- Detalhes
- Escrito por Mateus Goncalves
- Visualizações: 7861
#TimorLeste #UNTL #VAAGK #COVID19 #COVID19TL 25 Marsu 2021
Universidade Nacional Timor Lorosa’e (UNTL) liuhusi Gabineti Visereitór ba Asuntu Akadémiku no Garantia Kualidade (VAAGK) simu ona dadus estudante nian ne’ebé hela iha alojamentu (kos) hodi hetan subsídiu husi Ministériu Solidariedade Sosiál no Inklusaun (MSSI) hamutuk na’in rihun lima atus ida limanulu resin hitu (5157).
“To’o agora (25-3) Gabinete simu ona dadus hamutuk 5157 no husi lista ne’e na’in 251 mak hetan uluk ona apoiu iha fase dahuluk nian, hanesan estudante sira iha Dormitóriu Hera no Fakuldade Siénsia Ezata tanba sira-nia dadus mak submete primeiru”, hateten VAAGK Profesór Doutór Samuel Venâncio de Sousa Freitas, iha Kampus Sentrál UNTL nian, Díli (25-3).
Visereitór ne’e mós hatutan, tempu limite ne’ebé ba Fakuldade no Departamentu sira hodi submete ba universidade ikus liu mak 26 Marsu aban sesta-feira, enkuantu atu loke fali ba faze tuir mai ka la’e, Universidade sei hein desizaun husi Ministériu.
Totál 5157 ne’e kompostu husi fakuldade sia (9) hanesan Fakuldade Siénsia Ezata (FCE-65), Fakuldade Enjeñaria, Siénsia no Teknolojia (FECT-655), Fakuldade Agrikultura (FAGRI-661), Fakuldade Direitu (FD-124), Fakuldade Filozofia Siénsia Umana (FFCH-165), Fakuldade Medisina no Siénsia Saúde (FMCS-945), Fakuldade Edukasaun, Arte no Umanidade (FEAH-1385), Fakuldade Ekonomia no Jestaun (FEG-489), Fakuldade Siénsia Sosiál (FCS-668).
Média UNTL 📝 : Agostinho da Cruz e Silva
Foto 📷 : Mateus Gonçalves
- Detalhes
- Escrito por Mateus Goncalves
- Visualizações: 10005
#TimorLeste #UNTL #FCE #COVID19 #COVID19TL 24 Marsu 2021
Universidade Nacional Timor Lorosa’e (UNTL) nia Magnífiku Reitór, Profesór dr, João Soares Martins, MPH, Ph.D, simu ona lista husi Ministeriu Ensinu Ensinu Superiór, Siénsia no Kultura (MESSK) ne’ebé bele hetan ona apoiu husi Ministériu Solidariedade Sosiál no Inkluzaun ba faze inisiál na’in tolunulu (30).
“Ohin ita simu ona lista husi MESSK ne’ebé entrega direta husi Diretora-Jerál Ensinu Superiór nian, no faze tuir mai entrega ba ekipa Universidade atu bele distribui ba estudante sira ne’ebé naran refere iha lista” tenik Reitór, iha Kampus Sentrál UNTL nian, Díli (22-3).
Magnífiku Reitór mós hatutan katak lista balun mós submete ona ba Ministériu no hirak ne’ebé seidauk finaliza Universidade sei komunika nafatin atu submete ba Visereitór Asuntu Akadémiku no Garantia Kualidade antes haruka ba MESSK.
Relasiona ho distribuisaun refere, Dekanu Interinu FCE nian, Profesór Romualdo Lopes da Cruz, M.Sc liuhusi via WhatsApp (23-3) hateten katak nia fakuldade mak ba dahuluk simu ona fós ho kuantidade hamutuk saka tolunulu (30) hodi distribui ba nia estudante sira.
“Konforme dadus ne’ebé FCE submete ba Universidade iha faze dahuluk ne’e, hamutuk benefisiáriu na’in 30, no ba faze daruak hamutuk 35 tuir dadus horseik (22-3) submete ona ba Universidade”, hatutan.
Lori Fakuldade nia naran, Profesór Romualdo agradese ba Governu liuhusi MESSK no MSSI bele fasilita ona estudante sira iha momentu Serka-Sanitária (SS) iha Díli mezmu la sufisiente.
“Ba oin, se estende tan SS ami propoin atu apoiu ho forma osan ($) ruma atu sira bele sosa nesesidade bázika seluk tanba difisil hetan apoiu husi inan-aman sira ne’ebé rezidente iha munisípiu”, tenik Profesór Romualdo.
Benefisiária Margareta Rodriquies Araujo, hafoin simu apoiu refere agradese ba MSSI ne’ebé oferese ona fós ba estudante sira hodi apoiu enfrenta serka-sanitária.
“Fós ne’ebé ami simu saka ida sente sufisiente ba ami bele aguenta ba fulan ida nian, maibé ami sujere presiza tan ajudu adisionál liuliu aula online”, hatutan Margareta.
Arjul Elias da Costa mós agradese ba MSSI ne’ebé oferese ona fós, situasaun jerál bele apoiu ona, maibé sei iha difikuldade relasiona ho nesesidade básika sira tanba hanesan rezidente iha “kos”, nia mós agradese ba estrutura fakuldade nian ne’ebé fasilita prosesu dadus nian.
Média UNTL 📝 : Miguel Gonçalves
Foto 📷 : Agostinho da Cruz e Silva, Arkivu FCE
- Detalhes
- Escrito por Mateus Goncalves
- Visualizações: 1397
#TimorLeste #UNTL #VAAGK 22 Marsu 2022
Universidade Nacional Timor Lorosa’e (UNTL) nia Visereitór ba Asuntu Akadémika no Garantia Kualidade (VAAGK), Profesór Doutór Samuel Venâncio de Sousa Freitas hateten, dadus estudante ne’ebé hela iha alojamentu (kos) submete ona ba universidade hamutuk na’in rihun rua atus neen , rua nulu resin lima (2625).
