#TimorLeste #UNTL #VRAAGK #DNIT 22 Maiu 2021
Universidade Nacional Timor Lorosa’e (UNTL) nia Visereitór ba Asuntu Akadémiku no Garantia Kualidade (VRAAGK) Profesór Doutór Samuel Venâncio de Sousa Freitas, iha Kampus Sentrál UNTL nian, Díli (21/05) hateten graduandu hamutuk 251 prontu ona atu partisipa iha graduasaun online, iha loron 25 fulan Maiu 2021.
“Ita desidi graduasaun online ba iha 25 Maiu 2021 komesa tuku 9:55 dadeer to’o remata, ita sei halo ensaiu kona-ba distansiamentu ba estrutura sira ne’ebé sei partisipa direta, no graduandu sira liuhusi aplikasaun ne’ebé uza ba serimónia solene ne’e”, tenik Profesór Samuel.
Profesór Samuel mós husu ba graduandu sira atu hatais toga kompletu ne’ebé sira foti ona iha parte Diresaun Nasional Atendementu Estudante (DNAE) hamutuk ho família partisipa liuhusi via Zoom.
Iha fatin hanesan, Diretór-Jerál ba Servisu Administrasaun Akadémika, Sr. Armindo Leto Fátima, hateten, ekipa tékniku nia preparasaun halo ona rejista ba graduandu hamutuk na’in 251 mak prontu atu partisipa graduasaun online.
“Durante pedidu ne’e tama atu halo graduasaun online to’o husi parte akadémika rejista ona graduandu hamutuk na’in 251 na’in 241 mak mai foti ona toga ba graduasaun nian” tenik DJ Akadémika.
Sr. Leto mós hatutan, husi sira ne’ebé iha ona lista maibé lakonsege foti toga ba graduasaun nian maibé sira-nia diploma nafatin prodús husi universidade.
Iha sorin seluk, Diretór Diresaun Nasionál ba Informátika no Teknolojia (DNIT-UNTL), Sr Joanico Mendonça, hateten, ba graduandu sira atu prepara mak aparellu sira ne’ebé presiza durante serimónia graduasaun online mak hanesan telemovel ka laptop, no aplikasaun Zoom no seluk tan.
“Graduasaun Online importante ba graduandu sira atu prepara mak telemovel ka Laptop, pakote ba internet, instalasaun aplikasaun Zoom, no idaidak sei hetan link husi univesidade parte IT nian, ba kada graduandu liuhusi númeru telefone, WhatsApp, no Email ne’ebé rejista ona”, tenik Sr. Joanico.
Eventu ne’e sei transmite husi salaun Ian Martin INFORDEPE Balide, Díli, liuhusi servisu hamutuk entre UNTL-RTTL.E.P no Telkomcel hodi transmite graduasaun ba públiku, iha loron 25 Maiu 2021.
Graduandu na’in 251 ne’e kompostu husi fakuldade 5, Fakuldade Enjeñaria, Siénsia no Teknolojia (34), Fakuldade Edukasaun, Arte no Umanidade (71), Fakuldade Medisina no Siénsia Saúde (94), Fakuldade Ekonomia no Jestaun (17) no Fakuldade Siénsia Sosiál (35), entretantu graduandu husi Fakuldade Agrikultura ho Fakuldade Filozofia no Siénsia Umana sei partisipa iha graduasaun prezensiál sei wainhira Serka Sanitária remata.
Média UNTL : Agostinho da Cruz e Silva
Foto : Agostinho da Cruz e Silva