𝐔𝐍𝐓𝐋-𝐃𝐄𝐌 𝐇𝐄𝐓𝐀𝐍 𝐑𝐄-𝐀𝐕𝐀𝐋𝐈𝐀𝐒𝐀𝐔𝐍 𝐁𝐀 𝐀𝐊𝐑𝐄𝐃𝐈𝐓𝐀𝐒𝐀𝐔𝐍

Universidade Nacional Timor Lorosa'e (UNTL), nia Faculdade de Engenharia Ciência e Tecnologia (FECT), liuhusi Departamento de Engenharia Mecánica (DEM), hetan re-avaliasaun husi Agência Nacional Para Avaliação e Acreditação Académica, I.P, iha Sala-enkontru FECT Hera, Díli (17/10).

 

Visereitór ba Asuntu Akadémika no Garantia Kualidade, Profesór Dr. Samuel Venâncio de Sousa Freitas, hateten iha tinan 2018 kursu Enjeñaria Mekánika halo avaliasaun dahuluk hetan valór B, nune'e ho mudansa no progresu ne'ebé iha área oin-oin ba dosente, kurríkulu, infraestrutura no fasilidade bele hetan progresu di'ak.

 

"Iha tinan 2018 departamentu ne’e hetan avaliasaun dahuluk ho valór B, no ita hein katak liuhusi re-avaliasaun ne'ebé halo husi ANAAA bele hetan progresu ne'ebé di'ak hodi kontribui ba hadia kualidade iha universidade liuliu departamentu", dehan Visereitór.

 

Iha sorin seluk, Diretór DEM, Profesór Mario M. Cabral, hatete preparasaun re-avaliasaun ba DEM ne'e kuaze tinan ida hodi priense dokumentu hodi submete ba DNAA no ANAAA, tuir evidénsia ne'ebé iha.

 

"Tinan lima liubá ami halo avaliasaun hetan valor B, maibé iha tempu ne'ebá fasilidade mínimu tebes, maibé ami koko no halo esforsu no espera katak ami bele hetan valór exelente", dehan Diretór.

 

Avaliadór sira-ne'e, mai husi nasionál no internasionál mak hanesan, Prof. Ahmad Yasir husi Malásia, Mr. Andre Nono no Mr. José Ferreira no avaliasaun ne'e hala'o durante loron rua hahú husi 17 to'o 18 Outubru.

 

Partisipa husi Dekanu FECT, Profesór Adalfredo Ximenes, Diretór Ezekutivu ANAAA, I.P. Dr. Nilton D. Paiva Mau, Dosente no Funsionáriu husi DNAA nian.

 

Média UNTL : Denilson Amandio Barros

Foto : Agostinho da Cruz e Silva