#TimorLeste #UNTL #SeKOOP #COVID19 #COVID19TL 05 Jullu 2021
Universidade Nacional Timor Lorosa’e (UNTL) nia Magnífiku Reitór Profesór dr. João Soares Martins MPH, Ph.D, asina memorandu ho Sekretáriu Estadu Koperativa (SEKOOP) Sr. Elizario Ferreira, ho objetivu husi MoU ne’e maka planu ba futuru atu etabelese Departamentu Jestaun Kooperativa iha UNTL hodi hamosu Kooperativa iha Ensinu Superiór.
Reitór liuhusi entrevista iha Salaun Oka-Osindo, Díli (03/07) hateten, área Kooperativa ne’e importante tebes atu bele ajuda ekonómia nasaun nian tanba ne’e parte rua presiza tuur hamutuk hodi prepara rekursu umanu.
“Kooperativa ne’e, área importante atu ajuda dezenvolvimentu ekonómiku nasaun nian, tanba ne’e atu kria Deprtamentu Jestaun Kooperativa iha UNTL, presiza tu’ur hodi prepara rekursu umanu hamutuk, parte ne’e papel universidade nian maibé rekursu ba área atu hanorin kona-ba Jestaun Kooperativa nian mak universidade presiza dezenvolve ”, tenik Reitór.
Iha fatin hanesan, Sekretáriu Estadu Kooperativa Sr. Elizario Ferreira hateten, objetivu husi MoU ho UNTL ne’e atu estabelese Departamentu Jestaun Kooperativa hodi prodús rekursu umanu ho grau Lisensiatura.
“Asina MoU ho UNTL ne’e, primeiru atu estabelese Departamentu Jestaun Kooperativa iha UNTL hodi produs rekursu umanu ho grau lisensitura ne’ebé kompetetivu atu sustentabiliza institusionál, asegura mós estabilidade finanseira no ekonómika kooperativa nian”, tenik SEKOOP.
Parte seluk mos, atu hamosu kooperativa ensinu ida iha Ensinu Superior liuliu iha UNTL atu asegura poupansa iha nível dosente no estudante sira.
Partisipa iha Serimónia ne’e Proreitór ba Asuntu Kooperasaun dra. Lidia Gomes, Ministru Koordenador Asuntu Ekonómiku, Joaquim Amaral, Sekretariu Estadu Juventude no Desportu Sr. Abrão Saldanha, Embaixadór Cuba iha Timor-Leste Sr. Omar Marrero Betancourt, Funsionariu SEKOOP no Konvidadu sira seluk.
Média UNTL : Agostinho da Cruz e Silva
Foto : Agostinho da Cruz e Silva