“Dadus ne’ebé fakuldade sira submete ona mai Universidade 2625, no totál ne’e mai husi Departamentu ruanulu (20), husi Fakuldade Enjeñaria, Siénsia no Teknolojia (FECT), Fakuldade Agrikultura (FAGRI), Fakuldade Medisina no Siénsia Saúde (FMCS), Fakuldade Siénsia Ezata (FCE), Fakuldade Edukasaun, Arte no Umanidade (FEAH) no Fakuldade Direitu (FD)”, tenik Vicereitór Profesór Samuel iha Kampus Sentrál UNTL nian, Díli (22-3).
Vicereitór mós rekoñese katak, husi parte universidade no estrutura Fakuldade sira esforsu maka’as hodi bele hetan dadus husi estudante, no kontinua husu nafatin ba estudante sira atu submete ona dokumentu ba Departamentu hodi verifika no submete ba Fakuldade.
Iha fatin hanesan Prezidente Asosiasaun Estudante FMCS nian, João Baptista hateten nia asosiasaun mós apoiu Fakuldade atu hafasil prosesu rekolla dadus husi estudante sira ne’ebé hela iha “kos”.
“Meiu ne’ebé ami uza iha FMCS, mak ajuda estrutura Fakuldade hodi hetan dadus mak ami kontatu direita ba asosiasaun Departamentu nian hodi rekolla dadus kada turma tanba sira mak koñese liu estudante sira ne’ebé hela iha alojamentu hafoin submete ba Fakuldade no horikalan no ohin submete mai Universidade”, hatutan João.
Senadu Baptista mós deskreve katak, bainhira informasaun ofisiál husi Universidade publika mak estrutura Fakuldade hamutuk Asosiasaun buka meiu hodi rekolla dadus estudante sira-nian.
Detalla husi dadus 2625 ne’e, husi FAGRI: 354 (Agropekuária, Agronomia no Peskas e Siénsia Mariña), FEAH: 508 (Ensinu Físika, Ensinu Edukasaun Físika no Desporto, Formasaun Professores Ensinu Básiku no Ensinu Língua Tétum), FCE: 42, FECT: 655 (Engeñaria Mekánika, Engeñaria Sívil, Engeñaria Eletrónika no Elétrika, Engeñaria Informátika no Geologia i Petróleo, inklui mos estudante ne’ebé hela iha Dormitóriu), FMCS: 942 (Eskola Superior de Medisina Jeral, Eskola Superior Enfermagem, Eskola Superior Parteira, Eskola Superior Teknologias Saúde) no Fakuldade Direitu: 124.
Média UNTL 📝 : Agostinho da Cruz e Silva
Foto 📸 : Agostinho da Cruz e Silva
- Detalhes
- Escrito por Mateus Goncalves
- Visualizações: 9711
#TimorLeste #UNTL 23 Marsu 2021
Lori naran Sívitas Akadémika tomak UNTL nian, hato’o kondolénsia profunda ba família enlutada Professor Felix de Oliveira, ST. M. Egn. UNTL lakon ona Profesór di’ak ida, ne’ebé fó dedikasaun maka’as ba Universidade Nacional Timor Lorosa’e. Professor Felix de Oliveira, ST. M. Egn, nudar Dosente Departamento de Engenharia Mecânica, Faculdade Engenharia, Ciências e Tecnologia. Obrigadu wain ba Profesór nia dedikasaun.
Haksolok ba iha Maromak Nia uma.
Média UNTL
- Detalhes
- Escrito por Mateus Goncalves
- Visualizações: 2203
#TimorLeste #UNTL #FEAH #DEF #COVID19 #COVID19TL 21 Marsu 2021
Universidade Nacional Timor Lorosa’e (UNTL), Fakuldade Edukasaun Arte no Umanidade (FEAH) nia Diretór Departamentu Ensinu Fízika (DEF), Profesór Paulo Alves Cabral, no dosente sira ho inisiativa komunitária tulun estudante sira Departamentu nian ne’ebé hela iha “kos” na’in atus ida sanulu resin lima (115).
“Inisiativa ne’e ha’u ho profesór sira DEF nian mak tau hamutuk fós, mina, no ikan-lata sira hodi hakmaan susar ne’ebé ita-nia estudante sira enfrenta, durante implementasaun Serka-Sanitária iha Díli”, hatutan Diretór iha Kampus Liceu UNTL nian, Díli (21-03).
Profesór ne’e mós dezeja katak ho tulun ne’ebé fó bele ajuda estudante sira, maské sei estudante balun mak ladauk hetan maibé profesór sira la promete no sei buka mekanizmu ruma tuir kbiit ne’ebé iha.
“Ami-nia estudante balun mak la hetan, maibé husu ba imi nafatin ho kalma no hakmatek iha idaidak nia fatin tuir protokolu konfinamentu obrigatóriu nian, no ami sei la haluhan buka dalan nafatin se konsege hetan grasa ruma ami sei aviza”, dehan Profesór Paulo.
Apoiu komunitáriu ne’ebé realiza tanba laran luak ne’ebé profesór sira iha, hahú husi diretór no nia dosente sira i konsege tulun duni (fós, mina no ikan-lata) ba universitáriu rezidente “kos” na’in 115 ne’ebé hela iha Díli.
Média UNTL 📝 : Miguel Gonçalves
Foto 📷 : Miguel Gonçalves, Arkivu DEF-FEAH