Universidade Nacional Timor Lorosa'e UNTL nia Faculdade de Ciências Sociais, Departamento Comunicação Social hala'o Bina-akrab no apoiu servisu iha kapela AVE-MARIA AITUTO, atu hametin amizade entre estudante ho Docente no komunidade sarani sira iha suku Aituto, durante loron tolu (13-16 Juñu).
Prezidente Komisaun Organizadora Sebastiana Ximenes Soares hateten, atividade bina-akrap ne'e hala’o kada tinan tinan estudante ho dosente no alumni sira atu kria lasu amizade hamutuk ho komunidade sira liuhusi atividade sira mak hanesan servisu sosiál, sosializasaun no limpeza jeral.
"Hanesan Prezidente Komisaun Organizadora ba atividade ida ne'e inisiativa mai hosi ami estudante ho dosente no alumni sira hodi hili suku Aituto-Fleixa sai hanesan fatin hodi halo atividade bina-akrab no atividade ne’ebé maka ami halo hanesan ajuda komunidade sira mak atividade apoiu servisu fíziku, lalin fatuk no ajuda badaen sira iha kapela Ave-Maria Aituto nian.
Ita mós halo sosializasaun ba estudante iha Ensino Secundária Jerál Paralelo Fernando Lasama de Araujo Aituto, iha mós noite-kultura (animasaun múzika, dansa-tradisionál, poezia, no loke filme DCS nian) ba komunidade inklui autoridade lokál suku Aituto nian. Aleinde ne’e halo limpeza jeral iha fatin ne’ebé ami iha ba hanesan aredór suku no kapela nian", dehan Prezidente Komisaun Organizadora iha Aituto (15-06).
Iha fatin hanesan estudante Esquiel da Costa Pinto, sente kontenti ho atividade Bina-akrab ne’e, tanba bele koñese malu di’ak liutan entre estudante, dosente, alumni no komunidade sira.
"Ha’u hanesan estudante foun tinan akadémiku 2024 nian sente orgullu ho atividade ida ne’ebé organiza hosi Departamento Comunicaçāo Social sira. Tanba liuhusi atividade ida ne’e ami bele kria amizade no apriende hamutuk ho sira liuliu ajuda Komunidade sira no halo mós atividade seluk", dehan.
Iha fatin hanesan Xefe suku Aituto, Grigorio Lopes Pereira agradese ba DCS, tanba bele hili Aituto hanesan lokál ba atividade oioin ne’ebé bele ajuda komunidade no sarani sira iha Aituto.
“Lori komunidade Aituto agrdese ba DCS liuliu estudante, dosente, alumni sira tanba bele mai iha Aituto ne’e ho atividade oioin ne’ebé bele ajuda komunidade, ne’e hatudu ona estudante sira mak sai ajente transformadór ba dezenvolvimentu”, dehan Finalista husi DCS-FCS ne’e.
Dosente responsável ba atividade Servisu Sosiál iha DCS, Mestre Miguel Gonçalves hateten, atividade ne’e departamentu la’ós kria de’it amizade entre estudante foun, estudante tuan, dosente, no alumni sira maibé hakbesik ba komunidade hodi halo mós atividade servisu sosiál.
“Liuhusi atividade Bina-akrab ne’e ita fahe ba sesaun lubuk ida atu lori estudante sira kumpri pilár universidade nian hanesan edukasaun, peskiza no servisu sosiál, nune’e hakbesik ba serbí komunidade”, dehan.
Atividade realiza ho apoiu husi estudante, dosente, alumni DCS nian no kolabora ho autoridade lokál suku nian, Amu Paroku Maubisse nian inklui Katekista sira husi Kapela Ave-Maria Aituto nian.
Média UNTL 
: Elizita Fernandes (estudante DCS)
: Elizita Fernandes (estudante DCS)Foto 
: Deonisia Soares Martins (estudante DCS)
: Deonisia Soares Martins (estudante DCS)