- Detalhes
- Escrito por Mateus Goncalves
- Visualizações: 550
#TimorLeste #UNTL #FEST #JICA-CADEFEST 15 Setembru 2021 - Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH, Ph.D, enkontru ho Sr. Atsushi Takahashi, Koordenadór Projetu ba Kapasitasaun Dezenvolvimentu iha Fakuldade Enjenãria, Siénsia no Teknolójia (CADEFEST-JICA) hodi estende kooperasaun JICA 🇯🇵 ho UNTL.
Iha Gabinete Reitór UNTL nian, Díli (15/09), Magnífiku Reitór hateten, iha sorumutu ne’e asina estensaun Kooperasaun ho Parseiru Japan International Cooperation Agency (JICA) ho UNTL.
“Enkontru ohin parte rua diskute no hala’o asinatura ba estensaun ba sira-nia kooperasaun ho ita ba tinan ida tan, tanba tuir loloos remata iha fulan hirak ba kotuk tanba COVID-19 sira estende tinan ida ba oin”, tenik Reitór.
Magnífiku Reitór mós fiar katak, sei kontinua no solisita JICA nia apoiu tanba iha projetu balun presiza servisu hamutuk, liuliu JICA mós iha hanoin atu loke kursu mestradu ne’ebé konsentra ba área enjeñaria.
Partisipa iha Sorumutu ne’e Dekanu Fakuldade Enjeñaria, Siénsia no Teknolojia (FECT) Profesór, Profesór Junior Raimundo da Cruz, Ph.D, no Visedekanu Asuntu Kooperasaun no Pesquisa, Profesór Cancio Monteiro, Ph.D.
Média UNTL 📝 : Agostinho da Cruz e Silva
Foto 📷 : Pio Belo Ximenes.
- Detalhes
- Escrito por Mateus Goncalves
- Visualizações: 501
#TimorLeste #UNTL #VRAPFAJ 14 Setembru 2021
Magnífiku Reitór, Profesór dr. João Soares Martins, MPH, Ph.D, iha intervensaun agradese ba servisu diresaun sira ne'ebé kontinua hala'o kna'ar
Universidade Nacional Timor Lorosa'e (UNTL), liuhusi Gebinete Visereitoria ba Asuntu Planu, Finansa no Administradór-Jerál (VRAPFAJ) realiza reuniaun ho Diresaun sira, hodi avalia atividade hirak ne’ebé realiza ona durante ne’e, iha Auditóriu Liceu UNTL nian, Díli (14/09).
Relasiona ho eventu refere, Magnífiku Reitór, Profesór dr. João Soares Martins, MPH, Ph.D, iha intervensaun agradese ba servisu diresaun sira ne'ebé kontinua hala'o kna'ar maské iha Konfinamentu Obrigatóriu (KO).
"Agradese ba Na'i Maromak, tanba bele fó oportunidade mai ita hodi bele hasoru malu, agradese ita hotu nia kontribuisaun mezmu iha konfinamentu maibé servisu esensiál sira la'o nafatin”, tenik Reitór.
Reitór mos husu nafatin ba funsionáriu sira ne'ebé seidauk vasina, atu partisipa iha vasinasaun hodi kuidadu-an husi moras COVID-19.
Iha fatin hanesan, Vise-Reitór ba Asuntu Planu, Finansa no Administradór-Jerál, Profesór Helio A. X. Mauquei, Ph.D, konvida Diretór-Jerál, Diretór Nasionál, Xefe Departamentu sira atu hato'o sira-nia hanoin no difikuldade sira.
Vise-Reitór ba Asuntu Planu, Finansa no Administradór-Jerál, Profesór Helio A. X. Mauquei, Ph.D
"Objetivu husi sorumutu ohin ne'e, hanesan diskusaun baibain no aprezentasaun husi diresaun sira ne'ebé hakarak atu hato'o asuntu relasiona ho ita boot sira-nia servisu ba Magnífiku Reitór, ne'e oportunidade ida di’ak ba ita boot sira", tenik Profesór Helio.
Partisipa iha sorumutu ne'e, Proreitór ba Asuntu Planeamentu, Monitorizasaun no Avaliasaun, Profesór Nelson Salsinha, Ph.D, Diretór-Jerál, Diretór Nasionál no Xefe Departamentu sira.
Média UNTL 📝 : Agostinho da Cruz e Silva
Foto 📷 : Pio Belo Ximenes.
- Detalhes
- Escrito por Mateus Goncalves
- Visualizações: 701
#TimorLeste #UNTL #PRAPA #FMCS 13 Setembru 2021
Universidade Nacional Timor Lorosa’e (UNTL) nia Magnífiku Reitór Profesór dr. João Soares Martins, Mph, PhD, ho sivitas akadémika universidade nian partisipa atividade funerál ba matebian Profesór Diamantino de Jesus SKM, MPH (Ph.D Cand.), ne’ebé hala’o iha Semitériu Bekusi, Díli (10/09).
