- Detalhes
- Escrito por Mateus Goncalves
- Visualizações: 176
Universidade Nacional Timor Lorosa'e (UNTL) nia Faculdade de Agricultura nia estudante Departamento de Agronomia na'in 14 aprezenta rezultadu peskiza kona-ba produsaun produtu lokál (Batar no Pachoy) durante fulan haat (4) hahú husi fulan Jullu-Setembru 2023 iha Munisipiu Haat- Baucau, Manufahi, Ainaro no Dili.
Iha Auditóriu FAGRI, Díli (11/23), Dekanu FAGRI nian, Prof. Vicente de Paulo Correia hato'o parabéns ba estudante sira nu'udar peskizadór ba produtu batar no Pachoy nian, tanba iha oportunidade ne'e sira bele aprende no sira mos bele aplika hamutuk ho komunidade.
"Parabéns ba imi-na’in sanulu resin haat ne'ebé sai nu’udar peskizadór ba produtu hirak ne'e. Ida-ne'e oportunidade di'ak atu imi hodi aprende no bele prátika direta ho komunidade iha terenu" dehan Dekanu FAGRI nian.
Iha fatin hanesan Leigh Vial Koordenadór ACIAR nian hatete, objetivu husi peskiza refere maka atu identifika nutriente rai nian, tanba ne'e agradese ba estudante sira serbisu di'ak tebes no aprezenta ona rezultadu.
"Agradese ba estudante sira-nia serbisu di'ak tebes, objetivu husi peskiza ida-ne'e mak ita kuda batar ho ai horis Pachoy, depois de kuda ita haree ninia mudansa, nune'e ita bele identifika nutriente rai nian" dehan Koordenadór ACIAR nian.
Atividade peskiza refere realiza tanba hetan apoiu husi ACIAR (Australian Center for International Agricultural Research).
Partisipa iha atividade aprezentasaun ne'e, estrutura fakuldade, dosente, xefe aldeia sira husi Ainaro, Baucau, Manufahi no komunidade balu husi fatin peskiza nian, estudante no konvidadu sira.
#TimorLeste #UNTL #FAGRI #ACIAR 12 Dezembru 2023
Média UNTL 📝: Leonia de A. da Costa
Foto 📷: Mario Joni Mendonça
- Detalhes
- Escrito por Mateus Goncalves
- Visualizações: 170
Universidade Nacional Timor Lorosa'e (UNTL), nia funsionáriu na'in sanulu resin lima (15) remata ona formasaun iha Unidade Relasaun Publika & Protokolu, Multimedia no Hakerek Imprensa ne'ebé oferese husi Centro de Formação Técnica em Comunicação (CEFTEC), formasaun ne’ebé hala’o ho durasaun oras 40 to'o 1200.
Hafoin remata formasaun Sekretáriu Estadu Komunikasaun Sosiál (SEKOMS), S.E. Expedito Dias Ximenes mak prezide serimónia atribuisaun sertifikadu ba formadu sira, iha Salaun Delta-Nova, Dili, (12/12).
Objetivu husi atribuisaun sertifikadu ne'e, nu'udar simbolu ida ne'ebé remata ona formasaun ba funsionáriu hotu iha intituisaun ida-idak, hodi mellora koñesimentu liuhusi prátika loloos iha fatin servisu.
Funsionáriu UNTL nian na’in 15 ne’e, partisipa formasaun ho tipu on the job training iha aréa Komunikasaun Relasaun Públika no Protokolu na'in 12, Unidade Multimedia (2), no Unidadede Komunikasaun Relasaun Públika no Protokolu nível III na'in (1). Konta ho sira na’in-15 ne’e, formandu ne’ebé konklui ona formasaun CEFTEC nian iha tinan 2023 ne'e hamutuk 355 husi instituisaun oioin.
Partisipa husi Sekretáriu Estadu Komunikasaun Sosial, S.E. Expedito Dias Ximenes, Xefe Gabinete SEKOMS, Elizeu Isac Fernandes, Funsionáriu husi Nível Nasionál no Munisípiu, Ekipa CEFTEC nian no Konvidadu sira.
#TimorLeste #UNTL #SECOMS #CEFTEC 12 Dezembru 2023
Média UNTL 📝: Denilson Amandio Barros
Foto 📷: Denilson Amandio Barros
- Detalhes
- Escrito por Mateus Goncalves
- Visualizações: 163
Universidade Nacional Timor Lorosa’e (UNTL) nia Visereitora ba Asuntu Estudantís Profesora Lígia Tomás Correia partisipa iha enseramentu kampaña loron 16 ativizmu kontra violénsia hasoru feto no labarik ho tema “Hamutuk Investe Iha Família Hodi Prevene Violénsia Hasoru Feto no Labarik Feto’’, organiza husi Sekretária Estadu Igualdade (SEI), iha Kampus DIT Manleuana, Díli (11/12).
Iha diskursu Visereitora Correia hatete, enseramentu ba selebrasaun kampaña loron 16 ativizmu kontra violénsia hasoru feto no labarik feto ne’e, atu bele eduka ema hotu hodi tau atensaun ba problema refere iha Timor-Leste.
‘’Ohin husi SEI mak konvida mai atu bele partilla kona-ba oinsa atu prevene violénsia hasoru feto no labarik feto ba estudante sira atu bele iha respeitu ba nia feton sira.
Ha’u partilla mos kona-ba Inisiativa Kampus Seguru ne’ebé agora dadauk estabelese ona no servisu Provedoria Akonsellamentu nian iha UNTL ba estudante sira ne’ebé presiza atu hetan akonsella’’, dehan Profesora Lígia.
