#TimorLeste #UNTL #VRAAGQ #VRAAF-AG #COVID19 #COVID19TL 26 Janeiru 2022
Uiversidade Nacional Timor Lorosa’e (UNTL), nia Visereitoria ba Asuntu Administrasaun i Finansa (VRAAF) liuhusi Diresaun Nasionál Rekursu Umanu (DNRH) sorumutuk ho dosente no funsionáriu kazuál sira kona-ba esforsu no dezafiu sira ne'ebé konsege ultrapasa iha 2021.
Visereitór ba Asuntu Administrasaun i Finansa no Administradór-Jerál (VRAAF-AG), Professor Helio Augusto da Costa Xavier Mauquei, Ph.D, hateten liuhusi enkontru ne’e, importante atu informa progresu no dezafiu sira durante 2021.
“Iha 2021 ita konsege dezafiu lubuk ida iha mudansa saláriu husi bens servisu ba saláriu no vensimentu, no ita boot sira haree antes ne’e dosente no funsionáriu kazuál barak mak ba iha gabinete, maibé hafoin rezolve buat hotu la’o di’ak”, hatutan.
Iha fatin hanesan, Visereitór ba Asuntu Akadémiku no Garantia Kualidade (VRAAGQ), Profesór Doutór Samuel Venâncio de Sousa Freitas, hateten, iha parte akadémiku nian ligadu ba dosente tempu integral no transversais sira. 
“Iha parte akadémiku nian, atu hato’o mak relasaun ho relatóriu ba atividade ne’ebé mak durante ne’e dosente idaidak hala’o, maské ita halo relatóriu, avaliasaun dezempeñu, no iha tinan ne’e Gabinete VRAAGQ sei distribui modelu relatóriu ba fakuldade hodi dosente sira bele uza”, dehan VRAAGQ.
Diretór Nasionál Rekursu Umanu nian, Sr. Agustinho Quelo hateten, planu ba tinan 2022 ne’e, mak sei halo promosaun karreira dosente no rekrutamentu, tanba ne’e iha implementasaun baziea ba orsamentu.
“Ita iha planu ba tinan ida ne’e ho prioridade rua mak dahuluk sei hala’o promosaun grau ba dosente permanente sira na’in 282 no vaga ba rekrutamentu ba dosente na’in 51 ba funsionáriu permanente vaga 34”, hatutan Quelo.
Partisipa husi Diretora Akadémika ba Disiplina Transversais, Profesora Natalia Pereira, dosente kontratadu, funsionáriu kazual sira, inklui konvidadu sira. 
Média UNTL 📝 : Miguel Gonçalves
Foto 📷 : Pio Ximenes & Artur Ramos