- Detalhes
- Escrito por Mateus Goncalves
- Visualizações: 3494
#TimorLeste #UNTL #PRAPA #FECT 26 Fevereiru 2021
Universidade Nacional Timor Lorosa’e (UNTL) nia Kapela São João Paulo II, ne’ebé lokaliza iha Fakuldade Enjeñaria, Siénsia no Teknolojia (FECT), Hera-Díli, hanesan fatin hodi implementa atividade pastorál universidade nian liuhusi misa kada semana, reflesaun no selebrasaun eukaristia ba sivitas akadémika.
“Durante tempu Kuarezma ne’e, kada fulan iha primeira-semana loron sexta iha adorasaun santísimu ba sivitas akadémika tomak, nune’e mós atividade ansidental sira depende ba pedidu husi universidade, hanesan foin lalais ita selebra Kuarta-Feira Sinzas, atividade abertura tinan letivu nian”, hateten Amu Kapelaun UNTL nian, Pe. Nívio Correia Lebre, Fdcc, iha Kampus Sentrál (23/02), Díli.
Pe. Kapelaun reforsa liután, aleinde atividade iha Kapela São João Paulo II, UNTL liuhusi Proreitoria ba Asuntu Provedoria no Akonsellamentu (PRAPA), nia Departamentu ba Formasaun Espirituál nian, sei promove ba Fakuldade hotu kona-ba formasaun iha dezenvolvimentu karakter, no formasaun espirituál no selebrasaun misa atu konsolida vida espirituál no umana nian ba sívitas akadémika tomak.
Kapela refere hetan ofisialmente aprovasaun husi Arcebispo Metropolitano Diocese Díli, Don Virgilio do Carmo da Silva, SDB, sai hanesan uma mahon ida ba sívitas akadémika tomak atu dezenvolve ho kompletu matenek no fiar espirituál nian.
Média UNTL 📝 : Denilson A. Barros (estajiáriu)
Foto 📸 : Denilson A. Barros (estajiáriu)
- Detalhes
- Escrito por Mateus Goncalves
- Visualizações: 6759
#TimorLeste #UNTL #FFCH 26 Fevereiru 2021
Universidade Nacional Timor Lorosa'e (UNTL) nia Magnífiku Reitór, Profesór dr. João Soares Martins MPH, Ph.D, akompaña husi Visereitór sira, hasoru malu ho estrutura Fakuldade Filozofia no Siénsia Umana (FFCH) nian, hodi rona direta progresu no dezafiu sira mak fakuldade enfrenta.
Reuniaun ne'ebé realiza iha Sala Vídeo Konferénsia UNTL nian, Díli (26/02), FFCH nian Dekanu, Profesór Martinho Borromeu, aprezenta ba estrutura foun universidade nasionál nian kona-ba progresu no dezafiu sira mak fakuldade enfrenta atu haree hamutuk no hadia pasu sira ba oin.
Dekanu mós apresenta planu prioridade sira ne'ebé fakuldade iha atu implementa relasiona ho atividade ensinu, peskiza no dedikasaun komunitária.
Partisipa iha reuniaun refere, Visereitór ba Asuntu Akadémika no Garantia Kualidade nian, Profesór Doutór Samuel Venâncio de Sousa Freitas, Visereitóra ba Asuntu Estudantís, Profesora Eng. Lígia Tomás Correia, M.Sc, Dekanu Fakuldade Filosofia ho nia Vise dekanu sira.
Média UNTL 📝: Leonia de Araújo (estajiária)
Foto 📷: Leonia de Araújo (estajiária)
EKIPA REITORÁL UNTL RONA APREZENTASAUN HUSI EKIPA PPGE KONA-BA PROPOSTA KURSU MESTRADU IHA EDUKASAUN
- Detalhes
- Escrito por Mateus Goncalves
- Visualizações: 488
#TimorLeste #UNTL #FEAH #PPGE 26 Fevereiru 2021
Universidade Nacional Timor Lorosa'e (UNTL), nia Magnífiku Reitór Profesór dr. João Soares Martins MPH, Ph.D akompaña husi Visereitór no Proreitór sira, partisipa iha aprezentasaun husi ekipa Programa Pós-Graduação em Educação (FPGE), kona-ba proposta kursu foun mestradu iha área edukasaun nian, iha sala Vídeo Konferénsia (25/02), Díli.
