- Detalhes
- Escrito por Mateus Goncalves
- Visualizações: 1990
#TimorLeste #UNTL #MESCC #COVID19 #COVID19TL 18 Agostu 2021
Universidade Nasional Timor Lorosa’e (UNTL) liuhosi Visereitór Administrasaun Finansa no Administradór-Jerál (VRAFAG), Profesór Hélio A.X. Maquei, Ph.D, hasoru malu ho Ministériu Ensinu Superiór, Siénsia no Kultura (MESSC) nia Diretór ba Inspesaun-Jerál, Sr. Jezinho Alves, hodi rona implementasaun subsidiu propinas tinan 2021, iha Kampus Sentrál UNTL nian, Díli (16/08).
“Relasiona ho transferénsia konsesaun públika ne’ebé tama ona iha konta operasionál UNTL nian, iha 15 jullu 2021, ita hetan transferénsia husi Ministériu Finansas ba apoiu subsidiu propinas no pulsa internet nian”, dehan Profesór Hélio.
Visereitór mós hateten, iha UNTL estudante sira selu propinas ho modalidade rua (2) de’it 30 dólar ba estudante ativu aula no 5 dólar ba estudante livre teoria.
Iha fatin hanesan, MESKK nia Diretór ba Inspeksaun Jerál hateten, bazeia ba Diploma Ministeriál 34/2021, 19 Maiu artigu 5 fó kompeténsia ba iha komisaun hodi halo monitorizasaun no fiskalizasaun ba iha instituisaun ensinu superiór públiku no privadu sira, kona-ba implementasaun subsídiu propinas no pulsa ba estudante sira.
“Ami-nia ekipa atu haree kona-ba prosesu implementasaun subsídiu propinas no pulsa, tanba ne’e ami-nia knaar atu halo monitorizasaun, fiskalizasaun no komfirmasaun dadus sira ne’ebé justu, katak 90 dias Instituisaun Ensinu Superiór sira tenki relata progresu mai ami bazeia ba dadus ne’ebé sira submete,” tenik Sr. Jezinho.
Reuniaun ne'e partisipa husi MESKK nia Diretór ba Inspeksaun-Jerál ho nia ekipa, Visereitór Administrasaun Finansa no Administradór-Jerál (VRAFAG) Profesór Hélio A.X. Maquei ', Ph.D, no funsionáriu sira.
Média UNTL 📝 : Altur Ramos (estajiáriu)
Foto 📷 : Altur Ramos (estajiáriu)
- Detalhes
- Escrito por Mateus Goncalves
- Visualizações: 1483
#TimorLeste #UNTL #COVID19 #COVID19TL 18 Agostu 2021
Amu Kapelaun UNTL nian, Padre Nívio Lebre Correia, Fdcc
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH, Ph.D, hamutuk ho estrutura no Sívitas Akadémika universidade nian, selebra misa ba loron 40 matebian na'in haat (4) ho dosente no estudante UNTL nian ne’ebé remata ona sira-nia peregrinasaun iha mundu.
Relasiona ho misa iha Kapela São João Paulo II, Hera (13/08), Magnífiku Reitór agradese ba Amu-Kapelaun, Visereitór , Proreitór, dosente no estudante sira no família matebian sira hotu ne’ebé partisipa misa refere.
“Mai ita hanoin hamutuk ita-nia Profesór Miguel Maia no maluk matebian sira ne’ebé mak fó ona sira-nia kontribuisaun ba UNTL hanesan, Profesór Doutór Gabriel António de Sá, Profesór Henrique Mau-Doben da Costa, Profesór Felix de Oliveira, Profesór Doutór Cristovão Ramiro Belo, inklui dosente, funsionáriu no estudante sira ne’ebé husik ona mundu, hodi fiar metin katak, espiritualmente sira nafatin hamutuk ho ita hodi lori UNTL sai di’ak liután”, tenik Magnífiku Reitór.
Reitór mós enkoraja Sívitas Akadémika tomak ne’ebé dadaun ne’e servisu iha UNTL, atu kontinua hatutan servisu ne’ebé matebian sira halo ona ho dedikasaun no sakrefísiu hirak ne’ebé husik hela atu dezenvolve UNTL, atinje vizaun exelente iha Timor-Leste.
Iha fatin hanesan, Amu Kapelaun UNTL nian, Padre Nívio Lebre Correia, Fdcc, iha omilia hateten, selebrasaun eukaristia ne'ebé realiza hanesan mistériu ne’ebé ema halo hamutuk, ho fiar katak, matebian sira halo ona tranzisaun moris mundu nian ba moris Maromak nian.
“Ita bele dehan katak, mistériu mate ida ne’e fó hanoin filafali mai ita atu konsiente katak, loron ida ita sei mate, ne’e hanesan serteza boot ida ba ita-nia vida, bainhira de’it hanesan reflesaun ba ita sira ne’ebé sei viajen ka moris hela iha mundu” tenik Pe. Nivio.
