#TimorLeste #UNTL #VRAE #PAPMA #ANEDTL 09 Juñu 2021
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins MPH, Ph.D, akompaña husi Visereitór no Proreitór sira sorumutu ho Koordendór-Jerál ba Autoridade Nacional Expo Dubai (ANED-TL), Sr. Manuel Vong, ho nia ekipa hodi rona sira-nia preparasaun ba Espozisaun-Dubai iha Outubru 2021.
“Ami kongratula ba ita bo’ot sira-nia esforsu iha situasaun ida difísil tebes, no ita mós komprende ema barak nia preokupasaun no krítika oioin maibé ita mós la haluhan katak ita mós hola parte iha Komunidade Internasionál, tan ne’e eventu sira hanesan oportunidade ida”, tenik Reitór iha Sala Vídeo Konferénsia UNTL nian, Díli (09/06).
Profesór João mós akresenta liután katak, relasiona ho sorumutu refere universidade nasionál sei delega nia reprezentante ba iha Ekipa ANED-TL, hodi apoiu iha área ne’ebé ekipa ne’e presiza.
Iha fatin Sr. Manuel Vong iha nia entrevista hateten, hasoru malu ho Magnífiku Reitór hodi aprezenta preparasaun no partisipasaun iha Espozisaun iha Dubai.
"Enkontru ho Magnífiku Reitór kona-ba preparasaun no partisipasaun TL ba iha Expo-Dubai, oportunidade no dezafiu, ajenda ida mak universidade sira bele partisipa iha teknolojia inovasaun ligadu ho edukasaun, interkámbiu internasionál, entaun Timor-Leste liuhusi matenek na’in sira liuhusi universidade bele hola parte”, Tenik Eis Reitór DIT.
Sr. Manuel mós hatutan, ho presenza sira-nia iha UNTL, tanba instituisaun prodús rekursu di’ak iha área infrastrutura nian hanesan jeolojia, rekursu no minerais inklui área importante seluk.
Partisipa husi Visereitora ba Asuntu Esudantís, Profesora Eng. Ligia Tomás Correia, Proreitór ba Asuntu Planeamentu, Monitorizasaun no Avaliasaun (PAPMA), Profesór Nelson Salsinha Ph.D, Vise Komisáriu ANED-TL Sr. Arif Ahmad Sagran ho nia ekipa.
Média UNTL : Agostinho da Cruz e Silva
Foto : Agostinho da Cruz e Silva