Kursu Mestradu iha área Edukasaun ne'e integra iha Fakuldade Edukasaun Arte no Umanidade (FEAH), no apoiu husi Agência Brasileira de Cooperação no Universidade Federal de Santa Catarina, Brazil.
Hafoin aprezentasaun, Reitór apresia esforsu ekipa PPGE nian, hodi elabora ona kuríkulu, no husu atu koordena ho Visereitór ba Asuntu Pós-Graduasaun no Peskiza atu organiza konferénsia ida hodi fó oportunidade ba fakuldade sira relasiona ho asuntu refere.
"Ekipa halo ona kurikullu no apresentasaun maibé ita iha Visereitór ba Asuntu Pós Graduasaun no Peskiza sei organiza konferénsia ida ba hotu-hotu, hodi fó oportunidade ba FEAH, inklui fakuldade sira ne’ebé atu loke sira-nia kursu pós-graduasaun no mestradu”, tenik Reitór.
Iha fatin hanesan, Diretor Sentru Estudu Kultura no Arte, Profesór Doutór Vicente Paulino, hateten katak aprezentasaun ne’ebé realiza hanesan proposta ida ba kriasaun mestradu iha área edukasaun ho área haat ba Reitór ho nia Ekipa-Reitorál.
"Ohin ha’u ho ekipa ami halo aprezentasaun kona-ba proposta kriasaun kursu mestradu iha área Edukasaun ho liña Peskiza haat hanesan (1) Língua, literatura no edukasaun, (2) Kuríkullu i formasaun profesór, (3) Edukasaun sientífika, matemátika i teknolójika, (4) Edukasaun, ambiente, sosiedade i movimentu sosiál, hodi hetan sujestaun balun husi estrutura sira” tenik Profesór Vicente Paulino.
Diretór Sentru Estudu Kultura no Arte ne’e mós hatutan sira sei fila ba hadia parte balun ne’ebé refere iha rekomendasaun ne’ebé hato’o husi Reitór ho nia estrutura liuliu atu priense rekezitu sira husi Ajénsia Nasionál ba Avaliasaun no Akreditasaun Akadémika (ANAAA).
Partisipa iha reuniaun ne'e Visereitór ba Asuntu Akadémiku no Garantia Kualidade, Profesór Doutór Samuel Venâncio de Sousa Freitas, Proreitór ba Asuntu Kooperasaun, Profesora Doutora Lídia Gomes, SKM, M.D., Dekana Fakuldade Edukasaun, Arte no Umanidade (FEAH) Profesora Doutora Ana Cristina de J. S. Martins, Diretór Sentru Estudu Kultura no Arte, Profesór Doutór Vicente Paulino, ho nia ekipa.
Média UNTL 📝: Agostinho da Cruz e Silva
Foto 📸: Agostinho da Cruz e Silva
- Detalhes
- Escrito por Mateus Goncalves
- Visualizações: 614
#TimorLeste #UNTL #SEJ #ArquidioceseMetropolitanaDili 26 Fevereiru 2021
Universidade Nacional Timor Lorosa'e (UNTL) nia Magnífiku Reitór Profesór dr. João Soares Martins MPH, Ph.D, hamutuk ho Arcebispo Díli, Dom Virgílio do Carmo da Silva, S.D.B, partisipa atividade kuda ai-kasi oan atus ida (100) iha Jardin Motael-Díli, ne’ebé organiza husi Sentru Estudu Jeneru (SEJ)-UNTL (26-02).
Magnífiku Reitór hateten katak inisiativa ne’e husi Sentru Estudu Jéneru (SEJ)-UNTL ho objetivu atu enkoraja komunidade atu kuda ai-oan hodi hamatak ambiente sidade Díli.