Hafoin remata misa ne'e, Reitór hamutuk ho estrutura no membru UNTL tomak kari aifunan no sunu lilin iha Kruz Kapela São João Paulo II nia oin hanesan sentidu omenajen ba matebian sira.
Partisipa misa matebian ba loron 40 ne’e, Visereitór, Proreitór, Dekanu, Diretór, funsionáriu, dosente no estudante sira.
Média UNTL 📝 : Leonia de A. da Costa (estajiária)
Foto 📷 : Denilson A. Barros (estajiáriu)
- Detalhes
- Escrito por Mateus Goncalves
- Visualizações: 516
#TimorLeste #UNTL #Paragon InternationalUniversityCambodia #COVID19 #COVID19TL 18 Agostu 2021
Proreitora ba Asuntu Koperasaun, Professora Doutora Lídia Gomes, SKM, MPH, Magnífiku Reitór UNTL Profesór dr. João Soares Martins, MPH, Ph.D, Visereitóra ba Asuntu Estudantís, Profesora Eng. Lígia Tomás Correia, MSc no Visereitór ba Asuntu Akadémiku no Garantia Kualidade, Profesór Doutór Samuel Venâncio de Sousa Freitas
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH, Ph.D, asina akordu kooperasaun liuhusi Zoom ho Paragon International University-Cambodia 🇰🇭, hodi koopera liuhusi realiza semináriu-konjuntu, konferénsia via-online iha ámbitu Pandemia COVID-19.
Relasiona ho eventu refere UNTL nia Proreitora ba Asuntu Koperasaun, Professora Doutora Lídia Gomes, SKM, MPH hateten, Memorandum of Understanding (MoU) refere atu instituisaun rua bele koopera iha semináriu-konjuntu, konferénsia liuhusi online iha ámbitu Pandemia COVID-19.
Paragon International University-Cambodia
“Atividade ohin ne'ebé ita hala’o atu asina MOU ho Paragon International University Cambodia, atu halo kooperasaun entre universidade rua ne’e hodi hala’o hamutuk semináriu no konferénsia liuhusi online tanba ita enfrenta hela kondisaun COVID-19, ita labele halo presensiál ita bele halo liuhusi webinar,” tenik Doutora Lídia, iha sala Video Conferência UNTL nian, Díli (16/08).
Magnifiku Reitór, Profesór dr. João Soares Martins MPH.Ph.D, Visereitór ba Asuntu Akadémiku no Garantia Kualidade, Profesór Doutór Samuel Venâncio de Sousa Freitas, Visereitóra ba Asuntu Estudantís, Profesora Eng. Lígia Tomás Correia, MSc, no funsionáriu sira.
Doutora Lídia mós hatutan, webinar ne'ebé sei hala'o ba dosente no estudante sira kona-ba asuntu akadémika nian ne'ebé universidade rua ne’e sei deside teknikamente.
Partisipa iha serimonia ne’e, Magnifiku Reitór, Profesór dr. João Soares Martins MPH.Ph.D, Visereitór ba Asuntu Akadémiku no Garantia Kualidade, Profesór Doutór Samuel Venâncio de Sousa Freitas, Visereitóra ba Asuntu Estudantís, Profesora Eng. Lígia Tomás Correia, MSc, no funsionáriu sira.
Média UNTL 📝 : Leonia de A. da Costa, no Laurindo Da Cruz (estajiária)
Foto 📷 : Denilson A. Barros (estajiáriu)
- Detalhes
- Escrito por Mateus Goncalves
- Visualizações: 1913
#TIMORLESTE #UNTL #MESSC#COVID19 #COVID19TL 17 AGOSTU 2021
Magnífiku Reitór Profesór dr. João Soares Martins MPH, Ph.D, asina kontratu bolsu hakbi’it ba estudante benefisiaria sira
Universidade Nasional Timor Lorosa’e (UNTL) nia Magnífiku Reitór Profesór dr. João Soares Martins MPH, Ph.D, liuhusi Ministeriu Ensinu Superior Siénsia No Kultura (MESSC) Diretór ezekutivu Fundo do Dezenvolvimento do Capital Humanu (FDCH) sr. Hermegildo da Silva ohin 17/8 asina kontratu bolsu hakbi’it ba estudante benefisiaria sira iha salaun auditorium UNTL Liceu.
Magnífiku Reitór Profesór dr. João Soares Martins MPH, Ph.D, agredese tebes ba MESSC no VIII Governu ne’ebé ho inisiativa bele ajuda familia kb’it la’ek liuhusi bolsa hakbi’it ba estudante sira.
