#TimorLeste #UNTL #COVID19 #COVID19TL 06 Jullu 2021
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins MPH, Ph.D, hamutuk ho Sívitas Akadémika tomak partisipa Misa-Requem ba Profesór Miguel Maia dos Santos nian, iha Igreja Katedrál Dili (04/07).
“Ita iha sitasaun difisil tebes, tanba lakon ita-nia maun, mestre, aman ida iha ita nia le’et, lakon manorin na’in di’ak ida, lakon aman diak ida, Universidade Nasionál sente lakon tebes Profesór Maia maibé buat hotu Maromak nia Planu,” tenik Reitór.
Magnífiku Reitór mós husu diskulpa ba família sira karik antes ne’e iha atendimentu no liafuan ruma maksalak ba matebian durante hala’o nia servisu iha UNTL.
Iha fatin hanesan Archebispu Metroplitanu Diocese Dili, Dom Virgílio do Carmo da Silva, SDB, iha nia omilia hateten halibur hamutuk iha uma kreda hakarak ho sentimentu agradese ba Profesór Maia nune’e mós ba Maromak ba Nia kontribuisaun sira hotu.
“Ita halibur hamutuk iha ne’e, atu espresa ita-nia agradesimentu ba Sr. Miguel no ba Maromak ba dalan ne’ebé nia hili iha nia moris, atu la’o nu’udar sarani to’o mate, nomós hola parte iha Kristu Nia misaun atu hatudu dalan mai ita, haree ba kontribuisaun ne’ebé halo durante sei moris mak ohin loron ita hamutuk, ita mós sente hola parte iha Nia moris”, tenik Dom Virgílio.
Dom Virgílio mós agradese ba Profesór Maia nia inisiativa hodi estabelese Kapela Universidade Nacional nian, hanesan akadémiku ida presiza aprende siénsia maibé presiza mós reforsa vida espirituál nian.
Hafoin Misa-Requem Matebian nia isin mate lori liubá nia moris fatin Bobonaro hodi halot tuir lisan.
Miguel Maia dos Santos moris iha Loron 6 Fulan Juñu 1962, no hakotu nia jornada moris iha HNGV iha 7h30, 3 jullu 2021, ho idade tinan 59.
Partisipa iha Misa-Requiem ne’e Visereitór, Proreitór, Diretór-Jerál, Diretór Nacional, Dekanu, Vise-Dekanu, Diretor Departamentu, Xefe Departamentu, Korpu-Dosente, Estudante, Esposa Primeiru Ministru nian, Dra. Isabel Fereira, Embaixadór Portugal iha Timor-Leste José Pedro Machado Vieira no entidade sira seluk, família matebian no seluk tan.
Média UNTL 📝: Agostinho da Cruz e Silva
Foto 📷: Agostinho da Cruz e Silva