- Detalhes
- Escrito por Mateus Goncalves
- Visualizações: 224
Universidade Nacional Timor Lorosa’e (UNTL) liuhusi Faculdade de Economia e Gestão (FEG), realiza atividade Feira Empreendedorizmu Arte no Kultura, iha ámbitu komemorasaun loron Masakre Santa Kruz 12 Novembru (1991-2023), iha Kampus Resende FEG nian, Díli (09/11).
Reprezentante Dekanu FEG nian, atuál Vise-dekanu Asuntu Estudantís Profesór Aleixo Ximenes hatete, ohin loron mudansa dinámika no fó presaun bo’ot ba joven sira, no afeita ba sosio-ekonómika, sosiopolítika no sosiokultural, nu’udar joven dalan ne’ebé mak liuhusi empreendorizmu.
“Ha’u husu joven sira tenki iha vontade atu esforsu hodi aselera prosesu dezenvolvimentu ekonomia, husi parte kultura hodi promove produtu lokál hodi trava importasaun, tanba ekonomia forte nasaun forte’’, dehan Profesór Aleixo.
Iha fatin hanesan Ministru Juventude Desportu Arte no Kultura (MJDAK) S.E. Nelio Isaac Sarmento hatete, joven tempu uluk laiha oportunidade hanesan agora, tanba sira moris iha presaun psikolójika, laiha espasu livre ba sira hodi espresa sira-nia hanoin, maibé sira só bele oferese vida ba libertasaun pátria.
“Joven sira presiza muda sira-nia aan hodi sai husi karakter dependénsia ba karakter kontribuitór. Liuhusi hanoin ne’ebé inovativu atu hasa’e kualidade ekonomia liuhusi prátika produtu lokal sira ne’ebé imi halo. Atu nune’e iha futuru imi bele kontribui ba dezenvolvimentu ekonomia rai-laran” dehan MJDAK.
Prezidente Asosiasaun Akadémika Estudantíl, José António da Silva hatete, atividade ne’e ho objetivu atu komemora loron Masakre Santa Kruz 12 Novembru, atu halibur estudante sira no loke biban ba estudante sira nu’udar futuru empreendedor atu hatudu sira-nia produtu ne’ebé kreativu no kompetitivu.
‘’Feira ne’e sai hanesan parte ida atu promove kualidade estudante sira-nian, nu’udar empreendedor ida diak iha futuru no bele haforte liutan sira-nia espíritu empreendedorizmu”, dehan Senadu.
Atividade ne’e organiza liuhusi servisu hamutuk Komisaun Organizadora, Senadu Estudante Akademika ho estrutura kakuldade. Konta mós ho partisipasaun dosente, funsionáriu, estudante Ensinu Sekundariu 12 de Novembru, Universidade Dili (UNDIL) inklui estudante sira FEG nian.
#TimorLeste #UNTL #FEG #MJDAK 09 Novembru 2023
Média UNTL 📝: Regina de Carvalho/ Mario Jonio (estajiáriu)
Foto 📷: Regina de Carvalho/ Mario Jonio (estajiáriu)
- Detalhes
- Escrito por Mateus Goncalves
- Visualizações: 215
Universidade Nacional Timor Lorosa’e (UNTL) nia Magnífiku Reitor Profesor dr. João Soares Martins, MPH.Ph,D, sai oradór iha Semináriu Internasionál audiovizual ho tema “Poder Transformador do Audiovisual na Educação”, organiza liuhusi servisu hamutuk UNTL ho CAMSTL (Centro de Audiovisual Max Stahl Timor-Leste).
Iha Auditóriu Fundação Oriente, Díli (7/11), Magnífiku Reitór hatete, eventu refere hanesan opurtunidade ida atu bele partilla kona-ba poder transformador audiovisual iha edukasaun ba estudante sira nomós atu selebra istória nia papel ba iha edukasaun.
“Ohin loraik ne’e ha’u mós hetan opurtunidade hodi fahe ituan kona-ba poder transformador audiuvisual iha edukasaun. Ita mós bele hatene Papel Istória nian iha edukasaun no atu ita bele kontinua transmiti valór ne’ebé mak Max Stahl rai hela ba ita hodi bele hetan benefísiu husi audiovisual iha ita nia rain hodi fó vantajen ba estudante sira atu bele uza didi’ak ba sira-nia estudu no saida mak sira presiza”, dehan.
Partisipa husi Visereitora ba Asuntu Estudantís Profesora Ligia Tomas Correia, Secretario Estado Comunicação Social, S.E. Espedito Dias Ximenes, Funsionáriu, ekipa husi CAMSTL nian, Estudante no Konvidadu sira.
#TimorLeste #UNTL #CAMSTL 9 Novembru 2023
Média UNTL 📝: Laurindo da Cruz Gomes
Foto 📷: Laurindo da Cruz Gomes
- Detalhes
- Escrito por Mateus Goncalves
- Visualizações: 251
Universidade Nacional Timor Lorosa'e (UNTL) liuhusi Visereitór ba Asuntu Pós Graduasaun no Peskiza (VRAPGP) nia estudante Mestradu iha area Medisina Tropikal no Saúde Komunitária (MTSK) liuhusi matéria Promosaun Saúde, halo sosializasaun kona-ba moras Dengue, Kankru no Mal Nutrisaun ba komunidade iha Suku Hatuquero, postu-administrativu Railaco, Munisípiu Ermera (7/11).
Iha diskursu, Visereitór ba Asuntu Pós-Graduasaun no Peskiza nian, Profesór Afonso de Almeida hatete, sosializasaun ne'e importante tebes, tanba estudante kursu mestradu iha área Medisina Tropikal no Saúde Komunitária, iha materia ida Promosaun Saúde nian, tanba ne'e sira fó informasaun kona-ba moras sira ne'ebé afeta ba saude.
