Universidade Nacional Timor Lorosa’e (UNTL) liuhusi Faculdade de Ciências Sociais, Departamento Comunicação Social nian estudante sira halo sosializasaun kona-ba Perfíl Departamentu nian ba Estudante Ensino Secundária Geral (ESG) Paralelo Fleixa, Fernando Lasama de Araújo, ne'ebé lokaliza iha Postu Administrativu Maubisse, Suku Aituto.
Estudante Carlota Alves hateten, liuhosi sosializasaun ida-ne'e hodi kaderniza sira atu bele ho vizaun no badinas estuda hodi tama iha UNTL liu-liu iha Departamento de Comunicação Social.
"Ohin loron ha'u senti kontenti tebes ho bin-maun husi DCS sira-nia prezensa tanba, bele fahe hamutuk esperénsia ne'ebé sira hetan iha banku Universitáriu nian ba ami, liu-liu oinsa atu hakerek Notisia, Rádiufoniku, Foto Jornalizmu, Prátika Redasaun no Televiziva inklui Asesoria Imprensa", dehan Alves iha Ensino Secundária Geral Paralelo Fleixa (15/06).
Aleinde ne'e manorin husi eskola ESG Fernando Lasama de Araújo, José da Silva Lopes akresenta, sosializasaun ida ne'e tulun tebes estudante sira no influénsia, tebes estudante sira bele hili Área Komunikasaun Sosiál nian.
"Sosializasaun ida ne'e Ha’u bele dehan katak, atu habelar liutan koñesimentu estudante sira nian liu-liu komunikasaun, atu estudante sira iha ensinu sekundária ne’e bele iha koñesimentu no motiva liutan sira hodi aprende liutan to’o iha universidade. Tanba, aban bainrua bele sai estudante ne'ebé kualidade iha aréa Jornalismu nian, presiza mós apriende, entaun liuhusi ida-ne'e prezensa universitáriu sira-nian hodi habelar vizaun no misaun DCS nian", dehan.
Iha fatin hanesan estudante husi Departemento Comunicação Social Zequino G. V. Soares hateten, liuhusi sosializasaun refere sai hanesan oportunidade ida hodi fahe koñesimentu ne'ebé iha ligadu ho matéria ne'ebé hetan iha banku universitáriu nian.
"Sosializasaun ida-ne'e sai hanesan oportunidade ida ba ami hodi bele fahe koñesimentu balun kona-ba matéria balun ne'ebé hetan iha banku universitáriu atu nune'e bele fahe fila-fali ba alin sira iha ensinu sekundáriu.
Iha momentu ne'e sente kontente tebes tanba hetan partisipasaun másimu husi estudante sira tanba, sira kuriozu tebes atu hatene kle'an kona-ba Jornalismu nian liuhosi lansa pergunta iha oin hodi buka hatene saida maka ita fó ba sira", hatutan.
Sosializasaun refere realiza iha ámbitu atividade Bina-Akrab 2024 hamutuk ho estudante, dosente, alumni, autoridade lokál no komunidade sira iha suku Aituto durante loron tolu (13-16 Juñu 2024).
Média UNTL 
: Deonisia Soares Martins (estudante DCS)
: Deonisia Soares Martins (estudante DCS)Foto
: Elizita Fernandes (estudante DCS)
: Elizita Fernandes (estudante DCS)