- Detalhes
- Visualizações: 499
#TimorLeste #UNTL #FCS #COVID19 #COVID19TL 20 DEZEMBRU 2021
Universidade Nacional Timor Lorosa’e (UNTL) nia Fakuldade Siénsia Sosiál (FCS) konstitui husi departamentu hitu (7) hala’o revizaun daruak ba Kurríkulu European Credit Transfer System (ECTS) ne’ebé implementa ona iha dezde 2014 no halo tan ajustamentu ikus hafoin hato’o ba Universidade hodi aprova. 
“Revizaun ne’e ita halo ona ba datoluk, ne’e atu armoniza, kurríkulu FCS nian no fó espasu ba departamentu idaidak ne’ebé eziste iha fakuldade atu aprezenta sira-nia rezultadu armonizasaun bazeia rekomendasaun sira iha Aileu, no revizaun daruak ne’ebé hala’o tiha ona iha fatin ne’e iha 18-21 agustu liubá”, hateten Dekanu FCS, Profesór Camilo Ximenes Almeida, iha abertura ne’ebé hala’o iha Polo Universitáriu, Maumeta Likisá (17/12).
Profesór Camilo mós hatutan tan katak, revizaun kurríkulu ECTS bazeia ba rekomendasaun husi avaliasaun ANAAA nian, ajusta ho globalizasaun siénsia no inovasaun, no hafoin finaliza revizaun fakuldade sei halo rekapitulasaun hodi finaliza.
“Kurrikulu ne’e sempre iha mudansa bazeia ba demanda, no durante loron tolu ne’e (17-19) ita bele kompleta ona revizaun ho mudansa (globalizasaun siénsia no inovasaun) ne’ebé ita hotu hakarak ho formasaun ida kualidade ba foin sa’e sira”, tenik.
Partisipa husi Reprezentante Konsellu Doutór FCS nian, Profesór Alarico da Costa Ximenes, PhD, Profesora Therese N. T. Phong Tam,Ph.D, Dekanu ho nia Visedekanu sira, Diretór no Vise-diretór Akadémiku sira, Xefe Administrasaun Sra. Ilda Maria de F. Guterres, L.Ec, dosente, funsionáriu no reprezentante estudante sira. 
Média UNTL 📝 : Miguel Gonçalves
Foto 📷 : Maria Isabel Freitas Moreira, Arkivu FCS 2021
- Detalhes
- Visualizações: 556
#TimorLeste #UNTL #JapanEmabssyinTimorLeste #AstomosEnergyCorporation #COVID19 #COVID19TL 15 Dezembru 2021
Universidade Nacional Timor Lorosa’e (UNTL) nia estudante na’in 20 ne’ebé selesionadu husi Fakuldade sira iha universidade nasionál hetan bolsu-estudu husi Astomos Energy Corporation Japaun 🇯🇵. Bolsa ne’ebé atribui ho objetivu atu fó ba estudante hodi hasa’e liután sira-nia koñesimentu iha área estudu ne’ebé oferese.
Liuhusi serimónia atribuisaun ne’ebé hala’o iha Auditóriu Liceu UNTL nian, Díli (15-12), Magnífiku Reitór UNTL, Profesór dr. João Soares Martins, MPH, Ph.D, iha diskursu hateten, universidade koopera ho kompañia Astomos Energy Corporation hodi fó bolsa ba estudante sira, ne’e importante tebes tanba hanesan resposabilidade korporativu sosial.
“Kooperasaun hahú husi 2015 to’o ohin loron, bolsa ne'e fó husi Astomoa Energy Coorporation, hodi fó tan bolsa ba estudante sira. Ha’u hanoin ne’e importante tebes atu dezevolve imi-nia kapasidade espera katak ba oin Japaun nafatin fornese oportunidade sira hanesan ne’e ba timoroan liuliu estudante UNTL”, tenik Reitór. 
