#TimorLeste #UNTL#VRAAG #FEAH #DEFD #ANAAA 06 Setembru 2021
Universidade Nacional Timor Lorosa’e (UNTL) liuhusi Fakuldade Edukasaun Arte no Umanidade (FEAU), nia Departamentu Ensinu Edukasaun Fízika no Desportu (DEFD), reavalia hikas husi Ajénsia Nasional Avaliasaun Akreditasaun Akadémika (ANAAA) no avaliadór Internasionál sira liuhusi Zoon, iha Kampus Sentrál UNTL nian, Díli (06/09).
Relasiona ho eventu refere, Visereitór ba Asuntu Akadémiku no Garantia Kualidade (VRAAGK), Profesór Doutór Samuel Venâncio de Sousa Freitas, hateten DEFD ne’e reavalia hikas hafoin la akreditadu iha tinan 2018 liubá, ho nune’e mak durante ne’e lasimu estudante foun no labele gradua ba nia estudante sira.
“Iha tinan 2021 ne’e, UNTL, ita submete kursu ne’en ho grau Baxarelatu no Lisensiatura, husi Fakuldade tolu hanesan Fakuldade FEAH nian (Departament Ensinu Edukasaun Fisika no Desportu no Departamentu Ensinu Dalen Tetum), iha Fakuldade Siénsia Sosiál (Departamentu Komunikasaun Sosiál no Departamentu Relasaun Internasionál) no ikus Fakuldade Medisina no Siénsia Saúde (Kursu Farmásia no Kursu Nutrisaun no Dietétika)”, tenik VRAAGK.
Profesór Samuel mós hatutan avaliasaun programátika ba kursu ne’en hafoin finaliza hotu, rezultadu avaliasaun ANAAA mak sei publika, aleinde ne’e, parte universidade nian halo mós avaliasaun no preparasaun interna ba Fakuldade Siénsia Ezata no Kursu Akuntabilidade husi Fakuldade Ekonomia no Jestaun ne’ebé sei hetan mós avaliasaun programátika iha tinan ida ne’e.
Partisipa iha sorumutu ne’e Magnífiku Reitór UNTL, Profesór dr. João Soares Martins, MPH, Ph.D, ho nia Visereitór no Proreitór, Diretór sira, parte ANAAA nian Diretór Ezekutivu ANAAA, Profesór Edmundo Viegas, Ph.D, ho nia Ekipa no ekipa avaliadór sira.
Média UNTL : Agostinho da Cruz e Silva
Foto : Mateus Gonçalves, Pio Belo Ximenes.