- Detalhes
- Escrito por Mateus Goncalves
- Visualizações: 177
Universidade Nacional Timor Lorosa'e (UNTL), nia Magnifiku Reitór profesór dr. João Soares Martins, MPH, Ph.D, prezidi isar bandeira ba fulan novembru nian, iha Kampus Sentral UNTL nian, Díli (6/11).
Iha serimónia ne'e, Magnífiku Reitór refleta katak, isár bandeira ne'e importante atu fanun nasionalizmu no patriotizmu ema ida nian, nune'e bele defini identidade nasaun, povu ida ne'ebé hatudu ezisténsia, dignidade no direitu.
"Isár bandeira ne'e atu fanun ita-nia nasionalizmu no patriótizmu nune'e tenki fó ondra no respeitu ba sakrifísiu moris nian ba liberdade, no husu ba funsionáriu sira la bele haree ba rejime espesial no rejime jerál, tanba nasaun Timor-Leste presiza ita-nia dedikasaun liuhusi prestasaun servisu hodi hanorin no halo peskiza ba komunidade tuir misaun UNTL nian", dehan Magnífiku Reitór.
Responsavél ba Serimónia Isar Bandeira ne'e, estudante Faculdade de Direito (FD), no partisipa husi Visereitór, Proreitór, Diretór Jerál, Diretór Nacional, Xefe Departamentu, Dekanu, Visedekanu, Dosente, Funsionáriu no estudante sira.
#TimorLeste #UNTL #FD 06 Novembru 2023
Média UNTL 📝: Denilson Amandio Barros
Foto 📷: Laurindo da Cruz
- Detalhes
- Escrito por Mateus Goncalves
- Visualizações: 356
Universidade Nacional Timor Lorosa'e (UNTL), nia Fakuldade Engenharia Ciência e Tecnologia (FECT), hetan vizita husi Prezidente Japan International Cooperation Agency (JICA), Dr. Tanaka Akihiko, hodi observa atividade ne'ebé hala'o iha nivel fakuldade nian.
Vizita refere hala'o iha Kampus FECT-Hera Díli (26/10), ho objetivu atu observa atividade ne'ebé hala'o iha nivel fakuldade nian, nomós troka ideia ho Magnífiku Reitór, Dekanu no dosente sira nune'e posibilidade bele apoiu ba kursu mestradu iha área Enjeñaria nian.
Aleinde ne'e mós halo vizita ba saladeaula no laboratóriu kada departamentu nian, no partisipa husi, Magnífiku Reitór Profesór dr. João Soares Martins MPH, Ph.D, Dekanu FECT nian, Profesór Adalfredo G. da Silva Ximenes, Vise-Dekanu sira, Diretór Departamentu, Dosente, Funsionáriu no Estudante sira.
#TimorLeste #UNTL #FECT #JICA 26 Outubru 2023
Média UNTL 📝: Denilson Amandio Barros
Foto 📷: Denilson Amandio Barros
- Detalhes
- Escrito por Mateus Goncalves
- Visualizações: 930
Universidade Nacional Timor Lorosa'e (UNTL) nia edifísiu foun ba Faculdade de Agricultura (FAGRI) nian ne'ebé konstrui iha Hera, Díli sei utiliza iha tinan 2024, tanba edifísiu tolu ne’e, nia konstrusaun ne’ebé responsabiliza husi kompañia Dany Star atinji ona 100% no kompañia Bobolait atinji ona 95% no Hedge Construction atinji 80%.
Proreitór ba Asuntu Dezenvolvimentu Institusionál Profesór Lelis Gonzaga Fraga, iha kampus sentrál UNTL nian, (23/10), hateten konstrusaun ba edifísiu foun tolu (3) ne’ebé konstrui ba FAGRI nian sei utiliza iha tinan oin tanba edifísiu ida ne'ebé responsabiliza husi Dany Star finaliza ona no rua seluk mak Bobolait atinji 95% no Hedge Construction atinji 80%.
"Kompañia Hedge Construction mak la’o neneik, tanba iha difikuldade ba klima iha tinan kotuk, maibé Dany Star konsege finaliza tiha ona no Bobolait atinji ona 95%, tanba ne'e FAGRI sei utiliza edifísiu foun ne'e iha tinan oin (2024)", dehan Proreitór.
#TimorLeste #UNTL #PRADI #FAGRI 26 Outubru 2023
Média UNTL 📝: Leonia de A. da Costa
Foto 📷: Leonia de A. da Costa
- Detalhes
- Escrito por Mateus Goncalves
- Visualizações: 342
Universidade Nacional Timor Lorosa'e (UNTL) nia Centro Estudo Cultura e Arte (CECA) realiza atividade kompetisaun ho modalidade haat (UNTL Star, Dansa Kultura, Koru no Drum Band), hodi kapasita estudante sira-nia talentu iha arte no kultura.
