- Detalhes
- Escrito por Mateus Goncalves
- Visualizações: 4807
#TimorLeste #UNTL 23 Fevereiru 2021
Universidade Nasional Timor Lorosa’e (UNTL) nia Visereitór Asuntu Akadémika no Garantia Kualidade, Profesór Doutór Samuel Venâncio de Sousa Freitas, iha Kampus Sentral UNTL nian, Díli (19/02) hateten katak estrutura universidade nian sei reuni hodi diskute preparasaun no modelu ba orientasaun estudante foun tinan akadémiku 2021.
“Dadaun ne’e, parte universidade nian sei hein totál dadus estudante foun kada Fakuldade nian ne’ebé rejistadu, hafoin reuni hodi diskute implementasaun ba orientasaun akadémika nian, ita presiza deside hamutuk ho estrutura hotu fakuldade nian, nune’e bele haree formatu ka modelu orientasaun ba estudante foun tinan akadémika 2021 nian”, dehan Visereitór.
Visereitór mós hatutan tan katak hafoin desidi tiha formatu orientasaun maka, sei forma komisaun ba orientasaun nian husi nível universidade to’o fakuldade rasik, maibé prinsipalmente sei hein dadus husi estudante ne’ebé konsege rejista.
“Dadus ne’e importante tebes atu ajuda no hafasil estrutura sira hodi bele implementa orientasaun ba estudante foun sira ho diak”, tenik Visereitór.
Atualmente estudante foun ba 2021 nian to’o iha sesta 19 fevereiru liubá estudante hamutuk 1761 mak resjita ona, husi total 5282 ne’ebé admitidu no hirak seluk sei iha hela faze rejistu, no faze tuir mai mak (1) orientasuan akadémika, no (2) bele ona partisipa iha aula iha área oioin ne’ebé universidade nasionál eferese.
Média UNTL 📝: Leonia de Araújo (estajiária)
Foto 📷: Leonia de Araújo (estajiária)
- Detalhes
- Escrito por Mateus Goncalves
- Visualizações: 718
#TimorLeste #UNTL #FCS 23 Fevereiru 2021
Universidade Nasional Timor Lorosa’e (UNTL) liuhusi Fakuldade Siénsia Sosiál ( FCS) nia prosesu aprendizajen ba kursu Dezenvolvimentu Komunitáriu no Inkluzaun Komunitária Sosiál fó espasu no oportunidade ba sidadaun defisiente sira atu partisipa mós iha edukasaun superiór nian.
‘’Kursu Dezenvolvimentu Komunitáriu no Inkluzaun Komunitária Sosiál (DC-ICS) iha FCS oferese fatin no oportunidade aprendizajen ba timoroan sira ne’ebé ho kondisaun defisiente”, tenik Dekanu FCS, Profesór Camilo Ximenes Almeida, iha Kampus Kaikoli UNTL nian, Díli (22/2).
Dekanu mós reforsa tan katak, UNTL iha estudante sira ho kondisaun fízika dezabilidade barak mak estuda iha universidade nasionál, no FCS iha kursu ida espesiál ba área refere.
“Aleinde sai fatin espesiál, haree ba situasaun atuál, atu respeita sidadaun universitáriu sira ho dezibilidade, ami esforsu utiliza linguajen hanesan bele uza linguajen defisiente matan, defisiente tilun, defisiente ain, defisiente liman, no agora ita mós esforsu atu muda ema-nia pensamentu ba utilizasaun liafuan ne’ebé merese no dignu ba sira” tenik Dekanu FCS.
Dekanu mós hatutan katak iha kursu Inkluzaun Komunitária Sosiál, planeaatu eleva tan kapasidade profesór sira-nian liuhusi treinamentu, no envolve estudante dezabilidade sira iha infraestrutura hodi sira mós bele hetan oportunidade tuir orientasaun ne’ebé iha.
Iha fatin hanesan, estudante Departamentu Inkluzaun Komunitaria Sosial, Gilberta do Santos Pereira sente kontente hodi aprende maské ho kondisaun defisiente matan, maibé la lakon oportunidade ba edukasaun hanesan ema seluk.