“ha’u-nia agradese ba MESSC no VIII Governu ba oportunidade no intensaun hodi kria fundu hakbiit ne’ebé fó ba estudante sira, liuhusi inisiativa ne’e bele ajuda familia kbi’it laek iha ita-nia nasaun hodi fasilita sira-nia oan hala’o estudu iha UNTL no ensinu superior sira iha Timor leste”,tenik Magnifiku Reitor.
Magnifiku Reitor mós husu ba estudante benefisiarius sira atu Utiliza didi’ak oportunidade bolsa hakbiit ne’e hodi alkansa imi nia estudu, no kumpri regras sira ne’ebé mak estabelese, dehan Reitor
Direktor Exekutivu Hermegildo da Silva hatete, FDCH ho MESSC ohin entrega programa bolsu hakbiit inisiu iha UNTL, hafoin hakat ba Universidade privadu sira.
“Orsamentu ne’ebé ami preve ba programa Bolsu Hakbi’it tinan 2021 ho total um pontu cinco miloes ne’ebé ita atribui bazeia ba númeru estudante no kursu ne’ebe mai hosi intituisaun publiku no privadu sira iha Timor Leste no Instituisaun Politeknik Betano (IPB) ami entrega ona iha fulan kotuk ho totál estudante benefisiarus ema nain 20, no UNTL hamutuk ema nain 480 seluk sei prosesu nia laran hodi kompleta ba 500 ”, tenik Hermegildo.
Hermegildo husu ba estudante benefisirus programa Bolsa Hakbiit atu utiliza didiak investimentu ne’ebe estadu fó ba imi ho di’ak, tanba imi mak futuru Nasaun ne’e nian. Dehan nia
Partisipa másimu iha eventu ne’e mágnifiku ho nia estrutua, deakno fakuldade sira, representante hosi MESSC ho nia ekipa, nomos ekipa FDCH.
Média UNTL : Altur Ramos (estajiáriu)
FOTO : Pio Belo Ximenes (Voluntariu) Denilson A. Barros (estajiáriu)
- Detalhes
- Escrito por Adelaide da Cunha
- Visualizações: 3415
#TimorLeste #UNTL #VRPGP #COVID19 #COVID19TL 16 Agustu 2021
Universidade Nacional Timor Lorosa’e (UNTL), nia Visereitór ba Asuntu Pós-Graduasaun no Peskiza (VRPGP), Profesór Doutór Afonso de Almeida, iha Kampus FECT-UNTL nian, Hera (6/8) hateten katak Planu Prioridade dahuluk mak atu reativa kursu sira ne’ebé suspende ona atu halo fali rejistu foun.
“Pasu dahuluk Programa Pós-graduasaun nian maka atu reativa fali kursu hirak ne’ebé suspende ona iha tinan hirak liubá, liuhusi hato’o pedidu ba Ministériu Ensinu Superiór, Siénsia, no Kultura, atu nune’e, ita bele loke fali rejistu ba estudante foun sira”, hatutan Visereitór.
Profesór Afonso hato’o tan katak aleinde reativasaun, parte daruak mak estudante Mestradu sira ne’ebé iha hela faze elaborasaun teze, sei adianta tan tempu atu sira bele finaliza sira-nia estudu.
“Estudante sira ne’ebé hotu ona teoria sira hakarak hetan diploma pós-graduasaun, ita fasilita, nune’e mós sira ne’ebé atu kontinua ba elabora teze mestradu nian, gabinete VRPGP nafatin kontinua asegura, alenide ne’e, ita mós iha posibilidade atu loke tan kursu mestradu foun tuir nesesidade”, dehan.
Visereitór mós dezeja katak aleinde reativa kursu sira mak suspende hela, planu atu hasa’e tan língua ne’ebé uza ba elabora teze ho portugés no inglés atu hasa’e tan sira-nia koñesimentu no publikasaun bele iha asesu barak liután.
Espesializasaun Pós-graduasaun área Klínka-Médiku; hanesan Pediatria, Medisina Interna, Sirurjia, Anestezia, Obstetrísia, Oftalmolojia, Medisina Familiár,
Aleinde ne’e, Mestradu UNTL nia Oferta Formativa hanesan, Administrasaun Edukasionál, Kontabilidade, Direitu, Enfermajen i Parteira, Língua i Linguístika Portugeza, Jestaun Sustentável Rekursu Naturais i Ambiente, Medisina Tropikál i Saúde Komunitária, Ekonomia i Jestaun Aplikada, Polítika, Jestaun I Avaliasaun Edukasionál, Servisu Sosiál, Pediatria, Ensinu Portugés Kontekstu Timor-Leste, Matemátika ba Profesór, no Estudu ba Pás i Konflitu.
Média UNTL : Miguel Gonçalves
Foto : Pio Belo Ximenes, Agostinho da Cruz e Silva