- Detalhes
- Escrito por Adelaide da Cunha
- Visualizações: 766
#TimorLeste #UNTL #FEAH #COVID19 #COVID19TL 03 Jullu 2021
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH, Ph.D, ho nia estrutura, hamutuk ho Dekanu, Diretór-Jerál, Diretór Nasionál sira inklui dosente, funsionáriu no estudante balun, hala’o vizita ba Profesór Miguel Maia dos Santos Nia horik fatin, Tuana-laran, Díli (3-07).
Profesór Miguel Maia dos Santos (Matebian) moris iha loron 6 fulan juñu 1962, no remata ona nia jornada moris iha loron 3 fulan jullu (7h30 dader), hodi husik hela família, estudante, kolega no amigu sira iha mundu ne’e.
Profesór Maia hanesan dosente iha Fakuldade Edukasaun, Arte no Umanidade (FEAH-UNTL). Adeus Profesór.
Média UNTL : Miguel Gonçalves
Foto : Agostinho da Cruz e Silva
- Detalhes
- Escrito por Adelaide da Cunha
- Visualizações: 2874
#TimorLeste #UNTL 03 Jullu 2021
Lori naran Sívitas Akadémika tomak UNTL nian hato’o kondolénsia profunda ba família enlutada Profesór Miguel Maia dos Santos.
UNTL lakon ona Profesór di’ak ida, ne’ebé fó dedikasaun maka’as ba Universidade Nacional Timor Lorosa’e.
Profesór Miguel Maia dos Santos, Docente Fakuldade Edukasaun, Arte no Umanidade-UNTL (06/06/1962- 03/07/2021).
Média UNTL
- Detalhes
- Escrito por Adelaide da Cunha
- Visualizações: 604
#TimorLeste #UNTL #PAMErmera #COVID19 #COVID19TL 02 Jullu 2021
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins MPH, PH.D, akompaña husi Proreitór no Diretór-Jerál Servisu Apoiu Reitoria, partisipa serimónia tomada-pose ba Prezidente Autoridade Munisípiu Ermera (PAM-Ermera), Sr. Eusebio Salsinha, iha Gleno (01/07).
Serimónia ne’e prezidi husi Ministru Administrasaun Estatál, S.E. Miguel Pereira de Carvalho, hodi fó pose ba PAM-Ermera nian, hodi lidera Munisípiu Ermera durante tinan 4, ba períodu 2021 to’o 2025.
Partisipa iha eventu ne’e Proreitór ba Asuntu Dezenvolvimentu Institusionál, Profesór Doutór Lelis Gonzaga, Proreitór ba Asuntu Planeamentu, Monitorizasaun no Avaliasaun, Profesór Nelson Salsinha, Ph.D., no Diretór-Jerál Servisu Apoiu Reitoria, Sr. Jacinto Belo.
Marka mós prezensa husi Vise-Ministru Administrasaun Estatál, S.E. Abilio José Caetano, Vise-Ministru Saúde, S.E. Bonifácio Mau Coli dos Reis, Autoridade Munisípiu Ermera, parte relijiozu, estudante, komunidade no konvidadu sira.
Média UNTL : Agostinho da Cruz e Silva
Foto : Agostinho da Cruz e Silva
- Detalhes
- Escrito por Adelaide da Cunha
- Visualizações: 2289
#TimorLeste #UNTL #COVID19 #COVID19TL 02 Jullu 2021
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH, Ph.D, fo pose ba Profesór Doutór Afonso Almeida nu’udar Visereitór ba Asuntu Pós-Graduasaun no Peskiza (VRPGP) ba períodu 2021 to’o 2026 iha Auditóriu Liceu (02/07).
Kargu ba Visereitór Asuntu Pós-Graduasaun no Peskiza antes ne’e asumi husi matebian Profesór Doutór Gabriel António de Sá hafoin hala’o nia knaar fulan ida, iha loron tolu fulan marsu hakotu nian jornada moris nian. Durante fulan hirak nia laran Visereitór ba Asuntu Akadémiku no Garantia Kualidade, Profesór Doutór Samuel Venâncio de Sousa Freitas, mak asume temporáriu knaar VRPGP nian.
Iha serimónia ne’e, Reitór agradese ba disponibilidade emposadu nian, tan prontu asumi kargu ne’e hodi kontinua hala'o atividade prioridade bazeia ba knar ne’ebé nia asumi ona.
“Ha’u agradese ba Profesór Doutór Afonso Almeida, tanba bele simu kargu ida ne’e no ami garante tanba Profesór iha esperiénsia barak iha área ne’ebé nia haknaar an” dehan Reitór.
Iha fatin hanesan, Visereitór ba Asuntu Pós-Graduasaun no Peskiza hateten, iha knaar foun ne’e, planu prioridade tolu nia sei realiza durante nia mandatu.
“Prioridade tolu ne’ebé sei realiza durante ha'u-nia mandatu mak hanesan, reativa fali kursu sira ne’ebé kansela tiha husi Ministériu Edukasaun ne’ebé kria iha tinan 2011, sei loke tan kursu foun bazeia ba rekursu ne’ebé iha ona hanesan, Mestradu no Doutoramentu nomós kursu Pós-Graduasaun balu ne’ebé iha kurta durasaun no atu mellora liután funsionamentu jestaun no tenta halo kooperasaun interkámbiu ho dosente lisensiatura sira", hatutan emposadu.
Partisipa iha serimónia ne’e husi Visereitór, Proreitór, Diretór sira husi kada Sentru, Dekanu Fakuldade no Estrutura, Diretora-Jerál Ensinu Superiór no Siénsia, Sra. Maria Filomena Lay Guterres (reprezentante Ministru Ensinu Superior, Siénsia no Kultura), Prezidente Komisaun Funsaun Públika, Profesór Doutór Faustino Cardoso Gomes, no konvidadu sira.
Média UNTL : Leonia Araújo (estajiária)
Foto : Leonia Araújo (estajiária), Pio Belo Ximenes (estajiáriu)
- Detalhes
- Escrito por Adelaide da Cunha
- Visualizações: 758
#TimorLeste #UNTL #DNRH #COVID19 #COVID19TL 2 Jullu 2021
Bazeia ba avizu husi Diresaun Nasional Rekursu Umanu-Universidade Nacional Timor Lorosa’e (DNRH-UNTL), husu ba kandidatu sira ne’ebé ho klasifikasaun kualifikadu iha ezame oral/entervista, atu bele mai aprezenta-an iha DNRH-UNTL, iha loron 05 fulan Jullu 2021.
Lista naran no avizu kompletu bele hare dokumentu aneksu ka liga direta ba DNRH-UNTL.
Média UNTL