“Ha’u senti kontenti tanba hola parte iha prosesu edukativu nian, no agradese mós ba Governu Timor-Leste, liuliu UNTL tan bele kria ona espasu inkluzivu, edukasaun, ema ho tipu defisiensia oioin bele asesu ba edukasaun’’, agradese Gilberta.
Estudante ne’e hatutan, iha etápa aprende nian, hanesan difisiénsia matan aprende uluk letra braim no bele adapta ho kondisaun mezmu la bele haree no prosesu liuhusi rona halo analiza hodi bele kompriende.
Média UNTL 📝: Denilson A. Barros (estajiáriu)
Foto 📷: Denilson A. Barros (estajiáriu)
- Detalhes
- Escrito por Mateus Goncalves
- Visualizações: 11657
#TimorLeste #UNTL #FDCH 22 Fevereiru 2021
Universidade Nacional Timor Lorosa'e (UNTL) nia Magnífiku Reitór, Profesór dr. João Soares Martins, MPH, Ph.D ho nia Visereitór no Proreitór sira hala'o enkontru ho Diretora Ezekutiva Fundu Dezenvolvimentu Kapitál Umanu (FDCH), Sra. Leila M. L. Cárceres dos Santos, hodi ko’alia kona-ba kooperasaun ba eleva kapitál umanu liuhusi programa bolsu-estudu ba UNTL ne'ebé apoiu husi FDCH.
Iha sala Video Konferénsia UNTL nian, Díli (19/02), liuhusi intervensaun Magnífiku Reitór nian hateten katak universidade fó prioridade mós ba bolsu estudu, no propoin atu labele aplika de’it ba Portugal no Brazil bele mós ba nasaun seluk.
“Ha’u akompaña programa bolsu estudu ne’ebé implementa, ha’u hanoin presiza loke oportunidade ba nasaun seluk, aleinde ba Brazil no Portugal. Ba dosente sira ne'ebé estuda iha nasaun seluk bainhira sira fila tenki iha rekizitu obrigatóriu tuir kursu portugés antes reintegra mai UNTL”, tenik Reitór.
Iha fatin hanesan, Diretora Ezekutiva FDCH agradese ba disponibilidade estrutura universidade nian no kongratula mós estrutura foun bele servisu di’ak liután iha kooperasaun ho FDCH.
“Primeiru agradese tebes ba disponibilidade UNTL nian ho FDCH atu hamutuk no kongratula mós ita bo’ot sira-nia mandatu, fiar katak sei ativu liután iha universidade no kooperasaun diak liután”, tenik Sra. Cárceres
Aleinde ne’e, Diretora FDCH hato’o mós ba estrutura universidade nian kona-ba papel FDCH, no informasaun jerál bolseiru sira-nian, inklui planu ba 2022 no mós programa estájiu profisionál.
Durante kooperasaun entre UNTL ho FDCH simu ona bolsu estudu ba Universidade Nacional Timor Lorosa'e hamutuk na’in 205 kompostu husi kursu Mestradu no Doutoramentu, gradua ona hamutuk 72 no dadaun ne'e ativu hela hamutuk bolseiru na’in 132.
Partisipa iha sorumutu ne'e Visereitór no Proreitór sira, Diretór Sentru Estudu Kultura no Arte, Profesór Doutór Vicente Paulino, Asesora FDCH Sra. Ana Paula dos Santos ho konvidadu sira.
Média UNTL 📝: Agostinho da Cruz e Silva
Foto 📷: Agostinho da Cruz e Silva
- Detalhes
- Escrito por Mateus Goncalves
- Visualizações: 721
#TimorLeste #UNTL #DNAE 22 fevereiru 2021
Universidade Nasional Timor Lorosa’e (UNTL) nia estudante foun 2021, hamutuk rihun ida atus hitu neenulu resin ida (1761) ho porsentu 33 husi totál estudante admitidu na’in rihun lima, atus rua ualunulu resin rua (5282), mak rejista ona dezde 15 fevereiru to’o 19 fevereiru 2021.
