- Detalhes
- Escrito por Mateus Goncalves
- Visualizações: 782
#TimorLeste #UNTL #MESSC 2 Marsu 2021
Universidade Nacional Timor Lorosa’e (UNTL) nia Magnífiku Reitór Profesór Doutór João Soares Martins, MPH, Ph.D simu vizita husi Diretór Nasionál Kurríkulu, Ministériu Ensinu Superior, Siénsia no Kultura (MESSC), Sr. Luis Aparicio, akompaña husi nia Xefe Departamentu ba Kurríkulu nian, Sr. Angelmo Xavier, iha Gabinete Reitór nian, Díli (2/3).
Motivu husi vizita ne’ebé hala’o ne’e, atu konvida Magnífiku Reitór hodi partisipa iha semináriu Nasionál ne’ebé sei realiza iha loron 23 marsu 2021, iha Díli Timor-Leste.
Iha eventu ne’ebé sei hala’o, Reitór UNTL nian sei partisipa semináriu nasionál ho tema "O Currículo no Ensino Superior em Timor-Leste: Contributos e Desafios para uma Formação de Qualidade. Konvite refere realiza tanba antes ne’e, Reitór hanesan Koordenadór Kuríkulu iha área Saúde nune’e hanesan péritu ida iha semináriu ne’e.
Média UNTL 📝: Agostinho da Cruz e Silva
Foto 📷: Agostinho da Cruz e Silva
- Detalhes
- Escrito por Mateus Goncalves
- Visualizações: 2392
#TimorLeste #UNTL #VRAE 2 Marsu 2021
Universidade Nacional Timor Lorosa’e (UNTL) nia Visereitora ba Asuntu Estudantíl (VRAE) organiza estudante sira hala’o vizita ba Arquivo e Museu da Resistência Timorense (AMRT) atu fó koñesimentu kona-ba istória luta ba independénsia nian, valoriza eroi no eroina sira, no hametin espiritu patriotizmu no nasionalizmu ba jerasaun foun.
Proreitór ba Asuntu Provedoria no Akonsellamentu (PRAPA) Profesór, Tomé Xavier Jerónimo, SH,MD-PRi ne’ebé reprezenta VRAE hodi halo abertura ba atividade refere (1-3) hateten katak, objetivu vizita nian atu lori estudante sira koñese eroi sira no istória Timor-Leste nian.
“Intensaun husi vizita ida ne’e UNTL hakarak ita-nia jerasaun foun bele koñese istória luta nian, sira bele haree fotografia no filmajem ne’ebé eroi no eroina sira durante funu, ne’ebé estadu arkiva hela iha AMRT hodi book sira-nia sentimentu nasionalizmu, atu luta ba sira-nia futuru no dezenvolvimentu ba rai ida ne’e’’, tenik Proreitór PRAPA.
Iha fatin hanesan, estudante Fakuldade Ekonomia no Jestaun (FEG) nian, António Maria Lemos sente kontente tanba bele hetan oportunidade atu bele vizita iha Arquivo e Museu da Resistência Timorense bele konese eroi sira-nia luta ba Ukun Rasik-An.
“Hau sente kontente tanba antes ne’e, ha’u mai ona maibé agora bele mai tan dala ida atu aumenta tan koñesimentu kona-ba materia ne’ebé antes hetan ona relasiona istoria luta ba libertasaun nian”, tenik Gregorio.
Entretantu, estudante Fakuldade Medisina Siénsia Saúde (FMCS), Bincensia Apriana Finet ho orgullu tebes iha vizita refere tanba aprende no hatene ona kona-ba prosesu luta ba libertasaun nasionál.
“Ha’u sente kontente tebes, foin mai iha ne’e hodi aprende kona ba istória no ha’u mós apresia tebes ba esforsu tomak eroi no eroina sira-nian, ohin loron ita bele hetan liberdade”, tenik Bincensia.
Programa vizita ne’e hala'o durante loron rua hahú husi loron 1 to’o 2 marsu, no vizitante reprezenta husi fakuldade sira UNTL nian hamutuk na’in atus ida (100).
Média UNTL 📝: Laurindo Da Cruz (estajiáriu)
Foto 📷: Denilson A. Barros (estajiáriu
- Detalhes
- Escrito por Mateus Goncalves
- Visualizações: 661
#TimorLeste #UNTL #ANAAA 1 Marsu 2021
Universidade Nacional Timor Lorosa'e (UNTL) nia Magnífiku Reitór Profesór dr. João Soares Martins, MPH, Ph.D, akompaña husi Visereitor sira, hasoru malu ho Diretór Ezekutivu Ajénsia Nasionál ba Avaliasaun no Akreditasaun Akadémika (ANAAA), Profesór Doutór Edmundo Viegas, no ekipa, iha Sala Vídeo Konferénsia UNTL nian, Díli (26/2).
Iha reuniaun refere, Magnífiku Reitór ho Visereitor sira rona esplikasaun husi Diretór Ezekutivu ANAAA kona-ba planu prioridade ne’ebé ajénsia nasionál sei realiza iha tinan ida (2021) ne'e hanesan akreditasaun programátika no reakreditasaun institusionál.
