#TimorLeste #UNTL #ChineseEmabassyinTimorLeste #COVID19 #COVID19TL 13 Dezembru 2021
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH, Ph.D, iha Auditóriu FECT-UNTL nian, Hera (13/21), agradese tebes ba Governu Xina 🇨🇳 ne’ebé implementa progama bolsa ne’ebé benefísia direta ba estudante no motiva kontinua estuda di’ak liután. 
“Agradese ba Governu Xina ba apoiu, nomós husu ba benefisiáriu na’in 75 ne’e, atu utiliza di’ak apoiu ne’e, hanesan oportunidade no momentu di’ak hodi bele estuda, liuliu sosa materia ruma hanesan livru relasiona ho imi-nia kursu, nune’e bele mantein prestasaun akadémiku ne’ebé di’ak”, tenik Reitór.
Iha fatin hanesan, Embaixador Xina nian iha Timor-Leste, Dr. Xiao Jiangou, kongratula ba estudante ne’ebé hetan bolsa ne’e, no agradese mos ba Ministériu Ensinu Superior, Siénsia no Kultura (MESSK) no UNTL tanba promove implementasaun bolsa estudu refere. 
“Bolsa ne’e parte ida atu hametin lasu amizade entre nasaun rua no kongratula estudante sira ne’ebé hetan bolsa ida ne’e, no agradese ba MESSK ne’ebé promove implementasaun bolsa estudu ida ne’e. Espera liuhusi programa ne’e bele tulun estudante sira no família atu atinji sira-nia susesu iha futuru”, tenik Embaixador.
Iha fatin hanesan, Próreitora ba Asuntu Koopersaun, Profesora Doutora Lídia Gomes, hateten bolsa ne’e fó ba estudante ne’ebé kbi’it laek nomós mellór estudante atu ajuda no motiva hodi esforsu-an estuda liután.
“Enkoraja nafatin ba estudante sira, liuhusi motivasaun atu estuda makas no mantein nafatin ho imi-nia valór ne’ebé iha nune’e bele kompete ho estudante seluk iha tinan oin”, hatutan Profesora Lídia. 
Brígida do Santos nu’udar bolseira senti orgullu tebes nomós agradese ba Governu Xina ne’ebé apoiu ona, no sei esforsu an hodi estuda.
“Ha’u nia lia menon ba maluk estudante sira hotu katak, la bele baruk atu aprende no estuda tanba liuhusi estuda no aprende ita bele susesu iha futuru”, tenik Brigida.
Bolseiru na’in hitu nulu resin lima (75) ne’e kompostu husi mellor estudante (38), no Bolsa hakbi’it (37).
Partisipa iha atribuisaun bolsa ne’e Visereitora ba Asuntu Estudantís, Profesora Eng.,ª Lígia Tomás Correia, M.Sc, Próreitor ba Asuntu Desenvolvimentu Institusionál, Profesór Doutór Lelis Gonzaga, Diretora-Jerál Ministériu Ensínu Superiór, Siénsia no Kultura (MESSK) Dra. Maria Filomena Lay Guterres, Aman-Inan, Dosente, Estudante no Konvidadu sira.
Média UNTL 📝 : Denilson Amandio Barros
Foto 📷 : Nercia Guterres Gusmão, Titi Inacia (Arkiva Bolseira)