Relasiona ho dadus ikus ne’ebé asesu iha 19 fevereiru indika katak, husi estudante 5282 ho porsentu 67 husi estudante na’in 3521 mak seidauk rejista.
“Prosesu ba estudante foun sira, dezde 15 to’o 19 fevereiru rejistu ona 1761, no bazeia ba data ne’ebé iha, hahú husi 15-22 fulan fevereiru, no prosesu pagamentu iha Banku Nasionál Komérsiu Timor-Leste (BNCTL) nian, hafoin selu ho osan ($87.00) hotu, lori resibu, aprezenta mós dokumentu sira mai iha UNTL hodi foti fixa planu estudu”, tenik Sr. Rui Loco Pires atuál Diretór Nasional Atendimentu Estudante (DNAE).
Diretór DNAE mós informa tan katak, estudante sira ne’ebé foti ona formuláriu registrasaun bele ba halo pagamentu iha Banku BNCTL ne’ebé sirkula iha Timor laran tomak inklui sukursál UNTL, maibé estudante hotu tenki kumpri regra prevensaun COVID-19 ne’ebé hatur ona.
Rekizitu sira ne’ebé estudante foun sira presiza (1) foti resibu iha balkaun UNTL, prenxe numeru no naran kompletu ne’ebé refere iha publikasaun, (2) hatudu diploma original no deklarasaun, lori resibu ba ho ($ 87,00) selu iha banku BNCTL, (3) hafoin selu tiha lori resibu pagamentu ba foti fixa planu estudu iha balkaun refere tuir fakuldade idaidak, bazeia ba informasaun anexu iha DNAE, (4) estudante ne’ebé la rejista tuir data sei konsidera rezigna aan.
Alende ne’e mós data rejistu ba estudante foun sira hahú husi loron 15-22 fulan fevereiru 2021, no iha posibilidade atu extende tan to’o 26 fulan fevereiru 2021.
Média UNTL 📝: Laurindo da Cruz (estajiáriu)
Foto 📷: Laurindo da Cruz (estajiáriu)
- Detalhes
- Escrito por Mateus Goncalves
- Visualizações: 12515
#TimorLeste #UNTL #FECT 22 Fevereiru 2021
Universidade Nacional Timor Lorosa'e (UNTL) nia Magnífiku Reitór, Profesór dr. João Soares Martins, MPH, Ph.D, ho nia Visereitór no Proreitór sira hala'o enkontru ho estrutura Fakuldade Enjeñaria Siénsia no Teknolojia (FECT) nian, hodi rona direta progresu no dezafiu sira ne'ebé fakuldade nian.
Sorumutu ne'e realiza iha Sala Vídeo Konferénsia UNTL nian, Díli (22/02), Dekanu FECT, Profesór Doutór Ruben Jerónimo Freitas, no nia estrutura aprezenta kona-ba sistema dijitalizasaun ne'ebé durante ne'e implementa ligadu ho rejistrasaun online nomós preparasaun Departamentu Enjeñaria Informátika ba Avaliasaun husi Ajénsia Nasionál ba Avaliasaun no Akreditasaun Akadémika (ANAAA) no seluk tan.
Iha asuntu relevante seluk aprezenta mós kona-ba kooperasaun sira durante ne'e liuliu ho Japan International Cooperation Agency (JICA), inklui kooperasaun ho parseiru sira tantu nasionál no internasionál sira.
Partisipa iha iha enkontru ne'e Visereitora ba Asuntu Estudantíl, Profesora Eng. Lígia Tomas Correia, M.Sc, Proreitora ba Asuntu Kooperasaun Profesora Doutora Lídia Gomes, SKM, M.D. no Dekanu FECT ho nia estrutura sira.
Média UNTL 📝: Agostinho da Cruz e Silva
Foto 📷: Agostinho da Cruz e Silva