#TimorLeste #UNTL #FMCS #DP #COVID19 #COVID19TL 14 Dezembru 2021
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH, Ph.D, partisipa iha aprezentasaun estudu kazu profile no prosesu prátika I, II no III nian, ne'ebé elabora husi Fakuldade Medisina Siénsia Saúde (FMCS) liuhusi Departamentu Parteira (DP) nia estudante sira iha Hospital Referal Maubisse (13/12).
Relasiona ho aprezentasaun refere, Magnífiku Reitór apresia no husu ba estajiária sira atu buka aprende tan iha prátika ne'ebé hala'o iha ospitál.
“Esperiénsia ne'ebé imi hetan iha ne'e, uza didi'ak ba situasaun saida de’it, presiza iha abilidade ne’ebé ita bo’ot sira ida-idak iha atu to’o iha susesu presiza estuda maka’as no aprende liután, atu aumenta abilidade ita bo’ot sira nian”, tenik Reitór iha lokál estájiu.
Iha fatin hanesan, Diretora Ezekutiva Hospital Referal Maubisse nian, Dra. Gabriela da Conceição Magno Pereira, hateten, dezde dezloka iha lokál, estajiáriu sira tuir regulamentu iha fasilidade saúde nian no bele asesu ba prátika iha departamentu ne’ebé eziste iha ospitál.
“Estudante hirak ne’ebé mai estájiu iha ne’e, ba dahuluk kumpri regulamentu ne’ebé ospitál ne’e estabelese, no sira livre asesu ba Departamentu hotu iha ne’e, hanesan sala konsulta nian, balun ba espesífiku nian hanesan asesu ba iha sala partus ninian”, tenik Diretora.
Diretora Magno dezeja katak, estudante sira sei fila ho esperiénsia ne'ebé hetan iha hospital refere atu kontinua ba idaidak nia futuru.
Iha fatin hanesan, orientadora Profesora Etelvina José Tilman hateten, iha DP implementa prátika iha faze lima mak estudante sira tenki tuir, no sira ne’ebé hala’o prátika iha Hospital Referal Maubisse ne’e (hala’o prátika I, II no III).
“Prátika I ne’e haree kona-ba Profile (rekursu umanu, estrutura no haree mós ba atendimentu pasiente sira), prátika II nian, haree liubá fundamentu báziku enfermajen nian (haree vasina, tau soro no seluk tan, prátika III nian (atendimentu ba inan sira partus, tratamentu ba bebé foin moris no seluk tan)”, tenik Orientadora.
Hafoin estudante sira remata prátika iha Maubisse, sei fila mai universidade kontinua aprende hodi partisipa iha prátika IV nian maka estudante sira bele fó partus ba inan isin rua sira tenki to’o na’in 30, hafoin sira bele kontinua prátika V estájiu komunitáriu hodi aplika siénsia no aprende husi komunidade.
Estudante na’in 48 ne'e, hahú estájiu husi Outubru 2021 to’o Janeiru 2022, hafoin hala’o pratika fulan ida resin sira aprezenta ba sira-nian rezultadu estudu kazu relasiona progresu prátika.
Média UNTL 📝 : Agostinho da Cruz e Silva
Foto 📷 : Agostinho da Cruz e Silva