Magnífiku Reitór dezeja katak bolseiru sira sei uza oportunidade ne’e ho responsabilidade nune’e mós fahe koñesimentu hirak ne’e ba kolega sira seluk.
Iha fatin hanesan, Diretora-Jerál Ministériu Ensinu Superiór, Siénsia no Kultura (MESSK) nian, Dra. Maria Filomena Lay Guterres, kongratula estrutura Universidade nian ba esforsu hotu hodi kontribui ba kualifikasaun estudante sira-nian liuhusi kooperasaun ho nasaun sira seluk fornese bolsa ba estudante.
“MESSK kongratula estrutura UNTL sira hotu tanba ho esforsu makas atu lori kualifikasaun ba estudante sira liuhusi oportunidade sira ne’e, no husu ba bolseiru sira atu uza ho responsabilidade tanba oportunidade sei la mai dalabarak”, dehan Diretora Lay.
Iha fatin hanesan, Reprezentante Embaixadór Japaun nian, Sra. Nomi Tsakasi, hato'o kongratula ba benefisiáriu sira tanba selesiona ba Astomos Energy Corporation 2021 Scholarship.
"Ohin loron importante ba ha'u atu hato'o S.E. Embaixadór nia mesajen ba bolseiru sira mak selesionadu, hanesan oportunidade ida ba foin sa'e timoroan sira atu prepara rekursu umanu kualifikadu no exelente ba futuru, dezde 2015 estudante na'in 100 mak benefisia ona", hatutan.
Iha serimónia refere, partisipa husi Diretór Astomos Energy Coorporation nian, Sr. Yosihito Takahashi ho nia ekipa, liuhusi Zoom, Visereitora ba Asuntu Estudantís Eng.ª Lígia Tomas Correia, M.Sc dosente, estudante, no família bolseiru sira, inklui konvidadu sira.
Média UNTL 📝: Leonia de A. da Costa
Foto 📷: Leonia de A. da Costa
- Detalhes
- Visualizações: 691
#TimorLeste #UNTL #SECA #COVID19 #COVID19TL 16 Dezembru 2021
Universidade Nacional Timor Lorosa’e (UNTL) nia Sentru ba Estudu Arte no Kultura (SECA) lansa livru poesia ho títulu “Alma Guerreira Timorense” ne’ebé reflete memória pasadu Timor-Leste nian no konteúdu krítika ba polítika kontemporánea, liuhusi espresaun poétika. 
Relasiona ho lansamentu refere, iha Auditóriu Liceu UNTL nian Dili (15/12), Diretór SECA nian, Profesór Doutór Vicente Paulino, hateten katak livru ne’ebé lansa ne’e, segundu livru literária no primeiru livru publika ona iha 2018 ho títulu “Leitura do Mundo e da Natureza’’.
‘’Livru ida ne’e reflete kestaun luta timoroan sira-nian ne’ebé hakarak livre, independente no livru ne’e ko’alia liu kona-ba memoria eroi sira-nian liu-liu saida mak sira halo iha momentu ne’ebá, sira-nia esforsu, no kontribuisaun ba Timor-Leste ida maka livre hanesan ohin loron’’, tenik autór ba livru Alma Guerreira Timorense ne’e.
Profesór Vicente mós koko espresa kestaun polítika ho nia versu, hodi fanun na’i ulun sira atu bele ukun tuir dalan di’ak ba povu no iha forma edukasaun ba estudante sira enrikese tan saida mak sira hetan iha aula, no sira bele hatene realidade heroi sira mak livru ne’e hato’o.
Iha fatin hanesan, Profesór Bernabé (Abé) Barreto Soares hateten, poesia iha nia kapasidade atu halo transformasaun karater ema nian no nia hanesan bee ne’ebé penetra neineik nia sei muda buat hotu.
“Politika ne’e foer, korruptór maibé poesia mak sei bele hamoos no ita hakarak lori poesia ne’e sai nu’udar materiál, husi ensinu pre-primária to’o iha nivel universitáriu altu”, tenik profesór Abé.
