#TimorLeste #UNTL #VRAE 18 Juñu 2021
Universidade Nacional Timor Lorosa’e (UNTL) nia Visereitora ba Asuntu Estudantís, Profesora Eng.ª Lígia Tomás Correia, M.Sc, hasoru malu ho Asosiasaun Estudante nian husi Fakuldade sira ne’ebé eziste iha universidade hodi aprezenta programa estrakurrikulár ne’ebé planeadu atu implementa iha 2021 ne’e.
“Situasaun ida hanesan ne’e iha Serka-Sanitária, ita labele halo buat barak maibé nafatin esforsu hodi realiza iha parte ne’ebé bele, iha tinan ida ne’e, tanba antes ne’e ha’u mós hasoru malu ona ho Vise-Dekanu Asuntu Estudantís hodi partilla atividade 2021 nian ba sira hodi hetan apresiasaun,” tenik Visereitora iha sala Videokonferénsia Kampus Sentrál UNTL nian, Díli (16/06).
Profesora Lígia mós aborda atividade sira liga ba área Sientífika, Arte no Kultura, Istória no Sósiu-Polítika liuhusi kompetisaun ho forma Online no Prezensiál ho modalidade hanesan, Traballu Sientífiku, Jornál Parede, Produsaun Vídeo Badak, Fotografia, Gastronomia, Diskursu Públiku, Pintura, Trio-Vokál, Poema no Mestre-Serimónia.
Reprezentante Asosiasaun Estudante nian ba Konsellu Jerál UNTL nian, Moises Magno hateten katak situasaun atuál difikuldade ba atividade prezensiál sira maibé ho esforsu bele halo netik buat ruma hodi promove estudante sira.
“Mezmu ita iha situasaun ne’ebé defísil, VRAE ho nia ekipa nafatin fó posibilidade atu ita bele realiza atividade sira ne’e, hodi promove alin estudante sira ne’ebé ho poténsia, tanba ne’e apresia ba programa sira ne’e”, tenik atuál Prezidente Asosiasaun Estudante Fakuldade Filozofia no Siénsia Umana.
Partisipa iha enkontru ne’e Elvino Correia hanesan pontu fokal ba Asosiasaun sira iha Fakuldade, Prezidente Asosiasaun Fakuldade sira ho reprezentante sira.
Média UNTL : Agostinho da Cruz e Silva
Foto : Agostinho da Cruz e Silva