mós ba Reitór sira kona-ba programa izensaun propinas ba estudante sira.
"Enkontru ohin ne'e enkontru Konsellu-Reitór, programa rutina ida husi MESSK, iha ajenda lubuk mak ami diskute kona-ba programa izensaun propinas ba estudante ensinu superiór sira iha Timor Leste, liuhusi asina memorandu ida hanesan dokumentu ofisiál ida hodi Ministériu Finansas bele halo ona pagamentu", tenik Ministru.
Ministru mós hatutan, Governu nia apoiu ba estudante sira mak sei selu propinas semestre impár 2021 nian ho pulsa dollar sanulu ($10) kada fulan, durante fulan tolu.
Partisipa iha asina memorandu ne'e, husi Reitór husi Universidade Públiku no Privadu sira, Diretora-Jerál Ensinu Superiór, Dra. Maria Filomena Lay Guterres, Diretór Ezekutivu ANAAA Profesór Dr. Edmundo Viegas, Vice-Prezidente INCT Profesór Dr. Afonso de Almeida, no konvidadu sira seluk.
Média UNTL : Agostinho da Cruz e Silva
Foto : Agostinho da Cruz e Silva