#TimorLeste #UNTL #FMCS #MESSK #COVID19 #COVID19T 7 JULLU 2021
Universidade Nasional Timor Lorosae (UNTL) nia Magnífiku Reitór, Profesór dr. João Soares Martins MPH, Ph.D, hamutuk ho Ministru Ensinu Superiór, Siénsia no Kultura (MESSK), SE Dr. Longuinhos dos Santos, inaugura edifísiu foun Fakuldade Medisina no Siénsia Saúde (FMCS), iha Kaikoli, (6/07).
“Agradese ba Reitór sesante, Profesór Doutór Francisco Miguel Martins ho nia estrutura, no MESSK, ne’ebé iha VIII Governu ho esforsu konsege harii edifísiu ne’e, maské iha situasaun difísil, moris ho orsamentu duo-désimu”, dehan Magnífiku Reitór iha nia diskursu.
Profesór Doutór João Soares Martins mós rekomenda ba Fakuldade ne’ebé utiliza edifísiu refere ho kuidadu, karik iha Fakuldade seluk presiza permiti mós ba sira tanba edifísiu ne’e hanesan patrimóniu, livre ba UNTL tomak bainhira presiza.
Ministru Ensinu Superior, Siénsia no Kultura, SE Dr. Longuinhos dos Santos hateten ho edifísiu foun ne’e sei garante rekursu umanu ne’ebé ho kualidade iha futuru.
“Edifísiu foun ida ne’e, UNTL ho kondisaun ne’ebé di’ak liu atu kumpri univerisdade nia misaun iha rekursu umanu ne’ebé kualidade, liuliu ba foin sa’e sira, tanba ne’e ha’u hakarak agradese no felisita komunidade akadémika ba konkretizasaun obra ida ne’e” tenik Dr. Longuinhos.
Edifísiu ne’e konstroi husi Kompaña Linier Engenering Unip.Lda, ho durasaun tinan ida ho balun komesa husi Novembru 2019 to’o no remata iha Juñu 2021, enkuantu formalmente universidade inaugura iha 6 Jullu ne’e.
Eventu ne’e hetan partisipasaun husi Visereitór, Pro-reitór, Diretór-Jerál, Diretór Nasionál, Dekanu, Visedekanu, Funsionáriu, Estudante sira, Reprezentante Ministériu Saúde, atuál Diretór-Jerál Ministériu Saúde, Sr. Marcelo Amaral, Prezidente Komisaun Funsaun Públika (CFP), Dr.Faustino Cardoso, no konvidadu sira.
Média UNTL : Leonia Araújo (estajiária)
Foto : Pio Belo Ximenes, Althur Ramos (estajiáriu)