#TimorLeste #UNTL #VRAE #UNWOMEN #COVID19 #COVID19TL 10 Juñu 2020
Universidade Nasional Timor Lorosa’e (UNTL) nia Magnífiku Reitór, Profesór dr. João Soares Martins MPH, Ph.D, ho Visereitora ba Asuntu Estudantís, Eng. Lígia Tómas Correia, partisipa iha reuniaun liu husi Zoom (10-6) ho Reprezentante UNWomen nian iha Timor-Leste Sra. Ramaya Salgado ho nia ekipa.
Objetivu enkontru ne’e, hodi diskute Programa Kampus Seguru (PKS) nian ne’ebé asina tiha memorandu iha 4 fulan marsu 2020 liubá, diskute mós atividade ne’ebé atu implementa iha tempu oin mai, iha ne’e mós parte UNWomen husu ba Universidade atu identifika pontu fokál ida atu servisu hamutuk ho UNWomen.
Programa Kampus Seguru nian ho vizaun atu empodera feto no labarik feto iha Timor-Leste atu goza sira-nia direitu livre husi asédiu seksuál no forma violénsia sira iha fatin privadu no públiku no bele asesu ba servisu ho kualidade aliña ho Objetivu Dezenvolvimentu Sustentavel (ODS).
Alende ne’e, parte rua ko’alia mós planu ba estabele komisaun ida iha UNTL atu kobre to’o iha Fakuldade sira atu implementa PKS nian ne’ebé planeadu ona iha akordu.
Média UNTL : Agostinho da Cruz e Silva
Foto : Agostinho da Cruz e Silva, Mateus Goncalves