#TimorLeste #UNTL #VPM-MSSI #COVID19 #COVID19TL 09 Juñu 2021
Universidade Nacional Timor Lorosa'e (UNTL) nia Magnífiku Reitór, Profesór dr. João Soares Martins MPH, Ph.D, akompaña husi Proreitór ba Asuntu Planeamentu, Monitorizasaun no Avaliasaun, Profesór José Nelson Salsinha Ph.D, Diretór Nasional Planu i Finansa (DNPF), Sr. Egidio dos Santos Filipe, halo aprezentasaun planu Orsamentu Jerál Estadu (OGE-2022) nian, ba Vise-Primeira Ministra Asuntu Sosiais no Ministra Solidariedade Sosiál no Inkluzaun (VPMAS-MSSI), S.E. Armanda Berta dos Santos.
Magnífiku Reitór iha nia introdusaun hateten, OJE ba 2022 nian UNTL nia orsamamentu sa’e iha aumentu tanba nesesidade universidade nian liuliu iha dezenvolvimentu institusionál nian.
“Programa ba OJE 2022 nian, UNTL iha programa tolu, Programa Jeneru, Boa Governasaun, Jestaun Institusional no Ensinu Superior, kompara ho orsamentu 2021 ami aumenta tan maisumenus 4% atu responde ba nesesidade universidade nian liuliu kestaun biblioteka, laboratorium, saladeaula no seluk tan”, tenik Reitór iha salaun MSSI-Kaikoli, Díli (04/06),
Iha fatin hanesan, Diretór Nasional Planu i Finansa (DNPF), Sr. Egidio dos Santos Filipe, iha nia aprezentasaun hateten, OJE 2022 nian husi UNTL fahe ba parte rua liga ho programa PEDN no ODS.
“Iha OJE 2022 ami fahe ba parte rua hanesan programa ne’ebé alina ho Planu Estratéjiku DezenvolvimentuNasionál (PEDN) ho Objetivu Dezenvolvimentu Sustentavel (ODS) no projesaun anual ba 2022 nian”, tenik Sr. Egidio.
Aleinde ne’e, Instituisaun sira ne’ebé tutela ba MESSK mós hato’o sira-nia planu hanesan Ajénsia Nasionál ba Avaliasaun Akadémika (ANAAA), Institutu Politékniku Betano (IPB) no Institutu Nasionál Siénsia no Teknolojia (INCT).
Partisipa husi Vise-Primeira Ministra Asuntu Sosiais no Ministra Solidariedade Sosiál no Inkluzaun, S.E Armanda Berta dos Santos ho nia estrutura, Ministru Ensinu Superior Siénsia no Kultura, S.E. Longuinhos dos Santos, Prezidente no Vise-Prezidente, Diretór husi Instituisaun ne’ebé tutela ba MESSK.
Média UNTL : Agostinho da Cruz e Silva
Foto : Agostinho da Cruz e Silva