Profesór Adérito José G. Correia mós hato’o parabéns ba Profesór Vicente, tanba bele espresa hanoin, koñesimentu no esperiénsia liuhusi poesia ne’ebé importante ba ema atu lee no refleta ba istória no versu krítika.
“Hau atu dehan katak, liafuan sira ne’ebé hato’o iha ne’e importante ba ita-nia istória, obra poétiku furak, tanba ne’e importante tebes ba alin estudante sira atu aproveita lee, komprende no buka hatene hakerek poezia ne’ebé haktuir realidade ohin loron nian’’, tenik.
Partisipa iha lansamentu ne’e Diretór Departementu Komunikasaun Sosiál, Profesór Marcelino Ximenes Magno, dosente sira, estudante husi Departamentu Ensinu Dalen Tetun, Komunikasaun Sosiál no konvidadu sira.
Média UNTL 📝: Laurindo da Cruz Gomes
Foto 📷: Laurindo da Cruz Gomes
- Detalhes
- Visualizações: 434
#TimorLeste #UNTL #COVID19 #COVID19TL 18 Dezembru 2021
Universidade Nacional Timor Lorosa’e (UNTL) nia Proreitoria ba Asuntu Provedoria Akonsellamentu (PRAPA), selebra missa agradesimentu graduasaun ba daruanulu resin-lima (XXV), hodi agradese ba bensaun Maromak nian ba graduandu sira ne’ebé remata ona sira-nia estudu iha universidade nasionál.
Antes ba graduasaun selebra missa agradesimentu hodi husu bensaun, tanba durante matenek ne’ebé estudante no dosente sira inklui Sívitas Akadémika hetan, mai husi kbiit no bensaun Maromak nian nune’e konsege finaliza ho rezultadu di’ak.
Missa agradesimentu ne’e, prizide husi Padre Kapelaun UNTL, Pe. Nívio Correia Lebre, Fdcc, iha Igreja Sagrado Coração de Jesus-Becora Díli, (17/12), no partisipa husi, Magnífiku Reitór, Profesór dr. João Soares Martins, MPH, Ph.D, Visereitór, Proreitór, Dosente, Funsionáriu no Sívitas Akadémika tomak, inan-aman inklui sarani sira.
Média UNTL 📝 : Leonia de A. da Costa
Foto 📷 : Pio Belo Ximenes, Denilson A. Barros
- Detalhes
- Visualizações: 621
#TimorLeste #UNTL #FMCS #COVID19 #COVID19TL 15 Dezembru 2021
Universidade Nacional Timor Lorosa’e (UNTL), nia Fakuldade Medisina Siénsia Saúde (FMCS) realiza kompetisaun debate sientífiku ho tema “Impaktu Pandemia COVID-19 iha Timor-Leste” ne’ebé organiza husi Asosiasaun Akadémika Estudantil AAE-FMCS nian, iha Salaun Institutu Nasionál Saúde (INS) nian, Komoro-Díli (08/12).
Relasiona ho eventu ne’e, Dekanu FMCS nian, Profesór José Deonísio Ximenes, hateten objetivu husi debate refere atu promove estudante nia talentu sientífiku, liuliu atu kulturaliza debate ne’e hanesan asuntu importante iha Fakuldade.
“Espera katak husi pensamentu sira ne’e, bele sai hanesan ideia mais prinsipál hodi bele kontribui ba siénsia sira, liuliu iha área Medisina no Saúde nian”, tenik Dekanu.
Dekanu hatutan, debate ne’e konsentra ba pandemia COVID-19 iha Timor-Leste, kontinua buka atu hatene no hamosu ideia ne’ebé inovativu, nune’e bele kontribui siénsia iha Timor-Leste.
Partisipa iha debate akadémiku ne’e, dosente, estudante FMCS, partisipante sira husi UNPAZ, UNITAL, ICS no konvidadu sira.
Média UNTL 📝 : Denilson Amandio Barros
Foto 📷 : Honorio Guterres