"Atividade ne'e, ami realiza ho objetivu atu kapasita talentioza sira iha modalidade Dansa Kultura, UNTL Star, Koru no Drum Band.
Ami fiar sira sei aprezenta ho di'ak iha oportunidade ne'e, kompeténsia tomak atu sai vensedór iha kompetitór sira-nia liman rasik", dehan Diretór CECA, Profesór Vicente Paulino, iha Kampus Sentral UNTL nian, Díli (25/10).
Reprezentante Eskola Sekundáriu Jerál Annur ne'ebé sai vensedór dahuluk ba kompetisaun Drum Band nian, Albina Leon Dias, agradese ba CECA-UNTL tanba bele realiza ona kompetisaun refere.
"Ami kontente tanba ho esforsu hotu ne'ebé ami luta, ohin konsege hetan vensedór dahuluk, agradese tebes ba CECA-UNTL tanba bele realiza ona kompetisaun ne'e, husu atu kontinua nafatin iha tinan oin" dehan Albina.
Rezultadu husi modalidade haat ne’ebé hala’o durante loron tolu 23-25 fulan ne'e, maka Vensedór ba Koru nian husi, Fakuldade Ezata (1 lugar), Medisina Siénsia no Saúde (2 lugar) no Agrikultura (3 Lugar), Vensedór ba UNTL Star nian mak, Fakuldade Ekonomia Jestaun (1 lugar), Fakuldade Medisina no Siénsia Saúde (2 lugar), FEG (3 lugar).
Dansa Kultura FEAH (1 lugar), FMCS (2 lugar), Fagri (3 lugar) no Drum Band nian, Eskola Sekundáriu Jerál An-nur (Primeiru Lugar), Eskola Sekundáriu St. Madalena Canosa (Segundu Lugar) no Eskola Sekudáriu Cristal (Terseiru Lugar).
Atividade ne'e organiza husi Ekipa CECA nian envolve estudante hotu husi fakuldade 9, inklui Drum Band envolve eskola sekundáriu tolu.
#TimorLeste #UNTL #CECA 26 Outubru 2023
Média UNTL 📝: Leonia de A. da Costa
Foto 📷: Leonia de A. da Costa
- Detalhes
- Escrito por Mateus Goncalves
- Visualizações: 290
Universidade Nacional Timor Lorosa’e (UNTL) liuhusi Faculdade de Economia e Gestão (FEG) nia Assosiasaun Akadémika Estudantil (AAE) realiza atividade Kultura Akadémika ho tema “Promove Kultura Akadémika Kontribui ba Dezenvolvimentu Ekonomia iha Timor-Leste’’, iha Auditóriu FEG-UNTL nian, Díli (25/10).
Prezidente Komisaun Organizadora Ronaldo da Silva hatete, atividade ne’e iha sekuénsia haat hanesan Seminariu, Diskusaun Aberta, Apresentasaun Mellór Graduadu no Diskursu Públiku atu bele promove estudante sira-nia koñesimentu iha área idak-idak nian.
‘’Objetivu husi ita-nia atividade ida ne’e atu konvida fali Mellór Graduadu sira FEG nian atu bele lori fali sira-nia projetu mai halo apresentasaun ba estudante sira hodi sai hanesan bukae ida iha prosesu aprendizajen nune’e ba oin estudante sira bele hatene ona oinsa prosesu hakerek monografia no oinsa bele halo peskiza’’, dehan Ronaldo.
Iha fatin hanesan, Oradora Cecilia Gomes Amaral Corte-real hatete, nia aprezenta kona-ba (Turizmo e Desenvolvimento Sustentavel iha Zona Espesiais Oecuse AmbenoTimor Leste) no ida ne’e mak Disertasaun Mestradu nian hakarak apresenta ba estudante sira atu bele foti sai hanesan materia ida ba sira iha sira nia prosesu aprendizajen.
“Agora vantajen husi ne’e ba estudante sira mak fó hanoin ba sira kona-ba oinsá estrutura hakerek no oinsa sira bele uza metodolojia sira no sira mós bele hatene oinsa bele estabelese objetivu ba peskiza nian klaru atu labele hamosu fali problemas ba iha peskiza, atu sira bele uza metodolijia sira hodi analiza dadus ka resultadu sira husi peskiza nian”, dehan Profesora Cecilia.
Atividade ne’e partisipa husi dosente, Assosiasaun Akadémika Estudantil Fakuldade (AAEF), Alumni sira no oradór sira inklui estudantes sira.
#TimorLeste #UNTL #FEG #AAE 26 Outubru 2023
Média UNTL 📝: Laurindo da Cruz Gomes
Foto 📷: Laurindo da Cruz Gomes