“Inisiativa furak husi SEJ-UNTL nian, maské sira-nia sentru ko’alia kona-ba igualdade jenéru maibé sira iha vontade realiza mós atividade kuda ai-oan, tanba ne’e ha’u hakarak enkoraja nafatin sira, atu kontinua hodi promove ba oin”, tenik Magnífiku Reitór.
Iha fatin hanesan, Arcebispo Metropolitano de Díli hateten katak atividade mai husi inisiativa sira ho objetivu atu hamatak rai liuhusi kuda ai-oan.
“SEJ-UNTL nia inisiativa ne’e furak tebes tanba ne’e ohin ha’u mai hamutuk ho sira kuda ai-kasi oan, la haluha enkorajen nafatin ba komunidade, liu-liu ba joven sira presiza promove kuda ai-oan, no hakas an atu fó liman ba malu hodi hamatak liután ita-nia rain liuhusi ai-kasi ne’ebé ita kuda.” tenik Arcebispo Díli.
Enkuantu Komisaun Organizadóra, Profesór Gil da Conceição, hateten katak kuda ai-kasi oan bele fó oksijeniu di’ak ba sidade Díli, liu-liu halo matak liután.
“Objetivu ida mak bele fó oksijéniu di’ak ba ema, halo sidade Díli sai matak, hein tinan 5 mai sei bele furak no atrai ema seluk ne’ebé hakarak mai visita Timor”, tenik Profesór Conceição.
Profesór Gil mós klarifika katak atividade kuda ai-oan ne’e hetan apoiu husi Ministériu Agrikultura no Peska liuhusi Diresaun Floresta nian no totál husi ai-oan ne’ebé kuda hamutuk atus ida.
Atividade kuda ai-oan partisipa husi Magnífiku Reitór Profesór dr. João Soares Martins MPH,Ph.D, Arcebispo Metropolitano Díli, Don Virgílio do Carmo da Silva SDB, Diretór SEJ-UNTL, Profesór Gil da Conceição ho nia ekipa, estudante UNTL, Komandante Polísia Eskuadra Munisípiu Díli ho nia ekipa, ho universitáriu sira iha Díli laran, inklui estudante ensinu sekundária sira.
Média UNTL 📝 : Denison A. Barros (estajiáriu)
Foto 📸 : Denison A. Barros (estajiáriu), Agostinho da Cruz e Silva
- Detalhes
- Escrito por Mateus Goncalves
- Visualizações: 3740
#TimorLeste #UNTL #FD 26 Fevereiru 2021
Universidade Nacional Timor Lorosa'e (UNTL) nia Magnífiku Reitór Profesór dr. João Soares Martins MPH, Ph.D, akompaña husi Visereitór no Proreitór sira, hasoru malu ho estrutura Fakuldade Direitu nian, hodi rona direta progresu no dezafiu sira mak fakuldade enfreta.
Iha Sala Vídeo Konferénsia UNTL nian, Díli (25/02), Dekanu Fakuldade Direitu nian, Profesór Isidoro Viana da Costa, hato’o ba estrutura foun universidade nasionál nian kona-ba progresu no dezafiu sira mak fakuldade enfrenta atu atualiza no haree hamutuk pasu sira ba oin.
Toka mós kona-ba planu sira fakuldade nian, liuliu planu atu implementa "ano zero", reativa kursu mestradu no planu atu loke kursu estensaun.
Partisipa iha reuniaun refere, Visereitór ba Asuntu Akadémika no Garantia Kualidade nian, Profesór Doutór Samuel Venâncio de Sousa Freitas, Visereitór ba Asuntu Estudantís, Profesora Eng. Lígia Tómas Correia, M.Sc, Proreitór ba Asuntu Provedoria no Akonsellamentu Profesór Mestre Tomé Xavier Jerónimo, Dekanu Fakuldade Direitu, Profesór Isidoro Viana da Costa, ho nia Vise-dekanu sira.
Média UNTL 📝: Agostinho da Cruz e Silva
Foto 📷: Agostinho da Cruz e Silva