Universidade Nacional Timor Lorosa’e (UNTL) nia Magnífiku Reitór Profesór dr. João Soares Martins, MPH, Ph.D fó posse ba estrutura Asosiasaun Akadémika Estudantís Fakuldade (AAEF) na’in tolu nulu (30) ba Períodu (2024-2026) ne’ebé organiza husi Gabinete Visereitoria ba Asuntu Estudantís, iha Kampus Sentral, Díli (07/06).
Iha diskursu Reitór agradese ba estrutura AAEF tuan nomós ba Visereitora Asuntu Estudantís ne’ebé mak diriji no akompaña nafatin Asosiasaun Akadémika Estudantís Fakuldade sira no bele realiza tomada de posse ba estrutura foun ba períodu 2024-2026.
“Parabéns ba esturutura foun ba períodu 2024-2026, husu ba imi hotu prontu atu simu responsabilidade ida-ne’e hanesan dalan di'ak ida ba imi, tanba ho koñesimentu ne’ebé imi iha sai hanesan bukae no baze ba imi nune’e bele sai mós lideransa iha futuru”, dehan Reitór.
Reitór mós husu ba estrutura AAEF foun sira hotu, nafatin estuda no kria ambiente amigável no saudável iha Universidade atu nune’e bele alkansa misaun universidade nian iha tripla misaun ba iha ensinu, peskiza no servisu komunitária nian.
Iha fatin hanesan AAEF emposadu foun Cesar João M. Baptista hatete, ohin ofisialmente simu posse hodi substitui knaar hanesan Asosiasaun Akadémika Estudantís Fakuldade (AAEF) ba Períodu 2024-2026 no termu de posse ne’e hanesan konseitu jurídika ne’ebé hateten, knaar ida ne’e la permanente no temporaria deit ho nune’e nafatin kontinua servisu ne’ebé iha ona.
“Lori Estrutura AEEF foun hakarak agradese ba Magnífiku Reitór, Visereitora ho nia estrutura no senadu sesante konsege realiza tomada de posse ba períodu 2024-2026, hodi asume responsabilidade ida-ne’e kompromete no defende estudante sira-nia direitu tuir Estatutu Asosisaun Akadémika nian.
Asosiasaun mós sei prontidaun tomak atu servisu hamutuk ho sivitas akadémika ne’ebé integra iha UNTL hodi apoiu programa sira ne’ebé iha benefísiu di'ak ba estudante iha tripla pilár akadémika nian”, dehan Cesar, Prezidente AAEF husi Fakuldade de Direitu.
Média UNTL 
: Eugenia de Jesus Guterres
: Eugenia de Jesus GuterresFoto
: Mario Jonio
: Mario Jonio