- Detalhes
- Escrito por Mateus Goncalves
- Visualizações: 250
Universidade Nacional Timor Lorosa’e (UNTL) nia Visereitoria ba Asuntu Estudantís (GVRAE) nia Gabinete dos Assuntos Relasionados e Questões de Política de Géneru realiza diskusaun Kafe Jéneru ho tema “Conhecemento Com Abordagem de Forma Ético’’ iha ámbitu komemorasaun loron Nasional Feto ne’ebé Timor-Leste komemora ona iha loron 3 novembru 2023.
Iha abertura ne’ebé lokaliza iha Auditóriu Liceu UNTL nian, Díli (10/11), Visereitora ba Asuntu Estudantís Profesora Lígia Tomás Correia agradese ba oradór sira, funsionáriu no estudante sira ne’ebé hamutuk hodi selebra loron nasional feto maské loron feto liu ona iha 3 Novembru.
‘’Tema ida ohin ita sei diskute mak (Feto Prontu Lidera Uluk Agora no Iha Futuru) hodi hato’o nafatin espíritu mai ita katak iha tempu resisténsia iha mós iha eroina sira ho sira-nia espiritu ba luta libertasaun.
Agora no ba futuru ita mak atu hodi hala’o espíritu ida-ne’e liuhusi ita-nia feto maluk sira hodi kontribui ba dezenvolvimentu nasaun nian. Ha’u mós husu ba partisipante atu bele akompaña hodi rona esperiénsia husi oradór sira atu imi mós bele iha espíritu ida forte hodi bele kontinua desenvolve rai ne’e’’, dehan VRAE.
Partisipa husi Xefe Departamentu Estudantil, Alumni no Empregabilidade Sr. Andre Oliveira da Costa , orador sira hanesan Sra. Adalgisa Ximenes, Sra. Maria Exposto, funsionáriu, dosente, Ekipa Komisaun Organizadora inklui estudante sira.
#TimorLeste #UNTL #GVRAE #GARQPJ 10 Novembru 2023
Média UNTL 📝: Laurindo da Cruz Gomes
Foto 📷: Laurindo da Cruz Gomes
- Detalhes
- Escrito por Mateus Goncalves
- Visualizações: 293
Universidade Nacional Timor Lorosa'e (UNTL), nia Magnífiku Reitór Profesór dr. João Soares Martins, MPH, Ph.D, hamutuk ho Embaxadora China nian, iha Timor-Leste, Wang Wenli, asina memorandu-entendimentu (MoU) hodi hametin kooperasaun iha ensinu no mobilidade akadémika.
Iha Sala Video-konferénsia kampus Sentrál, (09/11), Magnífiku Reitór hateten, asina akordu ne'e atu hametin kooperasaun entre UNTL ho Embaxadora China nian, liuliu ho universidade sira iha nasaun China, nune'e bele fasilita bolsu estudu ba estudante sira.
"Asina akordu ho embaxadora China ne'e importante tebes atu fasilita ita-nia universidade (UNTL) ho universidade sira iha China nomós atu fasilita bolsu estudu ba estudante sira", tenik Magnífiku Reitór.
Aleinde asina akordu, embaixadora mós halo vizita ba Biblioteka Sentrál, Poliklínika UNTL, nomós hasoru malu ho estudante bolseiru sira iha Auditóriu Liceu, (FEAH) Díli.
Partisipa husi, Visereitora ba Asuntu Estudantís Profesora, Lígia Tomás Correia, Proreitór ba Asuntu Kooperasaun Profesór, Tomé Xavier Jerónimo, ekipa husi Embaxada China nian, Funsionáriu no Estudante sira.
#TimorLeste #UNTL #PRAK #EmbassyofChine 10 Novembru 2023
Média UNTL 📝: Denilson Amandio Barros
Foto 📷: Denilson A. Barros & Agostinho da Cruz
- Detalhes
- Escrito por Mateus Goncalves
- Visualizações: 175
Universidade Nacional Timor Lorosa'e (UNTL), nia Visereitoria ba Asuntu Estudantís, liuhusi Gabineti dos Asuntos Relacionados e Questões de Política de Género, servisu hamutuk ho UN WOWEN, fasilita formasaun orsamentu sensível jéneru ba funsionáriu sira, iha Auditóriu Liceu, Díli (10/11).
Objetivu husi formasaun ne’e atu kapasita funsionáriu hodi hatene no halo planu orsamentu ba ezekusaun kada diresaun no departamentu, nune'e bele halo atividade sira ho alokasaun orsamentu ne’ebé sensivel ba jéneru. Aleinde ne’e bele integra mós ba planu asaun foun iha prespetiva jéneru iha futuru.
