#TimorLeste #UNTL #KIPKIUNTL #COVID19 #COVID19TL 11 Juñu 2021
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins MPH, Ph.D, reuni ho ekipa Komisaun Implementasaun Planu Kontijénsia Interna (KIPKI)-UNTL, ne’ebé lidera husi dra. Teresa A. Madeira Soares, BDS, MPH hodi diskute preparasaun ba vasinasaun Sinovac.
Iha sala VideoKonferénsia UNTL nian, Díli (11/06), Magnífiku Reitór hateten katak parte universidade diskute ona ho Ministéru Ensinu Superior, Siénsia no Kultura (MESSK) kona-ba abertura ba vasinasaun uza aimoruk Sinovac nian ne’ebé sei abertura husi S.E. Primeiru-Ministru RDTL, Taur Matan Ruak, loron-Segunda, 14 Juñu, hahú husi tuku 08:30 dadeer to’o remata.
“Horiseik reprezentante MESSK mai iha Gabinete Reitór husu ita-nia fatin atu halo lansamentu ba vasinasaun uza aimoruk Sinovac ba Sivitas Akadémika UNTL tomak iha resintu Kampus Sentrál tanba ne’e agradese ba inisiativa”, tenik Reitór.
Dadaun ne’e, Komisaun Implementasaun Planu Kontijénsia Interna (KIPKI)-UNTL hamutuk ho Magnífiku Reitór no nia estrutura koordena hela preparasaun ba eventu ne’e.
Enkontru ne’e akompaña husi Visereitór ba Asuntu Akadémiku no Garantia Kualidade Interna, Profesór Doutór Samuel Venâncio de Sousa Freitas, Diretór-Jerál Servisu Apoiu Reitoria, Sr. Jacinto H. S. Belo, ho nia Xefe Departamentu sira, Diretora Nasionál Lojístika no Manutensaun, Sra. Fátima Odete Monteiro ho Xefe Departamentu sira, Diretora Unidade Kurikulár Transversál, Profesora Natalia Pereira, no pesoál tékniku sira.
Media UNTL : Agostinho da Cruz e Silva
Foto : Agostinho da Cruz e Silva