#TimorLeste #UNTL #FEAH #COVID19 #COVID19TL 20 Dezembru 2021
Universidade Nacional Timor Lorosa’e (UNTL), liuhusi Fakuldade Edukasaun, Arte no Umanidade (FEAH) realiza Judisium ba dala XXV ba finalista na’in atus ida hitunulu resin lima (175) ne’ebé kompleta ona rekezitu akadémiku nian hodi hein ba graduasaun, iha Auditóriu Liceu UNTL nian, Díli (18/21).
Iha serimónia refere, Dekana FEAH, Profesora Doutora Ana Cristina de Jesus Silveira Martins, hateten, judisium ne’ebé hala’o, marka tan pasu espesiál ba fakuldade tan prodús graduadu na’in 175.
”Ohin loron istóriku no espesiál ba finalista hotu ne’ebé konsege konklui ona imi-nia ezijénsia akadémika iha fakuldade ne’e, no iha tempu naruk nia laran, ohin ofisialmente liuhusi espasu ida ne'e, imi bele simu ona atribuisaun ba titúlu akadémiku ho lisensiatura iha fakuldade”, tenik Dekana.
Profesora Martins mós agradese ba Inan-Aman ne’ebé ho domin bo’ot ba oan sira hodi bele hetan títulu ida atu prepara an, nune’e bele sai esperansa di’ak liu iha futuru, agradese mós ba profesór sira liuhusi kontribuisaun no esforsu tomak.
Iha fatin hanesan representante finalista, Jacinto Gonzaga da Costa, hateten agradese ba Aman-inan, obrigadu ba domin, pasiénsia no motivasaun, maibé atan ami prontu atu define situasaun difísil sira liuliu konfiansa no despasita, imi nia favor ami selu la bele maibé ho títulu lisensiadu sai hanesan presente furak no bele fó haksolok ba imi.
“Agradese mós ba dosente no funsionáriu sira ne’ebé fahé sira nia matenek hodi ami bele aprende, liuhusi imi nia dedikasaun no domin ohin loron ami bele hetan títulu lisensiadu" tenik Jacinto.
Liuhusi judisium ne’e atribui títulu akadémiku ba finalista na’in 175 husi departamentu sia hanesan : Departamentu Ensinu Língua Inglesa (11), Departamentu Ensinu Biolojia (18), Departamentu Ensinu Matemátika (29), Departamentu Ensinu Kímika (30), Departamentu Ensinu Físika (9), Departamentu Ensinu Língua Portugeza (29), Departamentu Formasaun Profesores Ensinu Báziku (22), Departamentu Ensinu Edukasaun Físika no Desportu (22), no Departamentu Ensinu Língua Tetun (5).
Totál husi finalista FEAH nian ba períodu ne’e ho reprezentasaun bazeia ba jéneru, mane: (81) no feto: (94).
Média UNTL 📝 : Denilson Amandio Barros
Foto 📷 : Altur Ramos