Formasaun ne'e partilla husi Sr. Januario dos Reis, Konsultór husi UN WOWEN hanesan formadór. Partisipa husi Xefe Departamentu Administrasaun, Dosente no Funsionáriu sira.
#TimorLeste #UNTL #VRAE #UNWOMEN 11 Novembru 2023
Média UNTL 📝: Regina de Carvalho & Mario Jonio( estagiariu)
Foto 📷: Denilson A. Barros & Regina de Carvalho
- Detalhes
- Escrito por Mateus Goncalves
- Visualizações: 218
Atu komemora Dies Natalis Universidade Nacional Timor Lorosa’e (UNTL) nian ba dala XXIII, UNTL servisu hamutuk ho Cruz Vermelha de Timor-Leste (CVTL), liuhusi Komisaun Organizadora informa ba sivitas Akadémika tomak (Dosente, Funsionáriu Adminstrativa no Estudante) UNTL nian atu bele partisipa iha asaun doasaun ran.
Doasaun ran ne’e sei realiza iha:
Fatin : Cruz Vermelha de Timor-Leste (CVTL),
Loron : Tersa-feira, 14 fulan novembru 2023
Oras : Tuku 09:00 dader to'o tuku 17:00 lorokraik.
Komisaun Organizadora Dies Natalis apela ba Sivitas Akadémika tomak ne’ebé iha kondisaun saúde di'ak no permiti atu partipa iha doasaun ran ne’e.
Ran turuk ida, salva ema ida nia vida!
Ba ita-nia atensaun no partisipasaun, hato’o obrigadu wain.
Mellores Komprementus
Professor Apolinário Magno, MBA
Presidente Komisaun Organizadora Dies Natalis ba XXIII.
- Detalhes
- Escrito por Mateus Goncalves
- Visualizações: 205
Universidade Nacional Timor Lorosa’e (UNTL) liuhusi Faculdade de Economia e Gestão (FEG), realiza atividade Feira Empreendedorizmu Arte no Kultura, iha ámbitu komemorasaun loron Masakre Santa Kruz 12 Novembru (1991-2023), iha Kampus Resende FEG nian, Díli (09/11).
Reprezentante Dekanu FEG nian, atuál Vise-dekanu Asuntu Estudantís Profesór Aleixo Ximenes hatete, ohin loron mudansa dinámika no fó presaun bo’ot ba joven sira, no afeita ba sosio-ekonómika, sosiopolítika no sosiokultural, nu’udar joven dalan ne’ebé mak liuhusi empreendorizmu.
“Ha’u husu joven sira tenki iha vontade atu esforsu hodi aselera prosesu dezenvolvimentu ekonomia, husi parte kultura hodi promove produtu lokál hodi trava importasaun, tanba ekonomia forte nasaun forte’’, dehan Profesór Aleixo.
Iha fatin hanesan Ministru Juventude Desportu Arte no Kultura (MJDAK) S.E. Nelio Isaac Sarmento hatete, joven tempu uluk laiha oportunidade hanesan agora, tanba sira moris iha presaun psikolójika, laiha espasu livre ba sira hodi espresa sira-nia hanoin, maibé sira só bele oferese vida ba libertasaun pátria.
“Joven sira presiza muda sira-nia aan hodi sai husi karakter dependénsia ba karakter kontribuitór. Liuhusi hanoin ne’ebé inovativu atu hasa’e kualidade ekonomia liuhusi prátika produtu lokal sira ne’ebé imi halo. Atu nune’e iha futuru imi bele kontribui ba dezenvolvimentu ekonomia rai-laran” dehan MJDAK.
Prezidente Asosiasaun Akadémika Estudantíl, José António da Silva hatete, atividade ne’e ho objetivu atu komemora loron Masakre Santa Kruz 12 Novembru, atu halibur estudante sira no loke biban ba estudante sira nu’udar futuru empreendedor atu hatudu sira-nia produtu ne’ebé kreativu no kompetitivu.
‘’Feira ne’e sai hanesan parte ida atu promove kualidade estudante sira-nian, nu’udar empreendedor ida diak iha futuru no bele haforte liutan sira-nia espíritu empreendedorizmu”, dehan Senadu.
Atividade ne’e organiza liuhusi servisu hamutuk Komisaun Organizadora, Senadu Estudante Akademika ho estrutura kakuldade. Konta mós ho partisipasaun dosente, funsionáriu, estudante Ensinu Sekundariu 12 de Novembru, Universidade Dili (UNDIL) inklui estudante sira FEG nian.
#TimorLeste #UNTL #FEG #MJDAK 09 Novembru 2023
Média UNTL 📝: Regina de Carvalho/ Mario Jonio (estajiáriu)
Foto 📷: Regina de Carvalho/ Mario Jonio (estajiáriu)