Aleinde ne’e, diskute mós kona-ba departamentu sira ne'ebé seidauk pasa iha avaliasaun atu prepara ho didi’ak bazeia ba rekomendasaun sira ne'ebé ANAAA propoen ona, nune'e bele pasa iha reakreditasaun.
Partisipa iha reuniaun Visereitór ba Asuntu Akadémika no Garantia Kualidade nian, Profesór Doutór Samuel Venâncio de Sousa Freitas, Visereitór ba Asuntu Pós-Graduasaun no Peskiza, Profesór Gabriel António de Sá, Dekanu Fakuldade Ekonomia i Jestaun (FEG), Profesór Custódio Barata Ximenes, Dekana Fakuldade Edukasaun, Arte no Umanidade, Profesora Doutora Ana Cristina de J. S. Martins, Diretór Nasionál Avaliasaun Akadémika, Profesór Eurico Celestino dos Reis, no ekipa husi ANAAA nian.
Média UNTL 📝: Mateus Goncalves
Foto 📷: Mateus Goncalves
- Detalhes
- Escrito por Mateus Goncalves
- Visualizações: 620
TimorLeste #UNTL #MercyCorps 1 Marsu 2021
Universidade Nacional Timor Lorosa’e (UNTL), nia Magnífiku Reitór Profesór dr. João Soares Martins, MPH, Ph.D, hetan vizita husi Mercy Corps Timor Leste (MCTL) nia Ofisiál Programa ba Ekonomia Sirkular, Sra. Sonia Oliveira, iha Gabinete Reitór UNTL nian, Díli (01/03).
Iha vizita ne’e, Reitór UNTL hateten katak liuhusi sorumutuk refere bele rona esplikasaun husi ekipa MCTL nian kona-ba sira-nia programa ba implementasaun resiklajen plástiku hodi apoia planu governu nian kona ba “Zero Plástiku”.
“UNTL nu’udar instituisaun públiku, hakarak koopera ho MCTL hodi kontribui ba programa governu nian, redús lixu plástiku, nune’e UNTL oferese espasu ba MCTL hodi koloka lixu fatin iha área kampus, nune’e estudante sira bele soe lixu iha fatin ne’ebé prepara”, tenik Reitór.
Iha fatin hanesan Ofisiál Programa ba Ekonomia Sirkular MCTL nian hateten mós katak durante ne’e implementa hela programa resiklajem plástiku hodi sai produtu sira hanesan raga, vazu aifunan no seluk tan.
“Haree ba númeru estudante ne’ebé bot, iha posibilidade atu halibur lixu plástiku ne’ebé barak, nune’e MCTL sujere atu koloka lixu fatin besik iha resintu kampus nian, atu fasilita estudante sira bele halo separasaun ba lixu”, tenik Sra. Sónia Moniz.
Partisipa iha reuniaun ne’e, akompaña husi Visereitór Asuntu Administrasaun, Finansas no Administradór-Jerál, Profesór Hélio Augusto da Costa Xavier Mauquei, Ph.D no ekipa MCTL nian.
Média UNTL 📝: Leonia de Araújo (estajiária)
Foto 📷: Leonia de Araújo (estajiária)
- Detalhes
- Escrito por Mateus Goncalves
- Visualizações: 1835
#TimorLeste #UNTL #FCE 26 Fevereiru 2021
Universidade Nasional Timor Lorosa'e (UNTL) nia Magnífiku Reitór Profesór dr. João Soares Martins MPH, Ph.D akompaña husi Visereitora ba Asuntu Estudantís, Profesora Eng. Ligia Correia, M.Sc, enkontru ba dala ikus ho estrutura Fakuldade Siénsia Ezata (FCE), iha sala Video Konferénsia UNTL nian, Díli (26/02).
Iha enkontru ne'e Dekanu Interinu FCE, Profesór Romualdo Lopes da Cruz, ho estrutura hato'o fakuldade nia progresu no preokupasaun ba estrutura universidade nian, utilizasaun dalen portugés iha prosesu ensinu-aprendizajen, FCE gradua ona nia estudante na’in haat (4) no kooperasaun sira ne'ebé apoiu fakuldade hodi eleva kualidade estudante sira.
Aleinde progresu ne’ebé atinje, aprezenta mós dezafiu sira, relasiona ha saladeaula, fasilidade prátika liuliu laboratóriu, dosente espesifiku (Fízika, Matemátika no Kímika), inklui planu ba funsionáriu administrasaun no seluk tan.
Eventu ne’e, realiza ba dala ikus hafoin Magnífiku Reitór ho nia estrutura toma-pose iha 29 janeiru 2021 liubá, ho objetivu hodi rona progresu no dezafiu ne’ebé universidade nasionál nia Fakuldade atinje no enfrenta durante ne’e.
Partisipa iha enkontru ne'e Visereitora ba Asuntu Estudantís, Profesora Eng. Ligia Correia, M.Sc, Dekanu Interinu FCE ho nia Vise-Dekanu sira.
Média UNTL 📝: Agostinho da Cruz e Silva
Foto 📷: Agostinho da Cruz e Silva