#TimorLeste #UNTL #ParlamentoNacional #MS #MESSK #EmbaixadaXinaihaTL 14 Juñu 2021
Universidade Nacional Timor Lorosa’e (UNTL) nia Sívitas Akadémika hamutuk ho Komunidade Xineza iha Timor-Leste, hahú simu vasina COVID-19 Sinovac ne’ebé apoiu husi Repúblika Populár Xina . Vasinasaun ne’e sei kontinua to’o loron 30 fulan juñu 2021, iha Kampus Sentrál UNTL nian, hahú husi tuku 09:00 dadeer to’o remata.
“Agadese tebes tanba hili UNTL nu’udar fatin hodi halo lansamentu ba Vasina Sinovac ne’ebé hetan apoiu husi Governu Xina, ida ne’e oportunidade di’ak atu kompleta liután ita-nia luta kontra COVID-19 iha Timor-Leste”, tenik Magnífiku Reitór UNTL, Profesór dr. João Soares Martins MPH, Ph.D, iha Kampus Sentràl UNTL nian, Díli (14/06).
Reitór UNTL hatutan, setór edukasaun tantu ensinu superiór to’o ensinu ba pre-primáriu afetadu tebes, atu rekopera ho fasilidade, maibé liña internét ladun apoiu ba aula distánsia, tan ne’e ho vasina kompletu bele ajuda universidade reativa aula prezensiál.
Prezidente Parlamentu Nasionál, S.E. Dr. Aniceto Guterres, iha abertura husu ba joven sira no komunidade akadémika tomak atu koopera iha vasina iha Timor-Leste hodi aumenta ida-idak nia imunidade.
“Mai ita koopera, hamutuk konvida joven estudante UNTL, ha’u mós didika mensajen ne’e ba joven sira iha rai klaran tomak, liuliu Universitáriu sira hodi koopera iha programa vasina ne’ebé sei ajuda supera ita-nia situasaun hodi aumenta no hametin liután sidadaun ida-idak nia imunidade”, dehan Dr. Aniceto.
Ministru Ensinu Superiór, Siénsia no Kultura (MESSK), S.E. Dr. Longuinhos dos Santos, hateten, durante atividade ensinu hotu paradu tanba propagasaun surtu COVID-19, tanba ne’e liuhusi vasina Sinovac bele proteje an husi moras ida ne’e.
“Ita hotu hatene katak, atividade ensinu iha nível hotu hetan suspende tanba enfrenta propagasaun surtu COVID-19, ho razaun ida ne’e orsida ita hahú simu Vasina Sinovac ba komunidade akadémika para atu hahú proteje ita-nia an”, tenik MESSK.
Iha parte seluk, Embaixadór Xina ba Timor-Leste, S.E. Dr. Xiao Jiangu, iha nia diskursu hateten, komunidade akadémika sira prinsipál atu hetan vasina hodi rekopera Sistema Edukasaun iha Timor-Leste.
“Ha’u hatene komunidade akadémiku prinsipál atu simu vasina, Profesór, Universitáriu, no Funsionáriu sira, ha’u kontenti tanba Sinovac ajuda hodi rekopera Sistema Edukasaun iha Timor-Leste, tanba dadaun ne’e aula hotu paradu”, tenik Embaixadór Xina iha Timor-Leste.
Lansamentu ba Vasina Sinovac iha Timor-Leste ne’e realiza tanba servisu hamutuk entre UNTL, ho Governu liuhusi Gabinete Primeiru-Ministru, Ministériu Saúde, MESSK, Sentru Integradu Jestaun Krize (SIJK), Embaixada Xina iha Timor Leste no instituisaun relevante sira.
Partisipa iha lansamentu ne’e Sívitas Akadémika UNTL, Ministra Saúde, S.E. dr. Odete Belo, Ministru Defeza, S.E. Filomeno Paixão de Jesus, Ministru Edukasaun, Juventude no Desportu, S.E. Dr. Armindo Maia, Sekretáriu Estadu Juventude no Desportu, S.E. Abrão Saldanha, Embaixadór Xina ba Timor-Leste, S.E. Xiao Jiangu, Komuniade Xina iha TL no konvidadu sira.
Média UNTL : Agostinho da Cruz e Silva
Foto : Agostinho da Cruz e Silva