Relasiona ho serimónia funebre ne’e, Magnífiku Reitór hateten universidade nasionál sente triste tebes, tanba lakon ona Profesór Diamantino, maibé la haluhan kontribuisaun ne’ebé dedika ona ba UNTL.
“Ohin loraik ida ne’e (10/09), ita sente triste tebes tanba husik ita-nia maun Diamantino iha fatin ida ne’e, maibé labele haluha servisu ne’ebé nia halo ba rai ida ne’e barak tebes, hanesan edukadór iha tempu Indonesia nian to’o momentu ida ne’e”, tenik Reitór.
Profesór João mós rekoñese, matebian nia dedikasaun hanesan hanorin lahatene kolen, halo nia papel bo’ot tebes, nu’udar mós arkitektura ba Eskola Saúde iha Timor-Leste hafoin Independénsia.
Matebian Profesór Diamantino de Jesus, SKM, MPH (Ph.D. Cand.) moris iha Venilale, iha loron 30 marsu 1965 no remata nia peregrinasaun mundu nian iha loron 8 setembru 2021, iha isolamentu Hospital antigu Lahane- Dili.
Matebian husik hela família no sivitas akadémika tomak ho tinan 56, enkuantu knar ikus ne’ebé asume hanesan Diretór Akadémiku Departamentu Enfermajen (Formasaun Pós-Laboral), Eskola Superior Enfermagem, Fakuldade Medisina no Siénsias Saúde (FMCS).
Partisipa seremónia fúnebre ne’e, Visereitór ba Asuntu Pós-Graduasaun no Pesquisa Profesór Doutór Afonso de Almeida, PhD, Proreitór ba Asuntu Provedoria no Akonsellamentu (PRAPA) Profesór Tomé Xavier, Dekanu sira no estudante, funsionáriu, hamutuk ho família matebian nian.
𝗕𝗶𝗼𝗱𝗮𝘁𝗮 **
Naran Kompletu : Diamantino de Jesus, Moris iha Suku Wailaha Postu Administrativu Venilale, Munisipiu Baucau, loron 30 Marsu 1965, oan mesak husi Miguel Matos (Matebian), no Natalia de Jesus. Matebian husik hela fen kaben Sra. Ricardina ho oan na’in haat feto tolu mane ida.
Matebian hahú estudu iha Eskola Primária Venilale (1970-1975), depois invasaun kontinua estudu iha Eskola Primaria SDN Watuhaku Venilale (1977-1982), estudu Sekundária Tirilolo Baucau (19821-1985).
Matebian kontinua eskola iha SPK Lahane-Díli (1985-1988), estuda mós iha Programa Keguruan Universitas Padjajaran Bandung (1990-1993), nune’e mos eskola iha SMA Paralelo iha Departamentu Pendidikan dan Kebudayaan (1993-1996).
Matebian kontinua nia estudu iha Institutu Teknologi Pembangunan Surabaya, espesialidade Tékniku Saúde Ambiental (2002-2004), iha tempu hanesan hala’o mós nia estudu Fakultas Kesehatan Masyarakat, iha Universitas Airlanga (UNAE) Surabaya ho espesialidade Saúde Publika.
Hafoin ida ne’e matebian mós kontinua nia estudu ba Mestradu nia iha área Saúde Publika (2007-2008), kandidatu ba Doutoramentu área Saúde Publika iha UNAE Surabaya.
Kareira profisionál, iha tempu Indonesia Pelaksana Perawatan Puskesmas Bekora husi tinan 1988 to’o 1989, asistente hanorin iha SPK DEPKES Dili 1989-1992, manorin na’in definitivu DEPKES Timor-Timur (1993 to’o 1999), Koordenadór kelas tugas belajar SPK DEPKES (1994-1999), Koordenadór Kurikulum Kesehatan SPK DEPKES Dili (1996 to’o 1999), Koordenadór Olahraga DEPKES Dili (1995-1999).
Matebian sai Dosente iha Akadémika Perawatan Kesehatan Terpadu (1996-1999), asumi mós kargu koordenadór ba programa imunizasaun iha Lahane (1999-2000), iha NGO PRADET Internasional Saúde Mental sai hanesan tim Leader 1999-2001.
Kontinua iha PRADET, asitente Diretór (2001-2002), envolve mós fundador no membru iha East Timor Health ULTIM Group 2002 ne’ebé nakfilak ona ba Klibur Profisional Timor-Leste.
Diretór Nasional Rekursu Umanu iha Ministeriu Saúde (2007-2010), matebian mós fundadór ba Asosiasaun Enfermeiru de Timor-Leste, envolve mós iha prosesu Dezenvolvimentu Enfarmajen iha Timor-Leste hanesan ekipa Nukléu hodi hamoris Akadémika Perawatan Ahli Madya Keperawatan Dili Timor-Timur iha Tinan 2011.
Bazeia ba Despaxu Presidente Komisaun Funsaun Públika Nú 143/2011, hodi destaka husi Ministériu Saúde ba Universidade Nacional Timor Lorosa’e ho knaar hanesan dosente no sai diretór ba Eskola Superiór Enfarmajen (2011-2013), asumi knar ikus hanesan Diretór Akadémiku ba Departamentu Enfarmajen Formasaun Pós-Laboral (2020-2021) to’o hakotu nia jornada moris.
