- Detalhes
- Escrito por Mateus Goncalves
- Visualizações: 137
Universidade Nacional Timor Lorosa'e (UNTL) nia Magnífiku Reitór Profesór dr. João Soares Martins, MPH,Ph.D asina akordu ho Embaxadora Amerika nian, Sra. Donna Ann Welton, hodi kontinua apoiu Uma Amerika iha UNTL ne'ebé nu'udar fatin ba joven sira hodi dezenvolve kapasidade iha língua no mós kreatividade, inklui espasu ba joven sira ba estudu komparativu iha Amerika.
Eventu ne’ebé lokaliza iha Sala-Videokonferénsia UNTL, Díli (21/10) ho objetivu atu parte rua koopera iha apoiu ba sustentabilidade Uma Amerika iha UNTL, tanba antes ne'e asina ona akordu iha fulan Novembru tinan 2016, Emabaxada Amerika apoiu joven sira ba halao estudu komparativu iha Amerika no dezenvolve sira nia kapasidade língua, inklui kreatividade sira.
Akompaña iha asinatura memorandu ne'e, Visereitór ba Asuntu Akadémiku no Garantia Kualidade, Profesór Samuel Venâncio de Sousa Freitas, Visereitora ba Asuntu Estudantís nian, Profesora Lígia Tomás Correia, Dekanu Faculdade de Economia e Gestão, Profesór Filipe Mendes Perreira, Proreitora ba Asuntu Provedoria no Akonsellamentu, Profesora Teresa Vaz Cabral, no ekipa husi Embaxada Amerika nian.
Média UNTL 
: Leonia de Araújo da Costa
: Leonia de Araújo da CostaFoto 
: Leonia de Araújo da Costa
: Leonia de Araújo da Costa- Detalhes
- Escrito por Mateus Goncalves
- Visualizações: 130
Universidade Nacional Timor Lorosa’e (UNTL) nia estudante Mercia Almeida da Silva sai vensedora ba kompetisaun Video Kreativu ho tema ‘’Futuru no Teknolojia’’ ne’ebé organiza husi Gabinete Vise-Reitora ba Asuntu Estudantís (GVRAE) nia Departamentu Atividade Estrakurikulár, iha Auditóriu FCS, Kaikoli, Díli (10/17).
Vensedora Mercia Almeida da Silva nu’udar estudante Departamento de Pescas e Ciência Marinha FAGRI nian hatete, antes ne’e nia la espera katak atu bele sai hanesan manan na’in ba iha kompetisaun Video kreativu ne’e, tanba laiha esperiénsia ne’ebé di’ak no laiha koñesimntu barak iha prosesu halo video no edit video ho tempu ne’ebé limitadu.
“Ha’u sente orgullu tebes, tanba bele sai manan na’in iha kompetisaun video kreativu ida-ne’e maske ho tempu limitadu ba ami atu prepara no bele aumenta ami-nia esperiénsia iha video nian no bele mós mellora ami-nia kapasidade.
Liuliu kolega sira hotu ne’ebé mak iha esperiénsia keta tauk no lakon opurtunidade uza didi’ak ita-nia talentu sira atu bele fó benefisiu ba ita-nia aan’’, dehan Mercia.
Reprezenta Visereitora ba Asuntu Estudantís no Atuál Xefe Departamentu Estudantís Alumni no Empregabilidade Sr. Elvino Alves Correia agradese ba Ekipa Juri sira-nia disponibilidade ba atividade kompetisaun ne’e.
“Ha’u hakarak hato’o parabéns ba imi hotu, tanba hasoru dezafiu barak no tempu ne’ebé limitadu tebes, maibé imi bele esforsu hodi hetan resultadu di’ak no imi seluk ne’ebé seidauk bele hakaas aan atu bele kompete fali iha tinan tuir mai.
