UNTL-FMCS REALIZA CAPING DAY HODI HALO JURRAMENTU BA ESTUDNTE SIRA

Universidade Nacional Timor Lorosa'e (UNTL) nia Faculdade de Medicina Ciências da Saúde (FMCS) realiza Caping Day hodi halo Jurramentu ba estudante husi Eskola Superiór Enfermajen no Parteira hamutuk atus-rua tolu-nulu resin tolu, iha salaun Delta Nova, Díli (14/06).

 

Magnifiku Reitór hato'o parabéns ba estudante sira, tanba durante ne'e tuir aula no liuhusi jurramentu hodi bele sai fonte di'ak hodi kuidadu komunidade nia saúde iha Timor-Leste.

 

"Ohin ita boot sira marka tan istória foun ida iha FMCS no Universidade, tanba ne'e parabéns ba imi hotu ne'ebé ohin halo jurramentu antes ba prátika iha ospital no klínika sira, espera katak imi bele sai fonte ne'ebé di'ak hodi servi komunidade sira, husu mós atu bele prátika tuir saida mak imi promete ona iha loron ohin", dehan Reitór.

 

Dekana FMCS nian, Profesora Lídia Gomes hatete, Caping Dday ne'e sai nu'udar programa importante ida ba FMCS nian, liuliu ba Eskola Superior Parteira no Enfermajen semestre tres sira, antes ba halo prátika iha klínika ka ospital sira.

 

"Caping Day ne'e nu'udar programa importante ida ba ami nia Fakuldade liuliu iha estudante Eskola Superior Parteira no Enfermajen, antes sira ba prátika iha komunidade, klínika ka ospital sira, tenke Capping Day no juramentu, nune'e sira bele servisu ho domin no justu", dehan Dekana FMCS.

 

Lizeti Tailala Laranjinha Simoes, estudante husi eskola Superior Enfermajen nian hatete, durante ne'e aprende teoria iha aula no sira halo promesa antes ba prátika iha terenu.

 

"Kontente no agradese tebes ba loron ohin, tanba loron ne'e importante tebes mai ami, durante ne'e ami aprende deit iha aula, maibé ohin to'o ona faze Caping Day ka juramentu, tanba ami presiza prátika ho justu hodi kuidadu pasiente sira ho di'ak liután", tenik Lizeti.