"Ohin ami mai iha ne'e, lori estudante kursu mestradu iha área Medisina Tropikal no Saúde Komunitária liuhusi materia ida kona-ba Promosaun Saúde nian, mai fahe informasaun kona-ba moras sira ne'ebé afeta ba ita ema nia isin no liuliu oinsa bele prevene an husi moras sira ne'e", dehan Profesór Afonso.
Iha sorin seluk, Xefe Aldeia Caitarahei iha Suku Fatuquero, Sr. Tiago Soares hatete, orgullu boot ba aldeia ida ne'e, tanba bele hetan informasaun importante tebes husi UNTL, fiar katak informasaun sira kona-ba prevene an husi moras oioin.
"Ohin orgullu boot ba ami aldeia ida ne'e, tanba UNTL bele hili ami-nia aldeia hodi fahe informasaun sira kona-ba prevene moras oioin iha ita nia isin, no ami hein katak informasaun sira ne'e sei tulun ami nia komunidade bele prátika iha sira-nia moris", tenik Sr. Tiago.
Iha sosializasaun ne'e, estudante sira halo mós tratamentu direta ba komunidade iha aldeia refere, inklui halo tratamentu iha Postu Saúde Hatuquero nian.
Partisipa husi dosente ba matéria Promosaun Saúde nian, Sra. Henriqueta da Silva, funsionáriu sira VRAPGP nian, Xefe Sentru Saúde Railaco, Sr. Virgilio Napoleão da Cruz Soares, Inan-Aman no Estudante Eskola Primaria Caitarahei nian.
#TimorLeste #UNTL #VAPGP 9 Novembru 2023
Média UNTL 📝: Leonia de A. da Costa
Foto 📷: Leonia de A. da Costa
- Detalhes
- Escrito por Mateus Goncalves
- Visualizações: 204
Universidade Nacional Timor Lorosa'e (UNTL), nia Magnífiku Reitór Profesór dr. João Soares Martins MPH, Ph.D, partisipa iha kongresu internasional “Kompras Públika” nian, ba dala tolu (3) ne'ebé organiza husi Faculdade de Direito hamutuk ho Universidade do Minho Portugal, durante loron rua (8 to'o 9 Novembru 2023).
Kongresu ne'e hala'o iha Auditóriu Ministério da Justiça (MJ) nian, Dili (08/11), ho objetivu, atu fahe koñesimentu kona-ba kompras públiku, dezafiu globál no lokal, nune'e estudante sira bele hatene iha nível internasionál no nasionál.
Partisipa iha kongresu ne'e, Dekanu Faculdade de Direito (FD), Profesór Isidoro Viana da Costa, Profesór sira husi Universidade do Minho, Dosente no Estudante sira.
#TimorLeste #UNTL #FD #MJ #UniverdadedoMinho 9 Novembru 2023
Média UNTL 📝: Denilson Amandio Barros
Foto 📷: Denilson Amandio Barros
- Detalhes
- Escrito por Mateus Goncalves
- Visualizações: 218
Universidade Nacional Timor Lorosa'e (UNTL) hamutuk ho Centro Audionvizuál Max Stahl Timor-Leste (CAMSTL), realiza semináriu internasional audionvizuál Max Stahl nian, ho tema "Konsolida no Hametin Papél Audiovizuál no Impaktu ba Istória Konstrusaun Estadu", iha Auditóriu Fundasaun Oriente, Díli (07/11).
Iha diskursu Magnífiku Reitór agradese ba Ekipa CAMSTL, ne'ebé fó oportunidade mai UNTL bele organiza hamutuk semináriu internasionál ne'ebé sei halo durante loron tolu nune'e bele halo diskusaun no partilla hanoin hodi bele konserva riku-soin no filmajen ne’ebé saudozu Max Stahl halo ona.
"Agradese ba CAMSTL ne'ebé fó oportunidade mai UNTL bele organiza semináriu hamutuk, nune'e ita bele deskobre riku-soin no filmajem sira ne'ebé iha ligasaun ho rai ne'e nian, atu nune'e jerasaun foun sira bele hadomi sira-nia rain hodi bele kontinua defende nasaun ne'e," dehan.
Iha fatin hanesan Diretór CAMSTL, Sr. Eudicitio Pinto, hateten semináriu ne'e atu motiva, konserva memoria istória no indentidade nasaun nian, hanesan riku-soin ba estadu no nasaun liuhusi audiovizuál.
"Objetivu husi semináriu ne'e, atu hatudu importansia ba konservasaun moris nian liuhusi istória nune'e ita bele hatene kona-ba koñesimentu aktu ba independensia Timor-Leste nian, hodi bele sai hanesan odamatan ida ba iha mundu tomak", dehan Diretór CAMSTL.
Semináriu ne'e hala'o durante loron tolu hahú husi loron 7 to'o 9, nomós halo espozisaun durante fulan ida.
Partisipa husi Visereitora ba Asuntu Estudantís Profesora Ligia Tomas Correia, Proreitór ba Asuntu Kooperasaun, Profesór Tomé Xavier Jerónimo, Secretario Estado Comunicação Social, Espedito Dias Ximenes, Embaxadór Brazil, Mauricio de Assis, Funsionáriu, ekipa husi CAMSTL nian, Estudante no Konvidadu sira.
#TimorLeste #UNTL #CAMSTL 7 Novembru 2023
Média UNTL 📝: Denilson Amandio Barros
Foto 📷: Denilson Amandio Barros