Universidade Nacional Timor Lorosa'e (UNTL) nia Magnífiku Reitór Profesór dr. João Soares Martins, MPH, Ph.D hamutuk ho reprezentante Ministériu Ensinu Superior Siénsia no Kultura (MESSK) Sr. Higino Alves, lansa filme dokumentáriu ho títulu "The Art of Teaching" iha Auditóriu Faculdade de Ciências Sociais (FCS) UNTL nian, Caicoli, Díli (17/10).
Reitór orgullu ho lansamentu ba filme dokumentáriu ho tema "The Art off Teaching" hanesan motivasaun ba públiku katak, kreativu no inovativu iha hanorin. Arte hanorin ne’e importante tebes ba profesór sira, nune'e hamoris aula, no prezisa talentu no presiza mós siensia oinsa atu partilla mensajen ba estudante sira, tanba ne'e parabéns ba produtór sira, tanba prodús filme furak tebes.
"Ha'u orgullu ho lansamentu filme dokumentáriu ne'e, tanba filme ho tema arte ba hanorin, signifika profesór sira tenke kriativu no inovativu hodi transmiti siénsia, no parabéns ba produtór sira (Sr. Hermenegildo Maia no apoiu husi José Fonseca), ho nia ideia ne’ebé nakonu ho kreativu no inovativu tebes no atu bele kontinua halo filme badak sira-nee, tanba informativu tebes atu hafanu ita hotu nia koñesimentu oioin liuhusi filme ne’e", dehan Reitór.
Reprezentante MESSK nia no atuál Diretór Diresaun Nacional Ensinu Superior hateten, lansamentu filme ne’e sai hanesan ezemplu ida ba dosente sira hotu no oinsa marka diferensia hodi motiva estudante sira, tanba públiku sempre kestiona eskola iha UNTL kleur maibé loloos ne’e depende ba ema idaidak.
"Filme ne'e nu'udar kriatividade ida husi produtór sira, ohin ita lansa ona video ne'e, iha video ne'e nia laran esplika klean ba ita kona-ba oinsá termina estudu iha UNTL tuir tempu, públiku kestiona katak UNTL ne'e eskola kleur, maibé realidade depende ba pesoal sira, maibé dosente sira mós sai orientadór motiva hodi enkoraja estudante sira hodi nafatin mai eskola nune'e sira bele finaliza, tanba UNTL iha moto katak sai sentru exelénsia, tenke hatudu duni ida-ne'e ba publiku", dehan Sr. Higino.
Produtór Filme, Sr. Hermenegildo Maia hatete, filme ida-ne'e atu inspira ema hotu oinsá bele finaliza estudu iha UNTL tuir tempu, tanba mosu aspirasaun iha públiku katak UNTL fó graduasaun kleur ba estudante sira, maibé iha Departamento de Comunicação Social la eziste, tanba dosente sira sempre buka nia estudante sira-ne'ebé laiha ona vontade, okupadu ho servisu ikus mai gradua tiha.
"Ha'u hakarak dehan katak, muda nasaun la'os hakilar tun sae uza toa, maibé liuhusi filme mós bele muda nasaun, ohin ita lansa filme kona-ba The Art of Teaching, husi filme ne'e atu inspira ba inan-aman, estudante no dosente sira atu hanoin katak UNTL la fó graduasaun kleur ba estudante sira maibé depende ba pesoal sira no dosente sira-nia maneira atu enkoraja no ezije estudante ninia vontade", dehan Produtór Maia.
Filme refere produz husi Sr. Hermenegildo Maia (Alumni DCS) no apoiu husi José Fonseca (Departamento de Desenvolvimento Comunitário-FCS), no pensonajen prinsipál mak Mestre Marcelino Ximenes Magno, nu’udar Diretór sesante DCS nian.
Partisipa iha lansamentu ne'e, Estrutura FCS, Diretór de Departamento de Comunicação Social, Mestre Roberto da Costa Pacheco, Diretora Ezekutivu Interina FDCH nian, Sra. Anastacia do Espirito Santo, Asesór Prinsipal ba Prezidente Repúblika nian, Sr. Alexandrino Xavier de Araújo, dosente, estudante no konvidadu sira.
Média UNTL 
: Leonia de Araújo da Costa & Jaimito Caldas (Estajiáriu)
: Leonia de Araújo da Costa & Jaimito Caldas (Estajiáriu)Foto 
: Leonia de Araújo, Domingos Amaral & Eugenia de Jesus
: Leonia de Araújo, Domingos Amaral & Eugenia de Jesus