Atividade refere hetan partisipasaun husi visereitór no proreitór no inklui estudante sira husi IOB, DIT, UNTL, UNITAL no konvidadu sira.
#TimorLeste #UNTL #VRAE #SEI 12 Dezembru 2023
Média UNTL 📝: Laurindo da Cruz Gomes
Foto 📷: Laurindo da Cruz Gomes
- Detalhes
- Escrito por Mateus Goncalves
- Visualizações: 194
Universidade Nacional Timor Lorosa’e (UNTL) liuhusi Gabinete Proreitoria ba Asuntu Provedoria no Akonsellamentu (PRAPA) realiza Retiru no Konfesa ho tema ‘’Mai Na’in Jesus Mai Horik Iha Ami Fuan no Hafoun Ami Nian Moris’’ ba estudante sira iha Igreja Nossa Señora Imaculada Conceição, Catedral Díli (12/12).
Kapelaun UNTL Pe. Nívio Lebre Correia Fdcc hatete, atividade ida ne’e halo retiru adventu nian hodi prepara estudante sira ba festa Natal , normalmente halo hanesan momentu bensaun ida ba estudante sira hanesan sarani no Maromak nia oan hodi prepara sira-nia fuan diak liután hodi selebra festa Natal Jesus nian.
‘’Ohin iha retiru, konferénsia no konfisaun ne’e hanesan reflesaun ida ba estudante sira nomós tempu opurtunu rekonsiliasaun ida entre ita ema ho Maromak liuhusi sakramentu konfesa nian, halo ita konsiente katak prezensa Jesus nian iha mundu ne’e sai hanesan prezente boot ne’ebé Na'i Maromak fó ba ita ema atu lori ita ba dalan salvasaun nian’’, dehan Pe. Nivio.
Iha fatin hanesan Conselheiro Comisão Nasional Juventude Católica Timor-Leste (CNJCTL) Bruder Nico Lay hatete, halo reflesaun ida ba Amu Papa nia liafuan “atu lori joven haksolok iha esperansa, firme iha terus laran, la kole atu harohan’’.
“Hakarak joven sira bele senti Jesus nia presensa real iha sira-nia moris ida ne’ebé la fasil maibé ho situasaun sira difísil ne’e atu ema hotu bele deskobre presensa Maromak nian iha sira.
‘Ha’u mós hakarak dehan ba estudante sira katak imi mak futuru lideransa ba rai Timor-Leste nian, haksolok ba hakbesik aan ba uma kreda liu-liu ba atividade tomak ne’ebé bele kresce liután imi-nia fiar iha imi-nia prosesu no jornada moris hodi labele monu ba sala no sala ona karik buka atu hadia no la’o nafatin ba oin’’, dehan Bruder Niko.
#TimorLeste #UNTL #PRAPA 12 Dezembru 2023
Média UNTL 📝: Laurindo da Cruz Gomes
Foto 📷: Laurindo da Cruz Gomes
- Detalhes
- Escrito por Mateus Goncalves
- Visualizações: 213
Universidade Nacional Timor Lorosa'e (UNTL) nia Faculdade de Economia e Gestão nia Departamento de Gestão realiza semináriu ho tema "a vigência de vinte e um anos Timor-Leste : A Preparação do Capital Humano Forte e resiliente para Desenvolvimento Económico do Pais", iha Salaun UCT, Díli (6/11).
Visedekana ba Asuntu Akadémiku FEG nian, Profesora Rosena Martins hatete, estudante sira tenke prepara an didi'ak sai rekursu ne'ebé kualidade iha futuru hodi kontribui ba dezenvolvimentu nasaun nian.
"Ha'u hakarak dehan ba imi katak, prepara imi-nia an halo didi'ak hodi sai rekursu ne'ebé kualidade, nune'e bele kontribui ba nasaun ida-ne'e, atu muda mundu tenke muda uluk ita-nian an, muda sosiedade foin bele muda mundu", dehan Visedekana.
Oradora Domingas de Jesus dos Reis hatete, semináriu ne'e importante tebes ba sira hodi koalia kona-ba sub-tema" Dezenvolviemtu Organizasaun no Mudansa" atu hasa'e estudante sira-nia abilidade iha área jestaun nian.
"Agradese ba estudante sira ne'ebé organiza ona atividade ida-ne'e, nu’udar dosente orgullu no fahe ona koñesimentu ba sira kona-ba jestaun nian, tanba nu’udar rekursu umanu ita presiza prepara an atu sai jestór ne'ebé di'ak" dehan Profesora.
Alexandre Mateus Pinto da Silva nu'udar Prezidente Komisaun Organizadora, agradese ba estrutura fakuldade, dosente no kolega estudante sira hotu, tanba bele kolabora ona hodi realiza semináriu ne'e no fiar katak sei aprende bukae ruma husi eventu ida-ne'e.
Levia de Jesus da Costa nu’udar estudante hatete, sira bele aprende oinsa prepara an sai rekursu ne'ebé kualidade hodi kontribui ba dezenvolvimentu nasaun nian, tanba ne'e agradese tebes ba orador sira ne'ebé fahe ona esperiénsia hamutuk ho sira.
Oradór ba semináriu ne'e, Sr. Januario Maria Neto ho tema "Importançia Gestão Organizasional para Elevar A Qualidade de Recurso Humano Em Timor-Leste" no partisipa iha eventu ne'e, estrutura fakuldade, dosente, estudante sira no konvidadu sira.
#TimorLeste #UNTL #FEG #Gestão 6 Dezembru 2023
Média UNTL 📝: Leonia de A. da Costa
Foto 📷: Mario Joni Mendonça