Liuhusi informasaun sira ne’ebé ohin juri sira hato’o ona ba imi no atividade ne’e realiza atu bele mellora mós estudante ida idak nia koñesimentu no abilidade hodi utiliza teknolojia sira ne’ebé iha’’, dehan Sr. Elvino.
Vensedor ba iha kompetisaun ne’e mak I Lugar Mercia Almeida da Silva husi FAGRI ho valór 103 no II Lugar Ana X. Xaviel Lay husi FMCS ho valór 97 no III lugar Jasmine Tricia P. da Costa husi FAGRI ho valór 95.
Partisipa iha atividade ne’e Prezidente Komisaun Organizadór Sr. Avelino I. X. R. da Cruz ho ekipa, Ekipa Juri no estudante sira.
Média UNTL : Laurindo da Cruz Gomes
: Laurindo da Cruz GomesFoto : Laurindo da Cruz Gomes
: Laurindo da Cruz Gomes- Detalhes
- Escrito por Mateus Goncalves
- Visualizações: 147
Universidade Nacional Timor Lorosa'e (UNTL) nia Magnífiku Reitór Profesór dr. João Soares Martins, MPH,Ph.D halo lansamentu ba livru ho títulu "Impaktu Transformasaun Arkitetura Uma-Lulik Tradisional ba Modernu" iha Fundasaun Oriente, Díli (17/10), livru ne’e hakerek husi Estudante Hadomi Natureza (ESHANA).
Reitór hatete, livru ne'e ho tema ne'ebé interesante tebes, tanba dadaun ne'e timoroan barak mak hahú halo ona tranformasaun uma-lisan orijinal sira ba modernu, maibé tuir loloos tenke mantein orjinalidade Timor-Leste nian.
"Lansamentu livru ne'e importante tebes, tanba bele hanorin ema oinsa mantein ita-nia orijinalidade kulturál, tempu modernu no timoroan sira halo mudansa ba uma-lisan sai modernu hotu, ninia impaktu boot mak neneik orijinal husi kultura ita-nian sei lakon, tanba ne'e agradese tebes ba ESHANA nia esforsu halo peskiza hodi elabora sai livru ida", dehan Reitór.
Xefe Divizaun Socio-Economia no Cultura nian husi ESHANA, Aurora de Oliveira Ximenes hatete, livru ne'e ho objetivu atu fó informasaun ba públiku, tanba uma-lisan sira ne'ebé uluk uza tali metan, duut no seluk tan hahú muda ba besi riin, simenti no blok, tuir loloos tenke mantein orijinalidade kultura Timor.
"Ami koopera ho Leitura Xanana Reading Room hodi halo peskiza kona-ba orijinalidade husi uma-lisan, tanba uluk ita-nia beiala sira halo ho tali metan no dut, maibé ikus ne'e uza fali simenti, besi no seluk tan.
Tuir loloos ita tenke mantein ita-nia kultura orijinal liuliu uma-lisan, tanba ne’e iha ameasa boot atu lakon, espera katak husi livru ida-ne'e bele hato'o informasaun ba ema hotu", dehan Aurora.
Atividade refere apoiu husi Xanana Reading Room no parseiru sira. Enkuantu iha lansamentu partisipa husi Visereitora ba Asuntu Estudantís nian, Dra. Lígia Tomás Correia, Xefe Departamento Gestão Biblioteca Central UNTL nian, Sra. Elvira Pinto Santana, reprezentante husi Leitura Xanana Reading Room nian, Sr. Elias de Jesus, estudante no konvidadu sira.
Média UNTL : Leonia de Araújo da Costa
: Leonia de Araújo da CostaFoto : Leonia de Araújo da Costa
: Leonia de Araújo da Costa- Detalhes
- Escrito por Mateus Goncalves
- Visualizações: 130
Universidade Nacional Timor Lorosa'e (UNTL) nia Koordenadór ba Centro de Lingua Portuguesa (CLP) atual Visereitór ba Asuntu Akadémika no Garantia Kualidade (VRAAGK) Profesór Samuel Venâncio de Sousa Freitas hamutuk ho parseiru sira halo enseramentu ba formasaun sertifikasaun ba profesór nasionál sira, iha sala-CLP, Díli (18/10).
