#TimorLeste #UNTL #MESSK #MEJD #IPB #COVID19 #COVID19TL 9 Dezembru 2021
Universidade Nacional Timor Lorosa’e (UNTL) nia Visereitoria ba Asuntu Akadémiku no Garantia Kualidade servisu hamutuk ho Ministériu Ensinu Superiór, Siénsia no Kultura (MESSK) no Ministériu Edukasaun, Juventude no Desportu (MEJD), liuhusi Komisaun Asesu ba Ensinu Superiór (CAES), dezde 23 Novembru to'o 3 Dezembru rejista ona kandidatu na’in rihun haat atus rua tolunulu resin haat (4235).
Diretór Nacional ba Atendimentu Estudante (DNRAE), Sr. Rui Loco, hafoin observa rejistu ba estudante sira ne’ebé remata iha 2020 ba kotuk hodi asesu ba Ensinu Superiór Públiku 2022, ekipa ne’ebé hala’o rejistu iha Munisípiu Likisá no Ermera hateten atendimentu ba estudante la’o ho diak, estudante sira mós tuir rekesitu ne’e mak iha. 
“Bazeia ba Diploma Ministeriál UNTL Ensinu Superiór Públiku, tanba ne’e ita servisu hamutuk MESSK ho IPB hodi simu estudante foun atu asesu mai iha UNTL, tanba ne’e mak ohin ha’u mai iha ne’e atu observa kona-ba atividade rejistrasaun nian iha munisípiu rua nian tantu Ermera no Likisá”, tenik Diretór Rui, iha Edifísiu Edukasaun Munisípiu Likisá (02/12).
Diretór mós hatutan tuir observasaun ba iha Munisípiu Ermera no Likisá nian estudante ne’ebé halo rejistrasaun barak liu iha munisípiu Ermera nian tanba kada loron sira rejistu na’in 50 ba leten.
Iha fatin hanesan, Diretór Edukasaun Munisípiu Likisá, Sr. Carlos Lopes, hateten, antes tama ba rejistrasaun parte Edukasaun Munisípiu nian partilla tiha ona informasaun liuhusi Rádiu Tokodede, sosializa mós ba Autoridade Lokal sira, nune’e mós avizu iha Igreja.
“Prosesu rejistrasaun ne’e sira publika informasaun liuhusi Radio Tokodede, nune’e mós avizu iha misa no hasoru malu ho Xefe Suku sira, liuliu iha área remota sira atu bele partilla informasaun ba estudante sira ne’ebé difisil atu asesu ba informasaun hodi bele mai rejistu no tinan ne’e iha mudansa tanba ema barak mak konsege asesu”, hateten Diretór.
Rejistrasaun ba estudante hirak ne’ebé atu asesu ba Ensinu Superiór Públiku iha Timor-Leste, kobre munisípiu hotu inklui Rejiaun Espesiál Administrativa Oecusse Ambeno (REAOA), dezde loron 23 Novembru 2021 remata 03 Dezembru 2021. Hafoin rejistu data ba ezame nian, sei hala’o iha idaidak nia munisípiu entre loron 20 to’o 23 Dezembru 2021. 
Média UNTL 📝 : Agostinho da Cruz e Silva
Foto 📷 : Agostinho da Ctruz e Silva