Matebian mós envolve iha Frente klandestina durante tempu invasaun, envolve iha Organizasaun Zona Nain-Feto 001 husi 1990 hamutuk ho Sr. Felix Braino Xavier kódigu “Kalisahe”, matebian mós asumi responsavel iha Zona Nain Feto hanesan Xefi Lojisitik Saúde hodi fó Asisténsia ba Komandu Luta no seluk tan.
Média UNTL : Agostinho da Cruz e Silva
Foto : Agostinho da Cruz e Silva
- Detalhes
- Escrito por Mateus Goncalves
- Visualizações: 611
#TimorLeste #UNTL #FEG #SEK EmbaixadórKoreaTL 13 Setembru 2021
Universidade Nacional Timor Lorosa’e (UNTL) nia Magnífiku Reitór Profesór dr. João Soares Martins, MPH, Ph.D, ho Embaixadór Korea Sul 🇰🇷 iha Timor-Leste Sr. Kim Jeong-ho Inaugura edifísiu foun Sentru Estudu Koreanu (SEK) iha UNTL, iha Fakuldade Ekonomia no Jestaun (FEG-UNTL) Díli (13/09).
Magnífiku Reitór iha nia diskursu hateten, ho lansamentu ida ne’e hanesan pontu partida ida atu hahú kooperasaun ida di’ak liután iha futuru.
“Ita bele hahú lansa Korean Corner Study ne’e, bele hahú kooperasaun ne’ebé di’ak liután ba futuru no fo benefísiu ba UNTL nia estudante sira atu aprende língua no kultura Korea, ne’ebé iha relasaun ho sosiedade Korea nia dezenvolvimetu sira”, tenik Reitór.
Iha fatin hanesan, Embaixadór Korea Sul iha Timor-Leste agradese ba apoiu tomak husi Reitór ho estrutura nomós dedikasaun Profesór Chang Won Choi.
“Ha’u agradese ba apoiu tomak husi Sr. Reitór ho estrutura, nomos Profesór Choi ba realizasaun lansamentu ne’e, maské iha limitasaun balun, entaun ida ne’e ita konsidera hanesan pontu aranka ida ba oin, sei bele halo espasu ne’ebé boot liután”, tenik Sr. Embaixadór.
Eskritóriu ne’e sei uza ba aula aprendizajen ida kompleta ho fasilidade, saladeaula ba diretór ida no sentru ne’e sei transmiti Língua, Kultura Korea nian no seluk tan ba estudante sira ne’ebé hakarak aprende.
Partisipa iha inagurasaun ne’e Proreitór ba Asuntu Kooperasaun, Profesora Doutora Lídia Gomes, Dekanu FEG, Profesór Custódio B. Ximenes, estudante Kursu Lian Korea, Embaixadór Korea Sul iha Timor-Leste Sr. Kim Jeong-ho ho nia ekipa, Profesór Choi no konvidadu sira.
Média UNTL 📝 : Agostinho da Cruz e Silva
Foto 📷 : Pio Belo Ximenes.
- Detalhes
- Escrito por Mateus Goncalves
- Visualizações: 2099
#TimorLeste #UNTL #MESSK #ANAAA #FDCH #CROP 07 Setembru 2021
Profesór dr. João Soares Martins, MPH Ph.D, ho nia ekipa partisipa iha aprezentasaun Orsamentu Jerál Estadu (OJE) 2022
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH Ph.D, ho nia ekipa partisipa iha aprezentasaun Orsamentu Jerál Estadu (OJE) 2022, liuhusi reuniaun Komité Revizaun Orsamentu i Polítika (KROP), iha salaun Ministériu Finansa nian, Díli (07/09).
Magnífiku Reitór UNTL nian, iha nia entrevista hateten sorumutu ne'e KROP rona aprezentasaun kona-ba OJE 2022 nian husi instituisaun hirak ne'ebé tutela ba Ministériu Ensinu Superiór, Siénsia no Kultura (MESSK).
Profesór dr. João Soares Martins, MPH Ph.D,
“Orsamentu Fiskál 2022 nian, UNTL propoin ($) milaun 16 resin, no iha enkontru ne’e ami haree ba OJE 2021 nian ezekuta lato’o, tan ne’e, ami ajusta tan adisionál balun hodi bele kobre ba asuntu sira la konsege atende ho montante ne’ebé iha ona”, tenik Reitór.
Partisipa iha sorumutu ne'e Visereitór, Proreitór no Diretór Planu no Finansa ho ekipa, no enkontru ne'e lidera husi Vise-Primeira-Ministra no Ministra Solidaridade Sosiál no Inkluzaun, SE Armanda Berta dos Santos, akompaña husi membru Governu sira.
Média UNTL 📝 : Agostinho da Cruz e Silva
Foto 📷 : Agostinho da Cruz e Silva