#TimorLeste #UNTL #FCE #FD #COVID19 #COVID19TL 21 Dezembru 2021
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH, Ph.D, hamutuk ho estrutura fó pose ba Dekanu Fakuldade Direitu, Profesór Isidoro Viana da Costa, no Dekanu Fakuldade Siénsia Exata, Profesór Romualdo Lopes da Cruz, ba períodu 2021-2025 iha Auditóriu Liceu, UNTL (20/12).
Iha serimónia n’e, Magnífiku Reitór hateten, durante ne’e ba dahuluk iha nia mandatu, fó tomada-pose ba Dekanu sira tanba papél importante hodi dezenvolve siénsia mak Dekanu sira, bazeia ba natureza Universidade nian.
“Primeira ves ita halo tomada de pose ba Dekanu sira, tanba natureza Universidade nian, Dekanu sira mak asumi papel importante iha siénsia idaidak nian, nune’e bele dezenvolve universidade”, tenik Reitór.
Reitór mós hato’o parabéns ba emposadu na’in rua no espera bele servisu makaas liután, hodi melloria atendimentu ba estudante sira.
Depois simu pose, Dekanu Fakuldade Direitu nian hateten, knaar ne’e atu haforsa liután Fakuldade Direitu hodi forma jurista ba dezenvolvimentu Timor-Leste nian.
“Ami iha Fakuldade Direitu, estudante sira tenke domina língua bazeia ba siénsia sira ne’ebé iha relasaun ho Fakuldade, tanba ami-nia knaar ne’e mak forma juiz sira, implementa saida mak estuda ona”, dehan Dekanu.
Entretantu Dekanu FCE, Profesór Romualdo Lopes da Cruz hateten, sei servisu hamutuk hodi haburas dezenvolvimentu sustentavel no solusaun ba difikuldade ne’ebé Fakuldade enfrenta.
“Ho knaar ne’ebé ha’u assume, ha’u prontu atu servisu hamutuk ho estrutura sira iha Universidade no Fakuldade hodi haburas dezenvolvimentu sustentabilidade nasional, nune’e uza estratejia di’ak hodi fó solusaun ba obstakulu sira ne’ebé sei mai”, tenik Dekanu FCE.
Partisipa iha serimónia ne’e, Prezidente Konsellu Jerál UNTL nian, Dr Aniceto Cardoso Barreto, reprezentante Komisaun Funsaun Públika, Visereitór, Proreitór, Dekanu no konvidadu sira.
Média UNTL 📝 : Leonia de A. da Costa
Foto 📷 : Denilson A. Barros