#TimorLeste #UNTL #FFCH #HATULIA #COVID19 #COVID19TL 29 Novembru 2021
Universidade Nacional Timor Lorosa’e (UNTL), nia Magnífiku Reitór, Profesór dr. João Soares Martins, MPH, Ph.D, lansa livru rua (2) ho títulu, (i) Istória: Komandante Rejiaun IV Vizaun, Misaun no Asaun, (ii) Misaun Misionáriu: São Francisco Xavier Tinan 100 Parokia Hatulia, Iha Salaun Parókia São Francisco Xavier Hatulia, Ermera (27/11).
Magnífiku Reitór agradese ba autór ne’ebé konsege tau hamutuk hanoin no esforsu hodi buka informasaun, evidénsia no entrevista ho autór Ernesto Fernandes (Dudu), nomós ezisténsia Igreja no misaun misionáriu iha Igreja Katólika Hatulia nian.
“Agradese tebes ba autór livru sira ne’ebé hakerek ona livru rua, ne’e sai hanesan referénsia di’ak ba joven sira, estudante sekundáriu no universitáriu sira para nune’e ba oin la bele haluhan istória sira ne’ebé hakerek iha livru nune’e aban bairua katuas sira mate sira-nia istória kontinua permanese iha jerasaun sira tuir mai”, tenik Reitór.
Iha fatin hanesan Dekanu Fakuldade Filozofia no Siénsia Umana (FFCH), Profesór Martinho Borromeu, hanesan mós autór ba livru ho títulu, Komandante Rejiaun IV Vizaun Misaun no Asaun, hateten, kuaze tinan tomak haleu fatin-fatin hodi rekolla informasaun kona-ba Sr. Dudu nu’udar komandante reziaun IV nian no ikus mai elabora livru refere.
“Intensaun husi peskiza ne’e, ita rai iha gaveta ema la lé ita hakerek pelu menus publika liuhusi semináriu no halo sosializasaun no hein katak jerasaun mai bele aprende valór ruma ne’ebé hakerek iha livru ne’e”, tenik Dekanu.
Iha sorin seluk, Amu Paróku São Francisco Xavier Hatulia, Pe. Natalino da Costa Soares, hanesan autór ba livru rua ne’e hateten, hanesan Amu lulik la’os husik de’it nia obra ida ne’ebé físiku maibé buka kontribui obra inteletuál ida liuhusi peskiza deskobre entidade importante iha Munisípiu no Postu ne’e nian.
“Liuhusi estudu ne’ebé halo, deskobre istória pasadu nian atu bele tranzmite no sai lisaun ida nune’e jerasaun foun sira bele aprende lisaun, tempu to’o ona promove kultura hakerek atu nune’e bele husik hela pensamentu siéntifíku no bele kontribui ba kapasidade inteletual nian”, tenik Pe. Natalino.
Iha lansamentu livru ne’e realiza mos semináriu ba resultadu peskiza, lansamentu resultadu peskiza, no halo enseramentu estájiu ba estudante hirak husi FFCH nian ne’ebé remata ona estájiu iha lokál.
Partisipa Visereitóra ba Asuntu Estudantís (VRAE), Profesora Eng.ª Lígia Tomás Correia, M.Sc, Diretór-Jerál Servisu Administrasaun Akadémiku, Se. Armindo Leto Fátima, Diretór-Jerál Servisu Apoiu Reitoria, Sr. Jacinto H.S.Belo, Diretór Nasionál Atendimentu Estudantes, Sr. Rui Loco Pires, Diretor Nasionál Planu Finansas, Sr. Egídio dos Santos Filipe, Dosente, Diretor Eskola sira, Estudante Universitáriu, Sekundáriu, Ensinu Báziku São Francisco Xavier Hatulia no kovidadu sira.
Média UNTL 📝 : Denilson Amandio Barros
Foto 📷 : Denilson Amandio Barros