Formasaun sertifikasaun ba profesór nasionál sira ho obejtivu atu bele haforsa ezisténsia CLP nian atu sai sentru ne'ebé bele sertifika kompeténsia ba Língua Portugueza nian, signifika, kuandu rekursu sira ne'ebé partisipa ona formasaun Língua Portuguesa nivel A1-C1 bele hetan rekoñesimentu husi Europa.
Enseramentu ne'e, partisipa husi Dr. Rui Vaz, Diretor dos Serviços da Língua da Divisão de Programação, Formação e Certificação, da Direção de Serviços da Língua do Camões,I.P, Vice-Chefe de Missão de Portugal iha Díli, Dr. Guilherme Araújo, Diretora Jerál Ensinu Superior Siénsia no Kultura nian, Dra. Maria Filomena Lay, Eis-Reitór, Dr. Armindo Maia no Dr. Benjamin Corte-Real, profesór nasional sira no konvidadu sira.
Média UNTL : Leonia de Araújo da Costa
: Leonia de Araújo da CostaFoto : Eugenia de Jesus & Jaimito Caldas
: Eugenia de Jesus & Jaimito Caldas- Detalhes
- Escrito por Mateus Goncalves
- Visualizações: 156
Universidade Nacional Timor Lorosa'e (UNTL) nia Estudante Hadomi Natureza (ESHANA), realiza atividade Talk-Show ho tema: "Impaktu Transformasaun Arkitektura Uma-Lulik Tradisional ba Modernu" iha Auditório Fundasaun Oriente, Díli (17/10).
Iha entrevista estudante ESHANA (UNTL) Orlando de Oliveira da Costa, apresia tebes, tanba bele aprende kona-ba transformasaun uma-lulik tradisionál ba modernu nian, husi matéria ne’ebé oradór sira fehe bele kapasita liutan koñesimentu atu preserva nafatin kultura.
"Ha’u senti previlejiu tebes, tanba bele haklean liutan koñesimentu kona-ba transformasaun kultura tradisionál ba modernu no oinsa mak atu mantein nafatin orijinalidade valór kultural sira". Dehan Orlando.
Iha fatin hanesan oradora Sra. Maria Domingas Fernandes Alves "Mikato" dehan, transformasaun arkitektura uma-lulik tradisionál ba modernu, haree husi pontu devista siénsia Antropolojia no Sosiolojia.
“Kultura mak aktus, ábitu, krensa no instrumentu sira, ita defende nasaun no defende mós kultura, tanba kultura mak identidade nasaun nian.
Ha’u espera katak imi-nia luta ba konstrusaun estadu mak prezerva nafatin kultura no mantein nia orijinalidade, tanba ne'e mak identidade loloos, mezmu uma-lisan barak mak iha ona transformasaun tradisional ba ona arkitektura modernu, maibé hakas aan atu halo kampaña no servisu nafatin ba oin hodi mantein valór kulturál sira", dehan Mikato.
Entretantu Oradór ba diskusaun aberta ne'e, Sr. Eugénio do C. de J. Sarmento (Coordenador Geral Lia-Na’in Timor-Leste) no Cavaleira Sonia Alves Barreto (ESHANA).
Atividade ne'e organiza husi ESHANA (UNTL) no partisipa husi reprezentante Sala Leitura Xanana Reading Room Sr. Elias de Jesus, Membru Grupu Pro-Ecologia e Patriotismo, JHN (Joventude Hadomi Natureza), DIT no Konvidadu sira.
Média UNTL : Mario J. Mendonça
: Mario J. MendonçaFoto : Domingos Amaral
: Domingos Amaral