Universidade Nacional Timor Lorosa'e (UNTL) nia estudante Faculdade de Medicina Ciência da Saúde (FMCS) kontribui no arranja rasik ekipamentu báziku sira hodi kompleta fasilidade ne’ebé universidade no parseiru sira prepara ona, nune’e bele uza ba hala'o prátika iha kampus.
Tuir Dekana FMCS nian, Profesora Lídia Gomes hatete, estudante sira arranja rasik ekipamentu báziku sira hanesan daun sona ema, seringa, vitamina hodi apoiu sira-nia prátika iha aula laran antes ba prátika iha sentru saúde sira.
"Estudante sira arranja rasik ekipamentu báziku sira hanesan, daun sona ema, seringa, no vitamina hodi apoiu deit prátika iha aula laran, maibé doadores sira mak apoiu ekipamentu boot sira ne'ebé iha laboratóriu hanesan manekin no seluk tan, ami mós esforsu hela atu sosa tan ekipamentu báziku sira hodi apoiu di'ak liután sira nia prátika", dehan Dekana FMCS.
Reprezentante estudante Lizeti Tailala Laranjinha Simões husi estudante Eskola Superior Enfermajen hatete, sira prepara duni ekipamentu báziku sira hodi uza ba prátika, tanba ne'e husu ba universidade atu apoiu ekipamentu báziku sira-ne'e hodi tulun liután sira-nia prátika.
"Ami arranja rasik ekipamentu bázika sira hanesan, daun sona ema, saringa no vitamina hodi prátika de'it iha kampus, tanba ne'e husu ba universidade bele apoiu mós ekipamentu báziku sira-ne'e hodi tulun ami-nia prátika ne’ebé di’ak liután", dehan Lizeti.
Média UNTL 
: Mario Jonio Mendonça
: Mario Jonio MendonçaFoto
: Leonia de Araújo da Costa
: Leonia de Araújo da Costa